Jăt jơnau yal, nhai 1 nam 2026, broă lơh sa mpồl bơtiàn tàm càr lơh geh kơl jăp, uă gah broă geh sùm gơguh lơh sa. Tàm gah lơh sa suơn sre, lơh sa kàl prang mờ kàl Hàm geh lơh di mờ tơngai geh ai.

Lơh sa mờ măi mok geh sùm khà gơguh mờ khà lơh sa mờ măi mok gơguh mờr 16% pơn drờm mờ tŭ do nam lài. Broă lơh lòt nhơl sơn đờm niam tơn bơh tàm bồ nam. Ồng Tạ Anh Tuấn, Củ tịc Anih duh broă Làng bol càr Dăk Lăk đơs nền jơnau kờñ ală gah broă, ală tiah pal lơh broă pràn, loh broă, loh tơngai lơh bơh tàm ală nhai bồ nam, quý sơnrờp tàm nam 2026; sền broă bơcri priă dà lơgar là kơnòl cíñ trị tờm, pơgồp bal mờ kơnòl bơh cau lam bồ mờ cồng nha lơh jăt. Tềng đăp măt, pal tơrgùm uă ngan ai broă drơng gàr Satềp nam pa Ơseh in, gàr niam tơl ală làng bol ndrờm geh wă rò Satềp lơngăp lơngai, hờm ram.