Ală ngai lồi nhai 3, tàm gơl gùng rơndeh lòt mhar Khánh Hoà – Buôn Ma Thuột, gơl lòt gan Bă brê 1148, bơnah brê thôn Ea Rớt, sàh Cư̆ Pui, kơnhoàl Krông Bông rơlao 30 nă cau lơh gùng bal mờ git nđờ jơ̆t nơm phan lơh broă dờng bơh Kông ty CP Tập đoàn Đạt Phương gam mhar lơh. Bi Vũ Đức Hùng, kwang bàng drơng broă lơh tàm kông ty pà git: do là broă lơh XL03 gơwèt Rơndăp bơnah broă sồ 2, mờ 14 kơi sồ lòt gan brê tus tềng mpồng gùng trồm Phượng Hoàng. Mơya tus lồi quý III nam lài, kông ty hơ̆ sồng rơ̆p geh jào ù nàng lơh, lơh tơngai lơh broă gơtìp lơyài di pơgăp 30%. “Kông ty gam lơh bàr đah mpồng Măt tơngai mut mờ mpồng Măt tơngai lik. Đah mpồng Măt tơngai mut neh lơh bơh nhai 9 nam 2024, mìng lơh rơbàng mờ tờ trồm; đah Măt tơngai lik mìng rơ̆p lơh bơh nhai 2 nam 2025 mờ mìng rơ̆p geh 2, 3%, broă lơh mìng là tờ bồr ù. Tŭ do kung gam gơtìp kal ke rơlao 3 lồ ù brê hòn is tàm bơnah bă brê bơtơl ờ hềt geh tam gơl. Bol añ kơ̆p kờñ geh tam gơl mhar nàng lơh gùng ƀuơn”.

Rơndăp broă bơnah lơh sồ 2 kờp jơh priă bơcri rơlao 10 rơbô 436 tơmàn đong, jòng mờr 40 kơi sồ, tiah bồ gùng bơh ƀòn drà dờng Ninh Hoà, càr Khánh Hoà, lòt gan ală kơnhoàl Mdrăk, Krông Bông mờ Ea Kar càr Dăk Lăk dê. Do là rơndăp broă lơh bơnah broă lơh gùng geh khà priă bơcri uă ngan, geh Mpồl atbồ Rơndăp broă lơh gùng sồ 6, gơwèt Ƀộ Bơ̆t bơtàu lơh tờm bơcri priă. Mơya, broă lơh tàm do tŭ do neh lơyài bơh 12 tus 27%, jăt mờ tơl broă lơh. Ồng Nguyễn Thanh Tú, Phó kwang lam bồ mpồl đơng lam pơgồp bal Tập đoàn Đèo Cả pà git, mpồl pơgồp bal lơh gam lơh broă lơh XL01, jòng 11 kơi sồ, tàm hơ̆ geh gùng trồm Phượng Hoàng jòng 1,7 kơi sồ, 10 nơm rơbàng kấp 1 mờ 5,6 kơi sồ gùng… kờp jơh priă lơh 3 rơbô 83 tơmàn đong. Tàm khà 4 mpồng gùng trồm pal lơh, mpồng gùng trồm đah kiao càr Khánh Hoà kung gam ờ hềt gơtùi pờ tài gơkòl 1,9 lồ ù brê ờ hềt geh tam gơl. Bơdìh hơ̆ tai, bơnah chàr đah ma gùng trồm đah măt tơngai mŭt càr Dăk Lăk kung gam gơkòl ù brê lơh sa bơh dùl hìu làng bol dê mờ hềt geh bơsong. “Đah càr Dăk Lăk tŭ do bơnah bă ù rơlao 6 sào ờ hềt geh kĭ gùng dà broă toh wơl mờ geh gùng dà tơm ntrờn ai làng bol in. làng bol sồr cau lơh gùng pal ơm ing lơh gùng tàm bơnah bă ù do. Đah càr Khánh Hoà, bol añ rơ̆p pờ gùng trồm đah ma tàm ngai 15 nhai 3 lài do; đah kiao kung gam kơ̆p gùng dà broă lơh, kĭ ai ngui phan bơna lồi dŭt, pơrlòng blơi gơs hơ̆ sồng dờp mờ jào ù tiah, hơ̆ sồng ai măi mok, phan lơh broă tus nàng lơh gùng”.

