Dơ̆ tơmŭt bal do, càr Phú Yên geh 971 nă kwang bàng guh tus càr Dăk Lăk, tàm hơ̆ geh 876 nă kwang bàng đơng lam kấp cơl dŭ lơh broă mờ groăt broă; 95 nă kwang bàng at gơnoar broă bơh Phó Kwang lam bồ rơlao hờ đang, gơwèt cau geh ai hìu ơm drơng kơnòl broă di jăt jơnau geh ai.

Tơnơ̆ mờ tŭ pơrjum yal crơng gơs càr pa tàm ngai 30 nhai 06, ală anih lơh broă, mpồl lơh broă gơrềng bal rơ̆p mùl màl mŭt lơh broă. Bŭ lah gam ờ uă kal ke bè hìu ơm, rài kis bal mờ broă bơsram sră oh kòn in, mơya mờ nùs nhơm geh kơnòl bal mờ broă rơcang lài, ală kwang bàng sơnrờp ngan bơh càr Phú Yên guh tus càr Dăk Lăk neh ai tơngŏ nùs nhơm lơh ngan tơrgùm bal mhar, dùl nùs bal tài bơta bơtàu tơnguh kơl jăp càr pa dê tàm tơngai mŭt sơn đờm lơh broă.

Git nđờ rhiang nă kwang bàng, cau lơh broă sa priă nhai càr Gia Lai neh ntrờn rê hờ anih tờm drơng broă sră pơ àr gơnoar atbồ pa tàm ƀòn dờng Quy Nhơn, càr Bình Định, sơn đờm lơh broă, lam lơh ngan ngồn tŭ tơngai bơtàu tơnguh pa bơh càr Gia Lai dê.

Bơh nggùl nhai 6, Mpồl Lơh kơnòl broă sùm Tỉñ ủy ală càr Gia Lai mờ Bình Định neh geh sră nggal ring bal: tàm dơ̆ 1, lơh gơlik bơta ƀuơn nàng mờr 50% tàm pơgap 1 rbô 800 nă kwang bàng, cau lơh broă sa priă nhai dà lơgar bơh ală sờh, gah broă lơh dê rê hờ anih tờm lơh broă sră pơ àr gơnoar atbồ pa. Khà kwang bàng gam wơl pơn jat tai lơh broă tàm anih sồ 2 tàm ƀòn dờng Pleiku nàng gàr broă lơh sùm bơh Mpồl lơh broă sră pơ àr gơnoar atbồ tàm càr Gia Lai (lài do) dê tus jơh nam 2025. Tơnơ̆ nam 2025, ală sờh, gah broă lơh rơp rơcang lài geh broă rơndap lơh ntrờn tàm pơdar cau lơh broă dồ bă dipal, gơ jat bè bơta geh ngan lam lơh mờ bơta geh ngan phan bơna tàm Quy Nhơn.

Jơh mpồl Kwang bàng tàm Mpồl duh broă Đảng ƀộ càr Kon Tum khoă XVI neh tus tàm càr Quảng Ngãi nàng drim ngai do (30/06) tus bal yal mpồl lơh broă sră pơ-àr mờ mpồl lơh broă sră nggal.

Gơwèt mờ 40 sàh, sơnah ƀòn pa càr Kon Tum lài do dê ngài mờ Anih tờm lơh broă sră nggal càr pa Quảng Ngãi di pơgăp 200 kơi sồ, kwang đơng lam 2 càr Kon Tum mờ Quảng Ngãi neh ring bal lơh 10 anih pờ tơlik tàm 10 kơnhoàl, ƀòn dờng càr Kon Tum lài do dê nàng kwang bàng 40 sàh, sơnah ƀòn pa tus bal broă lơh kwơ màng bơh broă lơh pờ tơlik tàm internet.