Jat ală jơnau neh lơh nền, bàr càr rơp tơmut bal gơ gơs càr pa geh mat sơnđan là Gia Lai, mờ tiah tờm cíñ trị - sră pơ àr gơnoar atbồ lơh tàm ƀòn dờng Quy Nhơn. Càr Gia Lai pa geh bă ù ơnàng rlau 21 rbô 576 kơi sồ vuông, khà kờp làng bol rlau 3 tơlak 580 rbô nă cau mờ 135 mpồl lơh broă sră pơ àr gơnoar atbồ kâp sàh. Tàm pơrjum, ală gah ring bal jơnau pal jat bè rơndap tap sèng mpồl cau lơh broă sră pơ àr gơnoar atbồ, jàu kơnòl kwang bàng in nàng kờñ đơng lam geh cồng nha tơnơ̆ tŭ tơmut bal, lơh gơlik ù tiah bơtàu tơnguh pa.

Ƀí thư Tỉñ ủy càr Bình Định ồng Hồ Quốc Dũng đơs nền: Broă rơndap lơh mpồl cau lơh broă sră pơ àr gơnoar atbồ mờ rơndap kwang bàng lơh broă pal geh kờp dŭ nền nòn, gàr niam cồng nha. Ƀí thư Tỉñ ủy càr Gia Lai ồng Hồ Văn Niên pà git, ală jơnau neh lơh nền neh dờp geh bơta ring bal uă bơh dà lơgar, gơnoar atbồ ală kâp tus ală mpồl lơh broă cíñ trị - mpồl bơtiàn. Mpồl duh broă làng bol 2 càr kung neh geh jơnau lơh nền tàm pơrjum ring bal mờ jơnau sồr do.