Tàm hìu niam pa lơh geh pà, hìu nhă ồng Rơ Lan Đếu kis tàm ƀòn Bó, sàh Ia Kly, kơnhoàl Chư Prông chờ hờp wă oh mi ƀòn lơgar tus còp, chờ gờm mŭt hìu pa. Săp đơs săp ñŏ nggồr sùm gùt hìu pa, lơh geh uă nùs nhơm chờ hờp tơrgùm bal mờ ram mhŭ. Bơh tŭ do, hìu nhă ồng neh geh anih ơm mùl màl tŭ geh hìu ơm mờ geh bal hìu bềp, hìu jă brê, ƀlàng tềng đăp hìu ơnàng niam bal mờ mpồng hìu geh lơh kơl jăp. Hìu ồng Đếu là dùl tàm rơlao 1 rơbô nơm hìu gơwèt broă lơh tơn jơh hìu sèt, hìu ồm ñhăt dà mìu gam geh lơh tàm kơnhoàl Chư Prông tàm nam 2025 do. Ồng Rơ Lan Đếu ngoh rơngăc pà git, hìu pa là broă tă pơgồp bal bơh uă nùs nhơm, bơh jơi nòi, cau pròc mhàm tus mờ Đah Măt trận Dà lơgar, ală mpồl lơh broă cíñ trị mpồl bơtiàn bal mờ mpồl ling tàm càr do dê: “Añ chờ hờp ngan. Ưn ngài ală kấp neh dong kờl priă, ngai lơh hìu, ai hìu nhă añ in geh dùl nơm hìu do dờng ơnàng. Tŭ do neh geh hìu bloh, hìu nhă añ lơh ngan lơh broă sa nàng brồ guh rài kis”.

Tàm kơnhoàl Chư Prông, do là tiah geh uă hìu sèt, hìu ồm ñhăt dà mìu pal geh tơn jơh uă ngan tàm kơnhoàl dê, ală broă hòi jà ngai lơh bơh cau tờm hìu pơgồp bal mờ broă tus bal bơh ală mpồl lơh broă cíñ trị mpồl bơtiàn neh dong kờl bơsong bơta kal ke bè priă jền bal mờ cau lơh hìu mờ lơh mhar broă lơh hìu. Do kung là broă lơh geh kơnhoàl ngui nàng tơnguh pràn broă lơh, dong kờl làng bol in gờñ geh hìu pa kơl jăp nàng ơm. Kung ndrờm mờ broă lơh do sơl, kơnhoàl Phú Thiện neh rơcang lơh dơ̆ lĕ bal tơn. Kơnhoàl do blơi phan lơh hìu bal mờ khà uă nàng tơrmù priă blơi, tơnơ̆ mờ hơ̆ tam pà tus ală sàh. Broă lơh geh bơyai lơh niam, di mờ jơnau geh ai, hòi jà mpồl cau chài lơh hìu lơh tờm, làng bol tus bal lơh. Kơnờm mờ hơ̆, tus tŭ do, kơnhoàl neh lơh gơs broă rơndăp lơh geh ai, lơh gơs lài mờ tơngai Mpồl sồr lơh càr jào; Làng bol geh hìu ơm kơl jăp mờ kung gam jăt bơta niam chài krơi is ờs mờng. Mò Nay H’ Doănh, kis tàm sàh Ia Piar, kơnhoàl Phú Thiện yal bè bơta chờ tŭ rê ơm kis tàm hìu pà bè do: “Hìu nhă añ ưn ngài Đảng, Dà lơgar bal mờ ală kấp uă ngan. Tŭ do geh hìu pa, iang nùs lơh broă sa, drơng oh kòn in lòt bơsram”.

