Tàm dơ̆ wă, ồng Lê Tiến Châu đơs sùm bè bơta gĭt gơ̆p bơh yau, jơh nùs ngan, rềp mềr jŏ rài đah 2 lơgar Việt Nam mờ Lào dê. Gơwèt mờ ƀòn dờng Hải Phòng, bơta gĭt gơ̆p đah ƀòn dờng mờ 2 càr Viêng Chăn mờ Oudomxay tàm ală nam pa do lơh geh uă cồng nha niam bơnĕ tàm ală gah broă bơt bơtàu Đảng, gơnoar atbồ, bơto bơtê mờ bơsram, gah lơh sơnơm, lòt nhơl, lơh broă bal bơcri priă, kă bro phan.

Ồng Bounthong Chitmany jờng bơta gĭt gơ̆p lơh broă bal, lơh oh mi đah ƀòn dờng Hải Phòng mờ 2 càr Viêng Chăn mờ Oudomxay lơgar Lào; ưn ngài bơta dong kờl bơh Hải Phòng dê tàm broă bơto bơtê cau bơsram dờng lơgar Lào tàm ală hìu bơsram Đại họk mờ kơ̆p kờñ ƀòn dờng Hải Phòng pơn jat tai dong kờl bơto bơtê mpồl cau lơh broă jak ai lơgar Lào in mờ sơlơ tơnguh tai bơta lơh broă bal bơtàu tơnguh tơl làm đah 2 gah.