Anih cribơyai là gah tìp mat tơm boh bơr pah nam đah gơnoar atbồ mờ mpồl bơtiàn mpồl lơh sa kă bro nàng kờñ cih dờp ală bơta gơ kòl bơh ngan ngồn mờ lơh sir gùng dà broă lơh. Nam do, anih cribơyai tam gơl tơngume tờm bơh tă bơsong kal ke gơs bal mờ gơp bơt bơtàu gùng dà, broă lơh, lơh jat ală Jơnau lơh nền tàm pơrjum Bôh Chính trị dê bè bơtàu tơngoh jak chài, măi mok, tam gơl pa bơceh lơh, tam gơl sồ mờ bơtàu tơnguh lơh sa làng bol dê lơh is.

Ồng Đặng Hồng Anh - Chủ tịch Mpồl cau kă bro kơnòm să Việt Nam pà git, mờ 34 anih cribơyai kâp hơ đơm bal mờ anih cribơyai kâp dờng tìp mat tơm boh bơr mờ Chính phủ, jơnau kờñ lơh geh là tơrgùm wil tơl ală jơnau đơs, jơnau dan bơh ƀòn lơgar nàng bơsong jat tơl kâp geh gơnoar, lơh geh bơta ƀuơn rlau ai mpồl lơh sa kă bro in bơtàu tơnguh: “Tơl càr, ƀòn dờng den bol hi ndrờm bal mờ ală cau geh jơnau git wă jrô, cau jak chài bal mờ càr rơp mblàng lơh loh, tơrgùm nàng tam pà bal jơnau yal tơnggit; iat jơnau đơs bơh mpồl bơtiàn cau kă bro, mpồl lơh sa kă bro mờ tơrgùm jơnau đơs, jơnau dan pơyua tus càr. Ai ală broă gơ wèt gơnăp gơnoar bơh bộ, mpồl, gah broă lơh dà lơgar mờ Chính phủ dê den bol hi rơp tơrgùm tơmut tàm jơnau đơs, jơnau dan nàng dong mpồl bơtiàn cau kă bro, mpồl lơh sa kă bro bơtàu tơnguh niam ngan rlau jơh tàm tŭ tơngai pa”. 

Tàm anih cribơyai, ală cau ala mat tơrgùm cribơyai uă broă gam ai tơlik gơ wèt mờ càr Dăk Lăk bè lơh sir anih bơcri priă nàng hòi jà tă pơgồp priă jền lam lơh rơndap ù tiah càr; lơh tiah tờm đơng lam pơgồp bal ală mpồl lơh gơlik phan bơh suơn sre bơh măi mok yal jơnau tơnggit; chồl tơnguh tam gơl sồ, tam gơl pa bơceh lơh mờ bơtàu tơnguh ală mpồl lơh sa kă bro sơn đờm mut lơh broă.

Bơnah tìp mat tơm boh bơr pờ lời uă tŭ jơ nàng mpồl lơh sa kă bro cribơyai tơn mờ đơng lam càr mờ ală cau geh jơnau git wă jrô bè 4 mpồl broă tờm geh tam gơl wơl sră pơ àr gơnoar atbồ, ngui ù tiah mờ priă bơcri, tam gơl sồ - tam gơl pa bơceh lơh bal mờ broă lơh rề ơnàng drà kă bro mờ bơtaù tơnguh cau lơh broă geh bơta niam uă.

Tàm hơ̆, ngui ù tiah mờ sră pơ àr bơcri priă lơh là tơngume geh uă mpồl lơh sa kă bro sền gròi. Jat ồng Nguyễn Huỳnh Vĩnh Huy - Chủ tịch Mpồl cau kă bro kơnòm să càr Dăk Lăk, tơnơ̆ tơrgùm dùl, càr geh bơta ƀuơn bơtàu tơnguh dờng rlau mơya mpồl lơh sa kă bro kung gam gơtìp kal ke tŭ ngui ù tài gùng dà, broă lơh ờ hềt lơh sir: “Ală mpồl lơh sa kă bro tŭ do geh bàr pe rơndap broă lơh gam kờñ geh ù nàng lam lơh. Tơnơ̆ tŭ tơrgùm dùl đah 2 càr den bă ù gam uă mơya tŭ do ờ hềt geh gùng dà dipal dong mpồl lơh sa kă bro in ngui, nàng gơtùi ngui ù bơh ală tiah hơ̆. Den tàng kung gam kơp Chính phủ, dà lơgar geh ală gùng dà broă lơh pa nàng dong kờl ală mpồl lơh sa kă bro”.

Ală jơnau đơs bơh mpồl lơh sa kă bro dê neh geh đơng lam càr mờ ală cau geh jơnau git wă jrô cribơyai, lơh loh tơn tàm anih cribơyai. Ală tơngume sơrlèt gơnăp gơnoar kâp hơ đơm geh Mpồl bơyai lơh tơrgùm wơl nàng yal tus ală ƀộ, gah broă lơh dà lơgar mờ Chính phủ sền swì, bơsong.

Jat ồng Đỗ Hữu Huy - Chủ tịch Anih duh broă Làng bol càr Dăk Lăk, tơnơ̆ tơrgùm dùl, càr gam đal git ù tiah bơtàu tơnguh pa mờ 3 tiah bơtàu tơnguh, 3 gùng kềng lơh sa mờ 2 tiah tờm gơn kơnờm; lơh ngan khà gơguh GRDP kờp bal tơngai bơh nam 2026 tus nam 2030 geh bơh 11% rlau hơđang, GRDP kờp bal dùl nă cau tus nam 2030 geh rlau 153 tơlak đong: “Bol hi kơp kờñ ală mpồl lơh sa kă bro, cau kă bro, ngan là mpồl lơh sa kă bro kơnòm să lòt bal mờ càr. Dăk Lăk tŭ do ờ mìng geh phan lơh gơs bơh suơn sre niam, tiah tam phan dờng, bơta niam chài krơi is mờ neh geh ù tiah bơtàu tơnguh pa, ơnàng. Nàng brồ guh rlau tai, kơ̆ kơljap rlau tai, bol he kờñ geh tai măi mok, đơng lam broă tơl bơta niam, priă bơcri mờ bơta tề lam bơh ală mpồl lơh sa kă bro lam lài dê nàng lơh gơlik bơta pràn chồl tơnguh bơtàu tơnguh pa”.

Tàm tơngume broă lơh, Anih duh broă Làng bol càr Dăk Lăk mờ Mpồl cau kă bro kơnòm să Việt Nam neh kĭ sră cih kah lơh broă bal bè hòi jà bơcri priă, dong kờl mpồl lơh sa kă bro mờ bơtàu tơnguh mpồl cau kă bro tàm càr.