Tàm anih ơhò lơh ka Phú Lao, sơnah ƀòn Hoà Hiệp, lài mờ tŭ ơhò lik lòt tàm dà lềng, ală bơta bè sră nggal, phan jăt sền gùng lòt, jơnau cih lơh mờ tiah lơh ka geh sền gròi, nting bơto. Ală cau ờ hềt tơl sră nggal ờ hềt geh ai lòt. Ồng Phan Thanh Lực, drơng broă tàm anih ơhò lơh ka Phúc Lạc pà git, bal mờ broă sền gròi bơh mpồl lơh broă geh gơnoar, broă mblàng yal sùm dong kờl cau lơh ka wă loh ală jơnau geh ai pal lơh jăt tơn bơh tŭ rơcang lòt tàm dà lềng. “Jơh ală mpồl lơh broă ai làng bol mŭt tàm do nàng pleh mờ bơta 3 ờ. Geh jơnau cih tơl, krơi is là ờ sơgràm tiah dà lềng lơgar bơdìh dê”.

Thiếu tá Lương Công Hậu, Phó Lam bồ Pôs đồng ling sền gàr tiah nhàr lơgar Hoà Hiệp Nam pà git, broă atbồ geh lơh sùm tàm broă ơhò lơh ka lơh broă. Tus tŭ do, tàm tiah do ờ gam geh ơhò lơh ka gơwèt “3 ờ”; ală ơhò neh geh crăp phan jăt sền gùng lòt mờ pal lơh jăt di pal mờ jơnau geh ai tŭ phan do gơtìp ờ niam. “Làng bol lơh ka lơh jăt nền nòn ală jơnau geh ai bè broă rơcang,  kơryan lơh ka IUU. Tŭ do, tàm tiah do ờ gam geh ơhò lơh ka lơi gơwèt “3 ờ”. Ală ơhò lơh ka ndrờm neh geh crăp tơl phan jăt sền gùng lòt mờ lơh jăt nền nòn ală jơnau geh ai bè broă lơh niam wơl tŭ phan do gơtìp ờ niam, nàng gàr di jơnau geh ai tàm adăt boh lam dê”.

Ờ mìng sền gròi tàm anih ơhò ơm, gơnoar atbồ ƀòn lơgar gam ai broă atbồ mpồl ơhò tus tơl ƀòn ơm kis. Tàm ală tiah lài do neh geh tŭ gơtìp tìs mờ broă lơh IUU, ală ƀòn pơgồp bal mờ mpồl lơh broă geh gơnoar nàng atbồ ơhò lơh ka bơh ală mpồl ơhò, plung lơngăp lơngai; cau tờm ơhò geh mblàng yal, cih jơnau hơ bal, tàm hơ̆ sền kwơ mpồl ơhò lơh ka ngừ tàm dà lềng dờng.

Gơwèt mờ ală ơhò ờ tơl sră nggal lơh broă, gơnoar atbồ bơyai lơh jăt sền tàm anih ơm ngai kung bè mang. Tàm sơnah ƀòn Phú Yên, do là tiah geh mpồl ơhò lơh ka ngừ dà lềng dờng lơh broă mìng tàm tiah dà lềng ngài. Ồng Nguyễn Xuân Cảnh, Chủ tịch Anih duh broă Làng bol sơnah ƀòn Phú Yên pà git, broă atbồ mpồl ơhò geh lơh mờ broă pơgồp bal đah gơnoar atbồ, ling sền gàr tiah nhàr lơgar, anih ơhò lơh ka mờ ƀòn ơm kis. “Gơrềng tus kơryan lơh ka IUU, bol añ neh sồr ală mpồl lơh broă gơrềng bal pơgồp bal nền nòn mờ Pôs ling sền gàr tiah nhàr lơgar Đà Rằng kung bè Anih ơhò lơh ka ơm nàng lơh niam broă do; mờ pơgồp bal mờ ƀòn ơm kis nàng atbồ nền nòn mpồl ơhò kung bè ală cau lơh broă tàm ơhò tus bal lòt lơh ka, pah ngai pal sền gròi, kŭp rùp mờ yal di mờ jơnau neh geh ai”.

