Thủ tướng jờng rơ dơ̆ tus còp geh bơyai lơh tơnơ̆ mờ cồng nha Pơrjum dờng dơ̆ XIV Đảng dê, ai tơngŏ lơgar Việt Nam sền kwơ, lơh ngan lơh nền nòn rơlao bơta git gơ̆p lơh bơyô bal ờs mờng, tam klăc bal kwơ màng mờ lơh broă bal tơl ală bơta đah lơgar Việt Nam mờ lơgar Cuba.

Bàr gah đơs niam bơnàng jă bơtàu tơnguh bơta git gơ̆p đah bàr gah, ring bal lơh pràn broă lơh sa, kă bro phan; lơh geh cồng nha ală rơndăp broă lơh năng lượng geh wơl, tàm hơ̆ uă ngan là ồs đèng măt tơngai; tơnguh broă lơh bal y siñ, tam jào broă lơh vaccine, phan lơh sơnơm drơng tàm drà kă bro đah bàr lơgar mờ tăc mờ lơgar bơdìh. Thủ tướng đơs nền lơgar Việt Nam rơ̆p pơn jăt tai tam pà bal broă lơh mờng chài bơtàu tơnguh năng lượng lơh geh wơl mờ lơgar Cuba nàng drơng tàm broă lơh sa mờ rài kis làng bol lơgar Cuba in.