Ơdŭ bơto marketing geh Mpồl tam klăc mpồl lơh broă bal càr Dăk Lăk bơyai lơh tơn tàm anih ràng tơlik, yal phan geh lơh bơh ală mpồl lơh broă bal dê. Ală làng bol lơh broă sa neh mờng mờ broă lơh tàm suơn tàm mìr, tŭ do sùm lơh broă tàm điện thoại ngăc ngar. Làng bol lơh broă sa rơwah rùp niam, rơwah tiah niam, jòi geh tiah nàng kŭp rùp phan geh lơh hơ̆ sồng cih jơnau yal pơlam. Lồi dŭt là “tơrmŭt” nàng tăc tàm drà kă bro điện tử. Tus bal ơdŭ bơsram, bi Lê Văn Việt, cau tàm Mpồl lơh broă bal Bazan, kơnhoàl Krông Păc, càr Dăk Lăk pà git: “Internet mpồl bơtiàn mờ kă bro phan điện tử tŭ do gam là broă pal lơh, là pal geh lơh sùm bloh. Di lah bol he ờ tus tơrgùm bal mờ broă lơh do den gơtìp sơrbì is hờ tơnơ̆. Broă mpồl lơh broă bal tơrgùm bal tàm broă lơh internet ha là ală drà kă bro phan điện tử rơ̆p là bơta pràn ai mpồl lơh broă bal in. Tài broă lơh do gơtùi ai tơngŏ jơh nàng cau ngui sa in ngui tàm internet mpồl bơtiàn bè cau ngan, broă lơh ngan, phan ngan dê”.

Ồng Thân Cư, Phó lam bồ Mpồl lơh broă bal broă lơh drơng ala lơh sa suơn sre Công bằng Cư̆ Dlê Mnông, kơnhoàl Cư̆ Mgar, càr Dăk Lăk pà git, mpồl lơh broă bal geh lơh bơh nam 2012. Tus tŭ do, mpồl lơh broă bal geh 114 nă cau, mờ rơlao 230 lồ ù tam kơphe, tiêu, sầu riêng. Di lah lài do, mpồl lơh broă bal mìng mờng mờ broă ai sơntìl, phan lơh broă, phơng sih, dong kờl bơta chài nàng làng bol in lơh geh phan geh tơl bơta niam, den tŭ do ală làng bol gam dờp tai dùl gơnoar broă pa, gơs cau tờm tus bal tàm mpồl geh kwơ, tơrbŏ bal phan geh lơh mờ drà kă bro, yal măt phan kă bro ƀòn lơgar dê. Broă ngui măi mok sồ tàm broă yal phan geh lơh neh dong kờl mpồl lơh broă bal tus bal mờ drà kă bro mhar rơlao mờ uă rơlao. Ồng Thân Cư kơlôi sơnơng: “He pal tơnguh bơta kwơ lơh sa ndang mờ pơgồp bal tàm broă git ngui măi mok pa, git tăc phan, git tus bal mờ drà kă bro, marketing nàng blơi tăc phan tàm drà kă bro nàng ală cau in git phan bơh he dê geh niam lah ờ. Di lah he lơh niam mờ he ờ cri bơyai, ờ yal den rơ̆p là hoàc huơr ngan”.

Ồng Phạm Thanh Tuấn, cau bơto broă sơn đờm mŭt lơh broă tam gơl pa bơceh lơh dà lơgar, mờ kung là cau neh tus bal bơto làng bol lơh broă sa càr Dăk Lăk in ngui ală bơta tờm internet mpồl bơtiàn, drà kă bro phan điện tử mờ phan lơh broă tàm internet nàng tìp mờ cau blơi phan uă đơs là: Tam gơl sồ gam lơh tus tàm tơl bă suơn, tơl mpàng tê bơh làng bol lơh broă sa suơn sre dê. Tam gơl sồ kung lơh geh dùl bồ tơngoh kơlôi sơnơng pa, dùl broă lơh pa tàm mpồl broă lơh, tàm broă atbồ mờ tàm broă lơh măt kă bro phan. “Tŭ do cau ngui sa lơh jăt broă pin dờn tàm ală cau lơh gơs phan ngui sa, mìng geh ală cau do hơ̆ sồng geh jơnau mblàng bè ngăc ngar jăk chài cau tàm tiah do dê tơn. Tài uă nam lơh broă den ală cau do neh là cau jăk bơh phan geh lơh bơh ală cau do dê lơh gơs. Bơta dơ̆ bàr tàm broă tam gơl jơnau git wă bơh làng bol lơh broă sa dê là ờ kơ̆p tus đah dơ̆ pe nàng blơi kài phan geh lơh bơh să tờm dê tai. Di lah pơgăp mờ do tàm 5 nam mờ đơs là làng bol mŭt tàm drà kă bro phan nàng tăc ih, ha là liverstream ih, ha là tơrbŏ bal mờ cau ngui sa gùt plai ù ih den hơ̆ là bơta ờ geh ngan. Mơya tŭ do, gam là broă pal geh lơh”.

Jăt ồng Lê Văn Dần, Phó Củ tịc mpồl tam klăc mpồl lơh broă bal càr Dăk Lăk đơs, tàm bơta drà kă bro tàm pơrlòng bè tŭ do, bal mờ broă lơh pa jơh broă lơh, ală mpồl lơh broă bal kung neh lơh pràn broă ngui măi mok sồ tàm broă yal, tă phan geh lơh tàm uă drà kă bro phan điện tử. Tơngai do, mpồl tam klăc mpồl lơh broă bal càr neh bơyai lơh uă dơ̆ bơto bè jơnau git wă kă bro tàm măi mok sồ, bơtàu tơnguh măt kă bro, lơh rùp rài ai mpồl lơh sa kă bro, mpồl lơh broă bal in. tàm tơngai tus, Mpồl tam klăc bal mpồl lơh broă bal rơ̆p pơn jăt tai bơyai lơh ală dơ̆ bơto, bơsram tàp nền nòn bè ală gah broă krơi is nàng di pal mờ jơnau kờñ bơtàu tơnguh bơh drà kă bro dê. Ồng Lê Văn Dần yal: “Pơn jăt tai bơto gơs uă ơdŭ nàng ală mpồl lơh broă bal geh tus bal mờ ală broă tờm ngan bơh kă bro phan điện tử bơh AI dê, tơnơ̆ mờ hơ̆, ală ơdŭ bơto nền nòn ai tơl bơta phan in. Tài tơl bơta phan rơ̆p geh ală broă lơh ring bal broă kă bro phan tàm điện tử krơi is. Nàng ală mpồl lơh broă bal gơtùi ơm tàm mpồl lơh broă bal bơh să tờm dê kung gam gơtùi yal mờ tăc phan online bơh ală măi mok pa tŭ do dê. Tàm hơ̆ uă ngan là dong kờl ală mpồl lơh broă bal tàm tiah ngài gơtùi tus bal mờ drà kă bro”.

Ală broă lơh ngan tam gơl sồ bơh ală mpồl lơh broă bal tàm càr Dăk Lăk dê gam pơgồp bal lơh geh bơta ƀuơn tàm broă atbồ, dong kờl tơrmù priă tă, tơnguh bơta kwơ ai ală mpồl lơh broă bal in. Tàm hơ̆ uă ngan là broă ngui măi mok sồ tàm broă yal phan geh lơh gam pờ geh uă bơta niam pa, drà kă bro pa, lơh gơguh bơta kwơ mờ bơ̆t bơtàu măt kă bro phan càr Dăk Lăk dê.