Drim ngai 16/04, gĭt nđờ rơbô nă kwang bàng, đảng viên càr Kon Tum neh tus bal pơrjum pờ tơlik tơn tàm internet jơh gùt lơgar bơsram lam lơh jat Jơnau lơh nền tàm pơrjum dơ̆ 11 bơh Mpồl duh broă Đảng Dà lơgar khoă 13 dê. Lơh geh ală bơta nàng đảng viên in gĭt mờ jơnau yal, Kon Tum bơyai lơh 121 tiah pơrjum tàm tơrbŏ bal bơh kấp càr tus kấp sàh. Rcang lài lam lơh jat Jơnau lơh nền tàm pơrjum dơ̆ 11 dê, lài hơ̆, tàm ƀòn drà dềt Măng Đen, kơnhoàl Kon Plông, Mpồl Lơh kơnòl broă sùm Tỉñ ủy càr Kon Tum mờ Quảng Ngãi neh bơyai lơh pơrjum lam lơh jat gùng dà broă lơh bơh Dà lơgar dê bè broă tơmŭt bal 2 càr. 2 càr ring bal tơnggơs 6 mpồl lơh broă nàng sơr băc mhar lơh jat ală tơngume kơnòl broă dê.

Anih duh broă làng bol càr Dăk Lăk neh geh broă rơndap lơh bơyai lơh ai jơnau đơs cau tĕ khà dê gơ wèt mờ tơngume Jơnau lơh nền rơndap sap sèng, tơmut bal ù tiah kâp càr, kâp sàh. Jat hơ̆, broă ai jơnau đơs geh lơh mờ broă lơh phàt sră tus ala mat hìu bơnhă. Tơngai bơyai lơh ai jơnau đơs cau tĕ khà dê là ngai 20/4. Tơnơ̆ hơ̆, Anih duh broă làng bol kâp sàh, kơnhoàl mờ Sờh lơh broă dơlam is càr Dăk Lăk lam lơh ală broă tơrgùm wơl, yal cồng nha, gàr di tŭ tơngai hơ pơrgon yal Mpồl duh broă làng bol ală kâp in sền sơ wì bơh ngai 21 tus ngai 24/4. Anih duh broă làng bol càr Dăk Lăk sồr ală tiah lam lơh jơh nùs, di broă rơndap lơh, gàr bơta song dơpă, loh làng mờ di tŭ tơngai hơ pơrgon, bơh hơ̆ lơh gơlik bơta ring bal tàm làng bol gơ wèt mờ broă rơndap sap sèng ală ù tiah tàm càr.

 Càr Dăk Nông ai tơlik 8 jơnau pal jat kwơ màng nàng lam lơh rơndăp tăp sèng wơl mpồl lơh broă sră nggal gơnoar atbồ kấp sàh jat tàm ală bơta gàr niam bơta kơ̆ niam, jak chài, di jơnau sồr. Jơnau pal jat sơn rờp là pal gàr niam bơta đơng lam ngan ngồn, tơl làm bơh Đảng dê tàm jơh ală broă lơh rơndăp tăp sèng ală sàh. Jơnau pal jat dơ̆ 2 là lơh jat Sơnoa boh lam, adat boh lam mờ rơndăp ù tiah neh geh ring bal. Dơ̆ 3 là ai lài rơndăp tăp sèng ală mpồl lơh broă ờ hềt lơh niam bè bă ù geh is halà broă lơh khà kờp làng bol jat Jơnau lơh nền tàm pơrjum bơh Anih duh broă Lơh kơnòl broă sùm Quôk hội dê.

Jơnau pal jat dơ̆ 4 là kờp tus ală bơta geh is, phan bơna bơt bơtàu, ù tiah bơtàu tơnguh nàng lơh jat niam uă ngan rlau jơh bơta ƀuơn, bơta pràn ƀòn lơgar dê tơnơ̆ tŭ tơmut bal. Dơ̆ 5 là ờ tam gơl ù tiah kấp kơnhoàl. Dơ̆ 6 là broă rơndăp tăp sèng wơl ù tiah sră nggal gơnoar atbồ pơgồp bal mờ pồ tơl mpồl lơh broă cíñ trị jat gùng dà tơrmù di pal, gơtùi lơh broă, lơh broă geh cồng nha. Dơ̆ 7 là ờ ngui kră kơl dang broă jàu lơh tiah drà. Dùl jơnau pal jat kwơ màng ndai Dăk Nông ai tơlik là lơh niam broă lơh mblàng yal, hòi jà, tă pơgồp jơnau đơs làng bol dê nàng lơh geh bơta ring bal, dồ nùs bal uă tàm mpồl bơtiàn bè rơndăp tăp sèng wơl kấp sàh.