100 nơm hìu pơrjum mpồl bơtiàn pơgồp bal mờ rcang pleh dà tih dà lìu geh lam lơh tàm 27 sàh, sơnah ƀòn, kờp jơh priă bơcri lơh rlau 170 tơmàn đong bơh kes priă càr Dăk Lăk dê. Rơndăp broă lơh sơnđờm mut lơh ngai 27/6/2026. Ală broă lơh bơt bơtàu geh mòn lơh 2 cờn, mờ 3 rùp mòn lơh di pal mờ bơta niam chài bơh tơl tiah dê, ơnàng kờp bal 300 thơk vuông tơl nơm hìu. Tus tŭ do, jơh ală broă lơh neh lơh sir mờ gam tàm jàu ai mut ngui. Tus bal dơ̆ sơnđờm ai mut ơm, ồng Đặng Kim Hùng, ơm tàm thôn Ân Niên, pà gĭt, broă geh tai hìu pleh dà tih dà lìu ai làng bol in rcang lài tŭ trồ tiah lơh aniai gơlik geh:

“Bàr pe hìu bơnhă hìu lơyah bè hìu pa do làng bol kal ke ngan. Kơnờm Dà lơgar dong kờl lơh hìu ơm pa drơng mờ mìu dờng dà tih dà lìu bè do là làng bol chờ hờp, chờ hờñ ngan”.

Nàng broă lơh bơt bơtàu geh lơh di tiah, ƀuơn ai làng bol in ngui, uă hìu bơnhă neh pà is ù. Ồng Nguyễn Liễm, ơm tàm thôn Hiệp Đồng, sàh Hòa Xuân, neh pà is 450 thơk vuông ù bơh hìu bơnhă dê nàng lơh hìu pơrjum mpồl bơtiàn pơgồp bal mờ hìu pleh dà tih dà lìu, pà gĭt:

 “Tŭ do hìu kơ̆ kơnhăp, jơnhoa rlau 1 thơk pơn drờm mờ dơ̆ dà tih dà lìu pa do, den tàng làng bol chờ hờp ngan, dilah dà tih dà lìu halà mìu dờng gơlik geh den tơrgùm tàm hơ̆ jơh lơm. Đơs bal tàm hơ̆ lơngăp lơngai ngan”.

Ồng Nguyễn Thiên Văn, Phó Chủ tịch Anih duh broă Làng bol càr Dăk Lăk đơs nền, ală broă lơh mơlà drơng broă pơrjum mpồl bơtiàn, mơlà tiah pleh dà tih dà lìu lơngăp lơngai tŭ trồ tiah lơh aniai gơlik geh. Den tàng, ală sàh, sơnah ƀòn kờñ pal atbồ, lơh niam wơl, ngui geh cồng nha; kờp sền ală bơta bè ồs đèng, dà, jơnau yal tơngĭt nàng crăp rcang ngui lơh tiah ntrờn làng bol tŭ geh trồ tiah lơh aniai.

Ồng Nguyễn Thiên Văn sồr ală Sờh, gah mờ ală sàh, sơnah ƀòn sền sơwì broă lơh tơngai dơ̆ 1 Rơndăp broă lơh  bơcri priă lơh hìu pơrjum mpồl bơtiàn pơgồp bal mờ rcang lài pleh dà tih dà lìu tàm thôn, ƀòn, làng bol tiah drà. Bơh hơ̆, kơlôi sơnơng rề ơnàng tàm ală tiah sùm kong gơrềng bơh mìu dờng dà tih dà lìu, tơrlah ù.

 “Lài ngan là drơng jơnau kờñ pơrjum niam chài mpồl bơtiàn, ală broă lơh kwơ màng bơh thôn, ƀòn, làng bol tiah drà dê. Is ồn tàm broă lơh rcang lài drơng mờ trồ tiah lơh aniai pơgồp bal mờ bơt bơtàu broă lơh 4 dùl bă tiah, den tàng tiah do pal kờp sền ală bơta drơng broă, ồs đèng, dà, jơnau yal tơngĭt nàng crăp rcang lơh tiah ntrờn, pleh lơngăp lơngai ai làng bol in tŭ geh jơnau sồr halà tŭ geh trồ tiah lơh aniai gơlik geh”.