Nam 2026, broă lơh drơng mờ trồ tiah lơh aniai geh càr Dăk Lăk sơlơ tơnguh tai jat gùng dà rcang lài rlau, mờ mờr 100 trạm was mìu ờs ngui, 11 trạm yal tơngĭt lài dà tih dà lìu is; 100% sàh, sơnah ƀòn tơngơs mpồl cau lam lài rcang lài drơng mờ trồ tiah lơh aniai mờ rlau 11 rơbô nă cau. Ngan ngồn kung sồr bàr pe broă lơh kờñ pal pơn jat tai bơsong, tàm hơ̆ geh broă pơgồp bal, tam pà bal jơnau yal tàm broă lơh mut ngui tơnau dơng dà mờ ală tơnau dơng dà tŭ gơlik geh mìu dờng dà tih dà lìu uă. Do là jơnau bơsram geh càr Dăk Lăk sền gròi tơnơ̆ dơ̆ dà tih dà lìu kah yau nhai 11 nam lài.

Đơs tàm pơrjum, ồng Lương Nguyễn Minh Triết- Bí thư Tỉñ ủy càr Dăk Lăk sồr pal gàr niam tàm yal tơngĭt jơnau sùm mờ càr Gia Lai bè khà mìu, dà tih mờ mut ngui ală tơnau dơng dà bơh bồ tô dà, mờ jơnau tơngkah lài pal tus mờ làng bol lài mờ tŭ yuh dà tih. Bơh bồ nam tus tŭ do, trồ tiah lơh aniai tàm ù tiah càr Dăk Lăk dê neh lơh 2 nă cau chơ̆t, 109 nơm hìu gơtìp ờ diơng, hoàc huơr rlau 2 tơmàn 800 tơlak đong.