Tềng đăp bơta gơbàn bơh trồ tiah dê ngai sơlơ ờ niam ngan, Anih duh broă Làng bol càr Dăk Lăk pa ai lơh jăt Jơnau sồr pal lơh sồr ală sờh, mpồl, gah mờ ƀòn lơgar rơcăng lài rơcăng, drơng mìu càl rbŭt dờng, dà lìu, mìu dờng, tơrlah tơrlơm ù, ngơr bam jrô dà ală nhai lồi nam; mơkung rơcăng broă rơndăp lơh drơng wơl mờ trồ prang dờng, ờ tơl dà, dà hăng mŭt tàm ù gờl mờ ồs sa brê kàl prang nam 2026 – 2027.

Càr sồr tam gơl pràn bơh drơng wơl ờ rơcăng tus rơcăng lài rơcăng kơryan, lơh jăt niam jơnau đơs “4 dùl bă tiah tơn”; kờp sền wơl ală kơnhoàl ù tiah pơhìn dà lìu dà cò, tơrlah tơrlơm, ngơr bam jrô, khà hìu kờñ pal ntrờn, anih pleh ơm mờ mpồl cau, măy mŏk phan ngui rơndeh rơndồ digơlan geh hòi tơrgùm. Ồng Đỗ Hữu Huy, Chủ tịch Anih duh broă Làng bol càr Dăk Lăk đơs sùm: Jơnau đơs nam do là rơcăng là tờm, rơcăng lài bơh gờñ bơh ngài, ờ gŏ ơm kơ̆p geh dà lìu halà mìu hơ̆ sồng lam lơh. Is ồn pal kờp sền wơl mơ tơn ală anih neh lòt sền geh pơhìn tơrlah, ngơr bam jrô dà, dan lơh bơsong mơ tơn ală anih sơbơng roh gơrềng tus màng kis làng bol dê.