Ồng Lê Minh Hưng- Thủ tướng Chính phủ đơs loh, jơnau đơs kwơ màng ngan, jơh nùs jơh jơh tồr, jrô ơnàng ngan mờ tơl làm bơh ồng Tổng Bí thư, Chủ tịch lơgar dê ngan ngồn là bơta pơndờm pơndiang, pơn jờng dờng ngan mờ là ală bồ tơngoh pơlam gùng sùm sùm ai Chính phủ, ală kấp, ală gah, ală ƀòn lơgar in nàng pơn jat tai pơn đơl pràn lơh ngan, jơh nùs lơh ngan lơh jat niam ngan rlau tai kơnòl broă geh jàu, lơh sir geh cồng nha ală jơnau kờñ, broă jàu bơtàu tơnguh lơh sa- mpồl bơtiàn nam 2026 mờ jơh bal mờ tơngai lơh broă bơh nam 2026-2030.

Đơs sùm nùs nhơm kơ̆ nùs mờ jơh nùs lơh ngan lơh jat jơnau kờñ gơguh tai nam 2026 mờ tơngai lơh broă bơh nam 2026- 2030 lơh geh 2 nơm khà, bal mờ jơnau sồr gàr kơ̆ kơl jăp lơh sa dờng, gròi sền roh giă priă mờ gàr niam ală tàm pơn ring dờng bơh rài lơh sa dê, ồng Lê Minh Hưng- Thủ tướng Chính phủ sồr:

"Gah lơi, ƀòn lơgar lơi neh lơh geh mờ sơr lèt jơnau kờñ gơguh tai tàm 6 nhai bồ nam den pơn jat tai pơn đơl pràn nàng lơh geh khà jơnhoa rlau. Ală gah, ală ƀòn lơgar ờ hềt lơh geh pal jơh nùs lơh ngan lơh sir, is ồn là càr lơgar Hà Nội mờ ƀòn dờng Hồ Chí Minh bal mờ ală ƀòn lơgar gơn kơnờm gơguh tai. Tŭ do 15 tàm 34 ƀòn lơgar pal lơh ngan uă rlau tai. Tàm broă rơndăp lơh bơh Chính phủ dê neh jàu broă jàu, kơnòl broă loh làng ngan ai tơl gah, tơl broă, tơl ù tiah in, ală Bộ, gah mờ ngan là ală càr, ƀòn dờng gơwèt Dà lơgar pal sền gròi mờ lam lơh jat jăt broă rơndăp lơh, gùng dà broă rơndăp lơh đơng lam lơh jăt bơh Chính phủ dê”.

Ală jơnau sồr lơh bơh cau lam bồ Chính phủ dê pà gŏ Chính phủ ờ hừh nùs mờ ală cồng nha lơh geh bơh sơn rờp. Is ồn càr lơgar Hà Nội mờ ƀòn dờng Hồ Chí Minh, 2 tiah drà dờng ngan do geh khà bơnah rơhiang dờng tàm GDP gùt lơgar dê. Dilah 2 “gah lơh sa dờng lam lài” do ờ tơnguh mhar, anih lam bồ rài lơh sa dờng kal ke ngan lơh geh jơnau kờñ di tơngai. “Ală gah, ală tiah ờ hềt lơh geh jơnau kờñ gơguh tai 2 nơm khà den pal  jơh nùs lơh ngan lơh sir”, do là dùl jơnau sồr loh làng, sồr pal geh bơta rcang lài, ờ gŏ di pleh pồn kơnòl bơh ală mpồl lơh broă gam lơyài. “Tŭ do 25 tàm 34 ƀòn lơgar pal lơh ngan uă rlau”, khà do pà gŏ bơta kơn jơ̆ lơh sir broă rơndăp lơh nam là dờng ngan, yal wơl bơta geh ngan là pang rùp lơh sa bulah geh bơta niam mơya ờ hềt ndrờm bal, sồr pal geh dùl dơ̆ tơrgùm jơh pràn tàm uă broă nàng lơh geh jơnau kờñ gơguh tai 2 nơm khà tàm nam 2026 mờ jơh bal mờ tơngai lơh broă bơh nam 2026- 2030.