Nam 2025, dờp bal jơnau sồr pràn ngan bơh Thủ tướng Cíñ phủ dê, càr Gia Lai ai jơnau kờñ tơn jơh 8 rơbô 485 nơm hìu sèt, hìu ồm ñhăt dà mìu. Tŭ broă lơh do rơ̆p lơh, Mpồl Sồr lơh bal mờ Mpồl dong broă geh crơng gơs, sồr lơh sùm tus tơl sờh, gah lơh broă, ală tiah tàm càr dê. Kơnờm mờ hơ̆, broă lơh do hòi jà broă tus bal pràn bơh kấp ủy, gơnoar atbồ, mpồl lơh broă, mpồl ling dê. Pơnrơ ngan là Kwang àng càr neh tus bal tă pơgồp priă, ngai lơh hìu, pơgồp bal mờ gơnoar atbồ sàh, Mặt trận Dà lơgar, mpồl lơh broă bal mờ Làng bol lơh mhar broă lơh hìu. Thiếu tướng Rah Lan Lâm, Kwang lam bồ Kwang àng càr Gia Lai, Kwang Lam bồ Mpồl Sồr lơh broă tơn jơh hìu sèt, hìu ồm ñhăt dà mìu Kwang àng càr Gia Lai pà git: “Đảng ủy Kwang àng càr neh lơh geh cồng nha. Kwang bàng, cau ling neh dong kờl 1 ngai priă nhai, tă pơgồp geh rơlao 3 tơmàn đong. Mờ pơgồp ngai lơh hìu, pơgồp bal nền nòn mờ ală gah, mpồl lơh broă, ală tiah tàm càr nàng lơh hìu, lời geh bơta niam tàm nùs nhơm Làng bol in”.

Mờ bơta pràn tơrgùm bal, bal mờ uă jơnau bơceh lơh, tus tŭ do càr Gia Lai neh lơh geh rơlao 82% broă rơndăp lơh mŭt lơh hìu mờ 42% broă rơndăp lơh geh jào. 07 tàm 17 kơnhoàl, ƀòn drà dờng, ƀòn dờng neh lơh gơs broă rơndăp lơh geh ai, tàm hơ̆ geh: ƀòn dờng Pleiku, ƀòn drà dờng An Khê, ƀòn drà dờng Ayun Pa, ală kơnhoàl Đăk Pơ, Đức Cơ, Krông Pa mờ Phú Thiện. ală tiah ndai kung gam lơh ngan lơh nàng mhar gơs broă lơh hìu làng bol in sơl. Ồng Đinh Văn Dũng, Ƀí thư Huyện ủy kơnhoàl Chư Prông đơs tus mờ broă lơh ngan bơh kơnhoàl do dê kung là broă lơh ngan bal bơh càr dê, lơh gơs broă lơh hìu làng bol in lài mờ kàl mìu nam do: “Jơh ală hìu ndrờm geh lơh di mờ jơnau geh ai, ơnàng bơh 36 thơ̆k vuông rơlao hờ đang. Uă hìu nhă càn tai priă nàng lơh hìu ơnàng bơh 60 tus 70 thơ̆k vuông, tơl pơngàr, mpồng, ƀlàng hìu, hìu jă brê. Tus ngai 30 nhai 6, bol añ rơ̆p lơh gơs 997 nơm hìu lơh pa, geh 100% làng bol geh hìu ơm kơl jăp, tàm hơ̆ uă ngan là hìu rơƀah, hìu pa lik klàs rơƀah, tơnguh rài kis Làng bol in”.

Broă lơh ngan, bơceh lơh tàm broă tơn jơh hìu sèt, hìu ồm ñhăt dà mìu tàm càr Gia Lai neh lơh geh cồng nha mùl màl. Dùl broă pràn bè hìu ơm ai hìu rơƀah in neh mờr tus ngai lơh gơs, dong kờl muh măt ƀòn lơgar, tàm hơ̆ uă ngan tàm tiah làng bol jơi bơtiàn ờ gal cau tàm càr Gia Lai ngai sơlơ niam bơnĕ, tam gơl pa.