Bơh lòt sền mùl màl tàm anih lơh broă, mpồl lơh broă bơh Trung đoàn 584, Pôs ling sền gàr tiah nhàr lơgar 735, Pôs ling sền gàr tiah nhàr lơgar 737 mờ iat đơng lam Gah đơng lam ling klàng càr Dăk Lăk yal, Thượng tướng Trương Thiên Tô cih dờp, jờng rơ ală cồng nha lơh geh. 

Bơdìh hơ̆ tai, mpồl lơh broă kung đơs loh ală bơta ờ niam, bơta ờ pràn, mblàng lơh loh jơnau bơh tài mờ sồr Gah đơng lam ling klàng càr Dăk Lăk bơt bơtàu broă rơndap lơh bơsong, tơnguh bơta niam lam lơh kơnòl broă tàm tơngai tus. Tàm hơ̆ bơta tờm là rơcang mờ lam lơh pơlam tàp tiah rơcang gàr pơgồp bal mờ rơcang gàr làng bol kâp càr. Mờ kung rơcang lài pơgồp bal lòt sền ù tiah ngan ngồn drơng broă tồt jrong tiah nhàr lơgar đah Việt Nam mờ Campuchia; sền nền wơl, atbồ kơ̆ mpồl cau lơh broă, ơhò plung, rơndeh rơndồ làng bol crăp rơcang ai ngui mơ tŭ geh jơnau sồr; lam lơh geh cồng nha lơh broă uă rơcang lài kơryan cau tìs, ờ gŏ ai kup tras phan dà lềng tìs adat boh lam (IUU) mờ lam lơh “Broă lơh 500 ngai mang” lòt jòi, rờ tơrgùm, đal git mat ƀồc ntìng cau ling chơt màng.