Pơrjum geh bơyai lơh tơnơ̆ ală dơ̆ tơrluh ù geh bơnah lơi ờ bè ờs tàm ù tiah càr dê. Cih dờp bơh Viện Vật lý địa kầu, bơh ngai 4/4/2021 sơnđờm geh ală dơ̆ tơrluh ù tàm càr Kon Tum mờ bơta tờm uă ngan tàm ù tiah kơnhoàl Kon Plông. Kờp tus lồi nhai 4 nam 2025 tàm tiah do neh gơlik geh rlau 1 rơbô dơ̆ tơrluh ù mờ bơta pràn gơ aniai bơh trồ tiah dê bơh kấp 0 tus kấp 1.

Jat jơnau đơs bơh cau jak chài dê, rơnggô ù gơlik geh tàm ù tiah kơnhoàl Kon Plông, càr Kon Tum gơlik geh mờ bơta geh bal bơh tơrluh ù gơ chồl, hơ̆ là gơlik geh uă tàm tơngai bơh sơn rờp, gơmù rơhời mờ jơh jat tŭ tơngai. Tềng đăp bơta do, bal mờ crăp 11 anih sền gròi tàm càr Kon Tum, bơh nhai 3 nam 2024 Viện vật lý địa kầu neh lơh tơngume jak chài “Kơlôi sơnơng sền sơwì broă lơh tơrluh ù mờ sồr đơs ală broă lơh drơng di pal ai càr Kon Tum mờ tiah rềp bal in”. Jơnau kờñ tus nhai 2 nam 2027 tŭ tơn jơh tơngume rơ̆p lơh loh ală bơta gơrềng lơh gơlik ală dơ̆ tơrluh ù gơ chồl tàm tiah kơnhoàl Kon Plông, càr Kon Tum dê; sền sơwì bơta gơrềng đah broă lơh rơnggô ù mờ tơrgùm dà tơnau dơng dà; sền sơwì bơta ngòt rơngơ̆t bơh tơrluh ù gơwèt mờ mpồl bơtiàn tiah do dê mờ lơh geh ală jơnau digơlan gơlik geh nàng drơng ai tiah kơnhoàl Kon Plông kung bè ală tiah rềp bal in.