Rơndăp broă bơcri priă lơh gùng rơndeh ồs Lào Cai – Hà Nội – Hải Phòng geh tiah sơnrờp là tiah tơrbŏ bal gan nhàr lơgar đah anih rơndeh ồs ơm Lào Cai mờ anih rơndeh ồs ơm Hà Khẩu Bắc, lơgar Lo, anih lồi dŭt tàm tiah anih plung ơhò ơm Lạch Huyện, ƀòn dờng Hải Phòng. Mìng gơl gùng rơndeh ồs do là 391 kơi sồ mờ 3 gơl gùng ndai di pơgăp 28 kơi sồ.

Rơndăp broă lơh gùng rơndeh ồs do lòt gan 9 càr, ƀòn dờng, tàm hơ̆ geh: Lào Cai, Yên Bái, Phú Thọ, Vĩnh Phúc, Hà Nội, Bắc Ninh, Hưng Yên, Hải Dương mờ Hải Phòng. Kờp jơh priă bơcri lơh di pơgăp 203 rơbô 230 tơmàn đong, mờ broă bơcri priă bơh dà lơgar dê. Lơh ngan tus nam 2030 lơh gơs rơndăp broă lơh gùng rơndeh ồs do. Tàm pơrjum, Củ tịc Quốk hội ồng Trần Thanh Mẫn ring bal mờ broă pal geh gùng dà bơcri priă lơh gùng rơndeh ồs Lào Cai - Hà Nội - Hải Phòng. Củ tịc Quốk hội sồr tơnkah tơrgùm lơh loh gùng dà broă lơh, bơta dờng gùng bal mờ broă bơcri priă. Sồr sền wơl nền nòn, rơwah gùng dà broă lơh gơl gùng niam ngan nàng tơl niam broă tơrbŏ bal bơh Rơndăp broă dê bal mờ mpồl gùng rơndeh ồs dà lơgar, gùng rơndeh ồs ƀòn drà, gùng rơndeh ndai; tơrmù uă ngan lòt gan ƀòn ơm kis.