Tàm 6 nhai bồ nam do, Mpồl duh broă Làng bol ală kâp càr Dăk Lăk neh lam lơh uă kơnòl broă kwơmàng tàm bơta tàm jàu tơngai lơh broă, mơkung rơndăp tăp sèng rơndăp mpồl lơh broă jăt broă lơh tơrlòng lài gơnoar ătbồ ƀòn lơgar bàr kâp. Mpồl duh broă Làng bol kâp càr neh bơyai lơh 4 dơ̆ pơrjum, ai lơh jăt 46 jơnau lơh nền tàm pơrjum; lơh broă lùp mờ hơ pơn jăt tai geh tam gơl pa, tơrgùm tàm ală broă cau tĕ khà sền gròi. Lơh broă tìp măt cau tĕ khà geh lơh sùm, dờp geh rlau 788 jơnau đơs, jơnau dan nàng pơyua anih lơh broă geh gơnăp gơnoar in sền swì, bơsong. Tàm kâp sàh, Mpồl duh broă Làng bol ală ƀòn lơgar neh bơyai lơh rlau 400 dơ̆ pơrjum, ring bal rlau 2 rbô jơnau lơh nền tàm pơrjum; lơh jăt mờr 230 dơ̆ jăt sền mìng dùl tơngume mờ 58 dơ̆ lòt lùp sền, pơgồp bơnah tă bơsong uă kal ke gơlik geh tàm kâp hơđơm.

Bè ală gơkòl, uă jơnau đơs đơs là mpồl ală cau ala măt mìng lơh dùl kơnòl broă tàm kâp sàh gam ờ huan uă, bơta chài lơh broă lùp sền wơl, lùp mờ hơ mờ jăt sền ờ hềt ndrờm bal; lơh broă tam gơl sồ mờ lơh jăt broă lơh tơrlòng lài “pơrjum ờ pơ àr” gam lơyài. Ală cau ala măt kung dan sơlơ bơsram tàp broă mờng lơh ờs mờng, lơh sir kơrnoăt boh lam pơgồp bal đah Mpồl duh broă Làng bol mờ Anih duh broă Làng bol mờ ală anih lơh broă broă mờng lơh, mơkung lơh pràn ngui măy mŏk yal tơnggĭt nàng kờñ tơngguh uă cồng nha lơh broă bơh anih lơh broă làng bol dê pồ.

Đơs pơndŭt pơrjum, mò Cao Thị Hoà An, Kwang bàng Đảng Dà lơgar, Phó Bí thư Duh broă sùm Tỉnh ủy, Chủ tịch Mpồl duh broă Làng bol càr Dăk Lăk, sồr Mpồl duh broă Làng bol ală kâp pơn jăt tai jăt nền mùl màl ƀòn lơgar, iăt kơno jơnau kơlôi sơnơng, bơta kơ̆p kờñ cau tĕ khà dê nàng di tŭ yal wơl, dan mờ kâp geh gơnăp gơnoar. Mơkung, sơlơ jăt sền broă lơh jăt ală jơnau lơh nền tàm pơrjum, ală broă lơh, rơndăp broă lơh tờm kwơmàng. Mò Cao Thị Hoà An, đơs sùm:

 “Kơnòl Mpồl duh broă Làng bol dê pal mŭt lơh bal, pal wă, pal gĭt gơkòl anih lơi nàng yal Đảng in. Mơya mờ đah dong kờl ai Anih duh broă in bơh gùng dà broă lơh, bơh bơta broă jăt sền, lùp sền nàng bơsong broă. Geh sơl kwang bàng pleh pồn halà ờ hah? Geh sơl kwang bàng là ờ khin kơlôi, ờ khin lơh halà ờ hah? Mờ lơh broă Mpồl duh broă Làng bol ală kâp dê là pal geh tam gơl pa pràn kơldang rlau tai, mŭt lơh bal, lòt bal den hơ̆ sồng lơh sir niam kơnòl broă”.