Tàm 3 rơndăp bơnah broă lơh gùng rơndeh lòt mhar Khánh Hoà – Buôn Ma Thuột, rơndăp broă lơh gùng lòt gan càr Dăk Lăk geh lơh niam ngan mơya kung gơtìp uă bơta gơkòl bè tơm ntrờn ù tiah, lŭ lơh gùng, ù nàng dă tàm gùng, gùng che ồs đèng làng bol bal mờ broă tuh ù gơlik bơh tàm broă lơh gùng. Ồng Nguyễn Thiên Văn, Phó Củ tịc Anih duh broă Làng bol càr Dăk Lăk pà git, càr gam sồr lơh pràn broă bơsong ală bơta gơkòl gơrềng tus ù dăp gùng, lŭ lơh gùng mờ gùng che ồs đèng; sồr kấp kơnhoàl, sàh mhar cri bơyai, lam ală hìu làng bol jào ù lơh gùng: “Bol añ neh sồr Mpồl atbồ rơndăp broă lơh gùng, cau lơh gùng, Anih duh broă làng bol kơnhoàl Krông Păc mờ ală sờh, gah lơh broă tàm càr lơh mhar broă ai ù nàng cau lơh gùng in lơh broă. Bè ờ tơl lŭ lơh gùng, càr neh ring bal mờ Mpồl atbồ càr Dăk Lăk mờ ală cau lơh gùng, bal mờ Mpồl atbồ rơndăp broă lơh sồ 6, tam gơl lŭ bơh Tơndăp bơnah broă sồ 2 tus Rơndăp bơnah broă sồ 3 nàng lơh mhar broă lơh. Bè gùng che ồs đèng làng bol, Anih duh broă làng bol kơnhoàl neh sồr ală sàh lơh mhar, nàng dong kờl làng bol mờ ai tơl bơta ƀuơn nàng cau lơh gùng in lơh broă”.

Tus tŭ do, rơndăp bơnah broă sồ 1 geh càr Khánh Hoà lơh tờm bơcri priă neh jào mờr 93% ù tiah, mơya khà lơh mìng rơ̆p geh lơh 49%, lơyài 8,3% pơn drờm mờ broă rơndăp lơh geh ai. Rơndăp broă lơh gùng tŭ do gơtìp gơkòl tàm 15 tiah gơkòl tơm ntrờn ù tiah; broă ntrờn phan lơh broă bè ală gùng che ồs đèng kao thế, kăp viễn thông, đèng sòl àng… kung gam gơtìp kal ke.

Ồng Đinh Văn Thiệu, Phó Củ tịc Anih duh broă làng bol càr Khánh Hoà đơs loh ală bơta gơkòl pal geh bơsong tàm rơndăp broă lơh gùng do: “Tàm khà 42 nă cau, tàm hơ̆ geh 18 nă cau pal ai ù lơh hìu pa. Tŭ do, ù lơh hìu pa gơwèt tiah lơh ƀòn pa neh geh càr Khánh Hoà lơh mờ ai tơl ală cau tus ơm kis in. Mìng is bè 24 hìu ờ ai ù lơh hìu ơm kis, càr rơ̆p bơsong jơh lài mờ ngai 30 nhai 3. Di lah geh ală hìu ờ lơh jăt gùng dà broă tơm ntrờn ù tiah, rơ̆p bơyai lơh rồn bơklơn di jăt mờ jơnau geh ai, tài ờ gam geh broă lơi ndai tai”.

Tus tŭ do, broă lơh gùng rơndeh lòt mhar Khánh Hoà – Buôn Ma Thuột neh lơh mờr 2 nam, ndrờm mờ nggùl tơngai geh ai lơh broă lơh gùng do in. Mơya uă “tiah gơkòl” bơh ngai sơnrờp tàm rơndăp broă lơh gùng do kung gam gơtìp. Do là bơta gơkòl uă ngan gơwèt mờ jơnau kờñ nàng lơh gơs gùng do tàm lồi nam 2026 mờ ai ngui tàm bồ nam 2027 mờ Thủ tướng Cíñ phủ neh sồr.