Thủ tướng đơs nền, broă lơh gơl gùng rơndeh lòt mhar ƀòn dờng Hồ Chí Minh – Thủ Dầu Một – Chơn Thành là broă lơh bơh Đảng, nùs nhơm làng bol, do là jơnau sồr bơh plai nùs dê nàng ưn ngài ală cau neh phi să tài dà lơgar, den tàng pal lơh gơtùi, ờ đơs ờ, ờ đơs kal ke, ờ đơs geh mờ ờ lơh, ờ gơtùi lơyài tai, pal lơh nền nòn, neh đơs là lơh, neh lơh, neh lơh jăt là pal lơh gơs. “Añ sồr ală càr Bình Phước là dùl, ƀòn dờng Hồ Chí Minh, càr Bình Dương tàm quý I do là pal gơs ală sră nggal tơrbŏ bal gùng Dăk Nông tus Chơn Thành. Do là jơnau kờñ đảng, nùs nhơm làng bol, làng bol kơ̆p gơn ngan mờ broă bơtàu tơnguh, den tàng pal geh lơh jal mhar ngan. Den tàng, añ sồr ală kwang bàng bañ lơyài tai, mờ pal lơh di mờ jơnau sồr, jơnau đơng lam bơh Thủ tướng Cíñ phủ dê, lơh jăt nền, bañ geh jơnau neh đơs lời tềng hơ̆, nùs nhơm neh đơs là pal lơh, neh hơ là pal lơh jăt, neh lơh, neh lơh jăt là pal lơh geh phan, hơ̆ là jơnau sồr bơh plai nùs mờ he ưn ngài gơwèt mờ ală cau neh chơ̆t, ală cau neh phi să den ù tiah do neh lơh broă mùl màl ờ gŏ di đơs bal tai mờ pal geh lơh mùl màl. Añ sồr ală kwang bàng kơlôi sơnơng wơl tơngai lơh, lơh bè lơi tàm ngai 02 nhai 9 nam 2026 di tơnkah 81 nam ngai crơng gơs dà lơgar he ai ngui, den tàng ală kwang bàng pal tơnguh pràn broă lơh”.

Thủ tướng pà git, gùt lơgar gam tơrgùm 3 broă lơh pràn jŏ jòng là lơh pràn bè gùng dà broă lơh, phan bơna, mờ cau lơh broă geh să jan pràn, bồ tơngoh ngăc ngar, Thủ tướng kơ̆p kờñ càr Bình Dương lam lài tàm 3 broă lơh pràn do tàm hơ̆ uă ngan là lơh pràn bè gùng dà broă lơh nàng pơgồp bal tàm broă tam gơl pa gùng dà broă lơh bơh lơh broă bal đah dà lơgar mờ cau dùl nă să, bơcri priă nàng bơsong tiah gơkòl, mờ lam lài bơtàu tơnguh gùng lòt tơrbŏ bal tiah.

Broă lơh gùng rơndeh lòt mhar ƀòn dờng Hồ Chí Minh – Thủ Dần Một – Chơn Thành tơl lòt gan càr Bình Dương jòng rơlao 52 kơi sồ, geh lơh 06 bơnàng gùng rơndeh lòt mhar, bơta jờl geh lơh 100 Kơi sồ tàm 1 jơ. Do là gùng rơndeh lòt mhar sơnrờp ngan bơrbŏ ƀòn dờng Hồ Chí Minh mờ càr Bình Dương, Bình Phước bal mờ pơn jăt tai tơrbŏ bal mờ gùng rơndeh lòt mhar Gia Nghĩa – Chơn Thành nàng tơrbŏ mờ Tây Nguyên.

Tơngai sơnrờp, broă lơh gùng geh bơcri priă lơh mờ 04 gah rơndeh lòt tàm gùng rơndeh lòt mhar, bơnah ơm rơndeh jal mhar geh lơh sùm tàm gơl gùng, ơnàng gùng 25 thơ̆k nggùl. Kờp jơh priă bơcri rơlao 8 rơbô 833 tơmàn đong, geh lơh jăt broă lơh dà lơgar mờ cau dùl nă să lơh bal (PPP). Tơngai lơh 36 nhai bơh ngai broă lơh gùng geh ngui nàng lơh.

Gơl gùng rơndeh lòt mhar ƀòn dờng Hồ Chí Minh – Thủ Dầu Một – Chơn Thành tơrbŏ bơh gùng jăt gah 3 ƀòn dờng Hồ Chí Minh tus ƀòn drà dờng Chơn Thành, càr Bình Phước, ai geh bơta pràn bơtàu tơnguh tiah đah jum măt tơngai lik in, rề ơnàng broă lơh tiah drà bal mờ lơh sa mờ măi mok. Tŭ gơl gùng rơndeh lòt mhar Chơn Thành – Gia Nghĩa lơh gơs, rơ̆p pơn jăt tai tơrbŏ bal mờ tiah Tây Nguyên, ai geh broă tơrbŏ bal tiah, lơh pràn broă bơtàu tơnguh lơh sa mpồl bơtiàn, mờ gàr niam dà lơgar, lơngăp lơngai. Broă lơh gùng do kung pơgồp bal tàm broă lơh geh mùl màl jơnau kờñ 5 rơbô kơi sồ gùng rơndeh lòt mhar mờ Đảng bal mờ Dà lơgar neh ai tàm tơngai bơh nam 2021 tus 2030.

Thủ tướng đơs sùm, nam 2025 là nam tơnguh broă lơh pràn wèt tus Pơrjum dờng Đảng gùt lơgar dơ̆ XIV, Thủ tướng sồr càr Bình Dương bơyai lơh niam Pơrjum dờng Đảng ală kấp; bơyai lơh niam ală ngai kwơ màng, ngai tơnkah dờng dà lơgar dê, pơgồp bal tàm broă lơh tơn jơh broă lơh jăt Jơnau lơh nền sồ 18 bơh Dà lơgar dê bè rơndăp tăp sèng mpồl kwang bàng lơh broă di pal; sền wơl ală jơnau kờñ, kơnòl broă nàng lơh niam rơlao tai, lơh geh cồng nha nam 2025 uă rơlao mờ nam 2024 mờ lơh gơs ală jơnau kờñ, kơnòl broă bơh jơh gùt tơngai lơh broă dê.

Mờ bơta jòng mìng rơlao 50 kơi sồ bơh broă lơh gùng do, Thủ tướng sồr, pal tơrmù tơngai lơh, lơh ngai kung bè mang, sa mhar lơh mhar nàng tus ngai 02 nhai 9 nam 2026 geh ai ngui broă lơh gùng do, nàng ai geh bơta niam bơtàu tơnguh, Thủ tướng pin dờn ală ƀộ, gah lơh broă dà lơgar bal mờ ală càr, ƀòn dờng rơ̆p lơh gơtùi.

Thủ tướng sồr ƀòn dờng Hồ Chí Minh, càr Bình Dương, Bình Phước, Tây Ninh pal lơh jăt nền nòn di tơngai geh ai, gàr di bơta nền, niam mờ pal drơng gàr rài kis làng bol neh ai ù, ai hìu nàng lơh gùng in, nùs nhơm là ƀòn ơm kis pa pal niam rơlao mờ ƀòn yau, mờ tam dră mờ bơta ờ niam, sa kuề sa koà, pal lơh broă song dơ pă, kloh niam, tài làng bol, tài broă bơtàu tơnguh dà lơgar dê.