Tơnơ̆ mờ dơ̆ wă rò mùl màl tơn, Tổng Ƀí thư ồng Tô Lâm neh pơrjum bơyai mờ Tổng Ƀí thư, Củ tịc lơgar Lào ồng Thongloun Sisoulith. Tổng Ƀí thư ồng Tô Lâm mờ Tổng Ƀí thư, Củ tịc lơgar Lào ồng Thongloun Sisoulith tơlik nùs nhơm chờ hờp tềng đăp mờ ală broă bơtàu tơnguh jrô ơnàng, geh cồng nha mờ mùl màl tàm bơta git gơ̆p lơh broă bal đah lơgar Việt Nam mờ lơgar Lào tàm tơngai do.

Tàm tơngu me ală gùng dà broă lơh dờng mờ wèt nùs nhơm jŏ jòng neh geh bàr gah ring bal, bàr kwang đơng lam bồ ring bal bơta tờm tơrgùmlơh mơ tàm tơngai lơh broă do. Jăt mờ hơ̆, bàr gah pơn jăt tai tơnguh broă tam gơl bal jơnau yal tơngit, tam pà bal broă lơh mờng chài tàm broă lơh jăt Jơnau lơh nền tàm Pơrjum dờng bơh tơl Đảng dê. Bal mờ hơ̆, lơh pràn broă pơgồp bal bàr gah lơh sa, ai lài broă tơrgùm bơta pràn, pơgồp bal nền nòn mờ lơh jăt pràn ală rơndăp broă lơh kwơ màng, ai geh bơta pràn pa ai broă pơgồp bal lơh sa, kă bro phan, bơcri priă mờ bơtàu tơnguh tiah, lơh ngan nàng geh khà kă bro phan đah bàr gah geh 10 tơmàn Dolar Mỹ tàm tơngai tus.