58 hìu bơnhă kwang àng geh pơn rơ jak geh jờng rơ, ala mat ai git nđờ rhiang hìu bơnhă tàm jơh gùt mpồl Kwang àng làng bol. Tơl hìu bơnhă geh dùl rài kis, dùl jơnau yal krơi is, mơya ndrờm geh bơta ndrờm bal là bơta phi să, tam pà bal mờ gơ gơs là cau dong kờl bơh ngkời kơ̆ kơljap ngan nàng kwang bàng, cau ling kwang àng sơrlèt gan kal ke, lơh gơs niam kơnòl broă.

Pơn rơ bè hìu bơnhă Trung tá Cù Thị Thu Hà - Cơldŭ cảnh sát lùp khàu cau tìs bè ma tuý, Kwang àng càr Phú Thọ. Đah ngkời cau ùr đơng lam là bơklau tŭ lơi kung rơcang àñ ơnòng broă hìu, gơ gơs là anih kơldìng ring lơngai nàng pơ ùr in iang nùs lơh broă. Bi Nguyễn Minh Luân - Bơklau Trung tá Cù Thị Thu Hà dê yal:

“Bơta krơi is gah cảnh sát lùp khàu cau tìs bè ma tuý dê là ngòt rơngơt ngan, bòl glar ngan. Geh ală ngai pơ ùr añ lòt lơh broă bơh gờñ ngan, tus jrô bơnang kung ờ hềt rê sơl, hòi điện thoại den ờ gơtùi. Ală tŭ bè hơ̆, añ mình git kơp gơn mờ hòi dan khai geh ring lơngai. Git bơta krơi is broă pơ ùr dê den să tờm añ mờ hìu bơnhă sùm lòt bal nàng pơ ùr añ dê iang nùs lơh broă”.

Đơs sồr lơh tàm broă lơh,Thượng tướng Lê Quốc Hùng - Kwang geh jơng Đảng Dà lơgar, Thứ trưởng Ƀộ Kwang àng đơs nền, gơ wèt mờ Mpồl kwang àng làng bol, hìu bơnhă là bơta dong kờl bơh ngkời kơ̆ kơljap ngan, là anih kơldìng nùs nhơm, bơ tơl tai bơta pràn nàng tơl nă cau ling kwang àng sơrlèt gan tơl bơta bòl glar kal ke, gàr wil tơl jơnau sơn tơm să tài broă lơh sền gàr lơngăp lơngai dà lơgar tờm. Tơnơ̆ dùl bơta jai pha dờng màng sùm geh bơta lòt bal, phi să ngềt ngơt bơh ală cau bèp, cau mè, pơ ùr, bơklau mờ ală kòn tàm tơl nơm hìu dê.

Nàng broă lơh hìu bơnhă mờ broă dong kờl bơh ngkời kwang àng ngai sơlơ lơh geh cồng nha, Thứ trưởng Lê Quốc Hùng sồr kâp ủy, đơng lam ală mpồl pal tam gơl pa bồ tơngoh kơlôi sơnơng, mùl màl sền gròi tus rài kis phan bơna mờ nùs nhơm ai kwang bàng, cau ling kwang àng in, is ồn là ală cau lơh broă tàm tiah ngài, tiah nhàr lơgar halà ală ù tiah ngềt ngơt. Bal mờ hơ̆, ală mpồl bal kờñ pal gàr sùm geh cồng nha ală broă lơh gàr lơngăp lơngai rài kis mpồl bơtiàn bè “Kòn ròng kwang àng sàh” halà “Mè ròng”.

Thứ trưởng Lê Quốc Hùng kơp kờñ tơl hìu bơnhă pơn jat tai đòm jat bơhiàn ờs mờng, bơto bơtê oh kòn kis geh bồ tơngoh kơp kờñ, pơgồp bơnah bơt bơtàu mpồl kwang àng ngai sơlơ kơ̆ kơljap, pràn kơldang tàm rài bơtàu tơnguh pa dà lơgar dê:

“Añ pin dờn là, mờ bơhiàn khin cha jak chài pơn yờ să, kờñ gơboh bal kòn bơnus, bềng lìu nùs nhơm niam bơh mpồl kwang àng làng bol dê, bal mờ bơta lòt bal bơh ală hìu bơnhă mờ bơta lơh ngan bơh jơh gùt mpồl bơtiàn dê, tơl nă kwang bàng, cau ling kwang àng làng bol tàm jơh ală gah rơp geh tai bơta pơn jờng, tă pơgồp nàng lơh gơs jak kơnòl broă, pơgồp bơnah bơt bơtàu mpồl kwang àng làng bol tàm srơh tàm pơrlòng “duh rơngòt adat boh lam ngan rlau jơh”, “dòn song ngan rlau jơh” mờ “rềp làng bol ngan rlau jơh”, tài rài kis ring lơngai làng bol dê.”