Ai mờng chài bơh dơ̆ dà tih dà lìu dờng ngan ờ hềt geh bơh lài tàm nhai 11 nam 2025, nam do, broă jòi anih ơm pleh ai làng bol tàm ală tiah thòng lơyah, tiah kuơmàng ƀuơn gơ rềng in geh càr Dăk Lăk sền gròi uă ngan. Tàm ală sàh tiah đah mat tơngai lik càr, 100 nơm hìu pleh dà tih dà lìu mpồl bơtiàn neh ndrờm bè lơh sir jơh, tơl, di tŭ jàu tàm nggùl nhai 9 do. Bal mờ hơ̆, git nđờ jơt nơm hìu pleh dà tih dà lìu jat ală bơta dờng, dềt, broă bơceh lơh krơi is kung geh lơh bơh ală bơnah priă tă pơgồp mpồl bơtiàn dê. Tàm ală tiah ờ geh hìu pleh dà tih dà lìu, làng bol tềm pềr is priă jền nàng lơh rơnđa pleh dà tih dà lìu tàm hìu.

Kòi phe, phan sa pal geh mờ dà hùc nàng rơcang lài tŭ càl rbut dờng dà tih dà lìu gơlik geh kung là broă pal rơcang lài bơh tàm hìu bơnhă tơn. Bơh mùl màl uă cau tàm tŭ dà tih dà lìu mờ tơnơ̆ dà tih dà lìu ờ geh tơl phan sa, dà hùc mờ àu mpha rơ sơh, ồi tơ̆, kơmùng bic nàng ngui tàm dơ̆ dà tih dà lìu nam lài, làng bol neh ai is mờng chài tàm broă lơh rơcang tàm kàl mìu dà tih dà lìu nam do.

Bè đah gơnoar atbồ ƀòn lơgar mờ ală mpồl lơh broă mìng dùl kơnòl, broă lơh rơcang lài drơng mờ trồ tiah lơh aniai neh geh rơcang wil tơl. Bơh lài kàl mìu, Cục atbồ bơ tơt kìng dà mờ rơcang lài drơng trồ tiah lơh aniai (Ƀộ Broă lơh sa suơn sre mờ Tiah ơm kis) pơgồp bal mờ Sờh Broă lơh sa suơn sre mờ Tiah ơm kis càr Dăk Lăk, Anih kơlôi sơnơng phan sa tơl pràn (Ƀộ Lơh sơnơm) pờ ơdŭ bơto pơlam “Tơnguh pràn jak mpồl bơtiàn tàm lam lơh ngan ngồn sền swì bơta trồ tiah lơh aniai mờ gàr tơl phan sa tơl pràn jal mhar” tàm càr Dăk Lăk. Bơh hơ̆, ală cau bơsram là ală cau tàm mpồl dong kờl jal mhar trồ tiah lơh aniai, jơnum lơngăp lơngai rơndap tap sèng ală sàh, sơnah ƀòn… geh pơlam lam lơh ngan ngồn ală phan sền swì bơta pơhìn trồ tiah lơh aniai jat tàm mpồl bơtiàn; đal git ală bơta ƀuơn gơtìp aniai; yal ală broă lơh rơcang lài, drơng wơl di pal mờ bơta geh ngan ƀòn lơgar dê; pơlam broă lơh rơcang mờ gàr phan sa tơl pràn, is ồn là kơnòm dềt mờ cau kra. Ồng Phương Văn Lành, Ƀí thư Đảng ủy sàh Hoà Thịnh - dùl tàm ală sàh tiah tờm dà tih dà lìu đah mat tơngai lik càr Dăk Lăk pà git:

“Sàh kung neh pơgồp bal mờ Cục rơcang lài drơng wơl trồ tiah lơh aniai pờ ơdŭ bơto pơlam bơta git wă, bơta chài bè drơng wơl trồ tiah lơh aniai, drơng mờ mìu dà tih dà lìu làng bol in; mờ kung rơcang lài rơkì, àu pơr đồng ală thôn in nàng rơcang lài drơng wơl. Bơdìh hơ̆ tai, sàh kung neh dờp ală cano mờ bơta pràn măi mok dờng nàng drơng ai broă lơh drơng wơl trồ tiah lơh aniai in tàm tơngai tus”.

Jat ồng Đào Mỹ - Phó Chủ tịch Anih duh broă làng bol càr Dăk Lăk, tŭ do, càr gam jal mhar sền nền wơl, yal broă rơndap lơh drơng mờ trồ tiah lơh aniai tàm ală nhai lồi nam 2026. Tàm ală sàh, tơrgùm lơh kơ̆ jat jơnau đơs “ 4 tơn tàm dùl anih”, tơnguh pràn jak kâp sàh; ai phan bơna, rơndeh rơndồ, măi mok mờ phan ngui sa pal geh tàm tiah geh jơnau pơhìn uă, gàr gơtùi tus mờ ngui mơ tơn. Bal mờ hơ̆, Anih duh broă Làng bol càr Dăk Lăk sồr ală sàh tơng gơs mpồl pơgồp bal, dong kờl jat tiah dà dờng, tiah đah đơm ală tơnau dơng dà, tiah kềng gah dà lềng mờ ală tiah geh jơnau pơhìn uă. Mpồl duh broă sùm dong kờl jal mhar bơh càr tus sàh kung tơrgùm pơlam tàp, crăp rơcang dong kờl jal mhar tàm ală broă gơlik geh jal mhar:

“Tŭ do, bol hi kung gam pơn jat tai pồ tơl Mpồl đơng lam rơcang gàr làng bol tàm kâp hơ đơm nàng gơ dờp mờ broă să tờm is drơng wơl mờ ală broă gơlik geh tàm ƀòn lơgar”.