Bal mờ broă sền gròi, càr Dăk Lăk gam lơh uă broă mblàng yal nàng ală jơnau geh ai kơryan lơh ka IUU tus gơtùi mờ cau lơh ka tơn mờ geh sùm rơlao. Tàm sơnah ƀòn Xuân Đài, kwang bàng pơlam làng bol Pôs ling sền gàr tiah nhàr lơgar Xuân Đài ờ mìng mblàng yal tàm ală dơ̆ pơrjum ƀòn mờ gam tus tơl hìu nàng yal. Thượng úy Nguyễn Văn Liến, Phó Lam bồ Mpồl Lam sồr làng bol Pôs ling sền gàr tiah nhàr lơgar Xuân Đài pà git, tŭ geh uă ơhò lơh ka rê hờ ù gờl, mpồl lơh broă sền gàr tiah nhàr lơgar ngui loa nàng lòt turi pơgồp bal mờ pà ală pang sră tàm ală gơl gùng, tiah ƀòn ơm kis, anih ơhò ơm mờ ală tiah làng bol lơh ka tơrgùm ơm. “Broă lơh “Săp loa Tiah nhàr lơgar” tơnơ̆ mờ tŭ bơyai lơh neh cèng geh uă cồng nha. Mờ broă lơh pờ tơlik jơnau đơs lòt turi tàm ală gơl gùng, tiah ƀòn ơm kis mờ anih ơhò ơm, ală jơnau yal bè rơcang, tam dră mờ lơh phan tàm dà ờ di mờ adăt boh lam geh yal tus nàng làng bol in git, dong kờl làng bol di tŭ git tơn”.

Bơta pal kah ngan là mblàng yal kơryan lơh ka IUU gam rơhờp tam gơl bơh broă lơh bè ờs di jăt mờ jơnau geh ai tus mờ broă lơh ờs mờng lơh jăt niam bơh cau lơh ka dê. Ală jơnau kờñ bè tiah lơh, sră pơ-àr ơhò lơh ka, cau tàm ơhò, jơnau cih tŭ lơh, phan jăt sền gùng lòt ha là yal tŭ lik lòt mờ tŭ rê tềng anih ơhò ơm geh yal wơl sùm, pơgồp bal yal tơn tus mờ tơl dơ̆ lòt tàm dà lềng. Tŭ do, làng bol lơh ka ndrờm git loh mờ lơh jăt nền nòn ală jơnau geh ai tàm broă tras kŭp ka ờ di mờ adăt boh lam IUU. “Bol añ tàm do wă loh jơh bloh, lơh jăt niam tơn. Lơh ka pal di tiah, lòt tàm dà lềng pal geh tơl sră pơ-àr, cau tàm tiah ơhò pal cih măt, kŭp rùp. Tŭ rê là pal yal”.

Kờp tus bồ nhai 9 nam 2026, càr Dăk Lăk geh 2 rơbô 593 nơm ơhò lơh ka bơh 6 thơ̆k rơlao hờ đang, tàm hơ̆ geh 689 nơm ơhò bơh 15 thơ̆k rơlao hờ đang; 100% nơm ơhò lơh ka neh geh tơmŭt jơnau yal tơngit tàm tơngu me broă lơh ka dà lơgar dê. Broă sền gròi ơhò lòt, rê tàm anih ơhò ơm, jòi sền tiah tờm lơh phan tàm dà mờ geh sùm broă tơrbŏ VMS geh tơnguh. Tàm nhai 8 mờ poh bồ nhai 9, càr ờ gơtìp tìs uă bè lơh ka IUU.

Ai jơnau geh ai tàm tol dơ̆ lòt lơh ka tàm dà lềng, tơl nơm ơhò mờ neh gơs jơnau git wă lơh is bơh cau lơh ka dê là gùng dà broă lơh geh cồng nha nàng càr Dăk Lăk bal mờ gùt lơgar gờñ tă sơr “Sră rơmit”, wèt tus broă lơh ka kơl jăp, geh kơnòl.