72 sơnam rài kis, 53 sơnam Đảng, mò Nguyễn Thị Hồng, ơm tàm ƀòn drà dềt Quảng Phú, kơnhoàl Cư M’gar, càr Dăk Lăk kung gam bềng bơta jơh nùs jơh tồr mờ broă lơh mpồl bơtiàn. Là Củ tịc Mpồl cau jàm kờñ gơboh Dà lơgar kơnhoàl Cư M’gar, mò sùm pơnđơl pràn lơh ngan tàm tơrbŏ sền gròi rài kis mờ gơnoar kwơ ai cau tàm mpồl in. Gờñ tus bal broă lơh kăc màng tàm tiah tam lơh Đạt Lý 2 (hơ̆ là thôn 1, sàh Hòa Thuận, ƀòn dờng Buôn Ma Thuột, càr Dăk Lăk tŭ do dê) nam 19 sơnam, mò neh chờ hờp ngan geh tơmut tàm mpồl Đảng Kộng sản Việt Nam. Bơh ală dơ̆ gơtìp bol sò tơm kŭp krơ̆, lơh pờng, mò kung gam gàr kơ̆ bơta pin dờn mờ kăc màng. Tơnơ̆ ngai ring lơngai, mò pơn jat tai tus bal broă lơh tàm kơnhoàl Cư M’gar. Mò Nguyễn Thị Hồng đơs: “Tàm rài tam lơh là mat tàm toh mờ mat mờ cau sò tờm, khin cha kis, khin cha chơ̆t mờ khin cha chơ̆t phi să. Añ tus bal kăc màng den kung gŏ ală cau ling he dê chơ̆t phi să tài lơngăp lơngai is, khat gơboh ngai do dê. Hơ̆ kung là jơnau tờm, là bơta gơn kơnờm nàng ai añ in pơnđơl pràn lơh ngan, pơn jat tai gàr tơl jơnau sơntơm să mờ Dà lơgar, mờ Đảng, mờ Làng bol dê. Tơnơ̆ tơngai ring lơngai añ gŏ he kung là cau bơtoah ngan gam kis, gam geh ală bơta nàng he in tă pơgồp dà kơl hề ai ƀòn lơgar, Dà lơgar in”.

Ai gơwèt mờ Thượng tá Lữ Thị Anh Đào, Phó Lam bồ cơldŭ lơh broă PA02, Kwang àng càr Dăk Lăk, sùm mờr 30 nam lơh broă tàm gah dră mờ cau pơrlơ̆ dră, sùm gĭt wă ngan bồ tơngoh kăc màng mờ bồ tơngoh bơh cau Đảng viên dê, lơh sir niam ngan ală kơnòl broă geh jàu. Thượng tá Lữ Thị Anh Đào, đơs:“Geh ală rơnàng lòt lài bơto bơtê, tề lam, bal mờ ală bơta gĭt wă bơsram tàm hìu bơsram, sền gĭt tàm tŭ bơsram sră, añ gŏ ală cau chơ̆t phi să roh rui, tă pơgồp dà kơl hề bơh ală rơnàng bèp bi dê, den ală bơta kal ke, bòl glar mờ añ gam lòt gan ờ sơ̆p dô ết lơi. Den tàng bè hơ̆ là añ lơh is broă lơh bồ tơngoh ai să tờm he dê, ală bơta lơi mờ cau ling bal, oh mi lơh broă bal lơh geh den he ngan ngồn he pal lơh geh nàng he in pal pơnđơl pràn lơh ngan mờ he pal jơh nùs jơh tồr ngan, geh kơnòl den he rơ̆p lơh geh”.

Là ùr kwang bàng jơi bơtiàn dồ ết năc cau, tàm sơnam 39, bi H’ Cir Mlô, ơm tàm sàh Ea Đar, kơnhoàl Ea Kar neh geh 14 nam sơnam Đảng. Neh lơh Ƀí thư Ci ƀộ ƀòn Sứk, sàh Ea Đar, den at gơnoar broă Củ tịc Ală mpồl cau ùr xã Ea Đar, tàm gơnoar broă lơi, bi kung jơh nùs lơh jat niam gơnoar broă lơh rbàng tàm tơrbŏ đah Đảng mờ làng bol. Dong làng bol đơs geh nùs nhơm, bơta kơ̆p kờñ di pal mờ dờp geh bơta đơs wơl, hơ di pal bơh kwang đơng lam bồ, bi H’ Cir Mlô neh pơgồp bơnah tơnguh uă nùs nhơm pin dờn, bơta pin dờn bơh làng bol dê gơwèt mờ Đảng mờ gơnoar atbồ: “Tơl nùs nhơm, tơl bơta chài, gàr niam geh jơnau sồr bơh dùl nă kwang bàng tàm rài pa dê, bol he pal mut gơ rờm bal, să tờm bol he pal geh kơnòl lài ngan. Añ pin dờn tàm ală gùng dà broă lơh, ală sră nggal, Jơnau lơh nền tàm pơrjum, Jơnau sồr bơh Đảng mờ Dà lơgar dê. Den tàng broă tàm jàu, tàm pơdar añ tàm tiah at gơnoar broă lơi, añ sùm lơh ngan jơh nùs nàng lơh sir jak ngan kơnòl broă geh jàu”.

Mờ nùs nhơm geh kơnòl broă, nùs nhơm bồ tơngoh sơr lèt gan kal ke mờ jơh nùs tơryang tơryồng mờ Đảng, mờ làng bol, ală ùr đảng viên jơh nùs jơh tồr dòn song tàm càr Dăk Lăk gam lơh gơ kờñ ai rơnàng kơnòm să in đòm jat bal, bơt bơtàu ƀòn lơgar ngai sơlơ pas niam.