Quốc hội là anih ală broă bơh rài kis dê geh yal wơl, cribơyai mờ tam gơl gơgơs gùng dà broă lơh, kơrnoăt boh lam. Mơya jơnau ờ ơm wơl tàm cribơyai tàm hìu pơrjum. Bơta cau tĕ khà sền gròi rlau là ală jơnau lơh nền broă kwơmàng hơ̆ geh mhar lòt mŭt tàm rài kis, tă bơsong kal ke mờ lơh gơlik geh ală tam gơl loh làng halà ờ.

Bơta do geh tơnggŏ loh ngan tàm Dơ̆ pơrjum ờs bè ờs dơ̆ Dùl, Quốc hội khoă XVI pa tơn tơn jơh tơnơ̆ 17 ngai lơh broă. Quốc hội neh ring bal 15 adăt boh lam, 6 jơnau lơh nền tàm pơrjum gơrềng tus kơrnoăt boh lam, ai jơnau đơs dơ̆ sơnrờp gơ wèt mờ 7 rơndăp broă lơh adăt mờ 7 jơnau lơh nền tàm pơrjum kwơmàng, nàng kờñ bơsong ală broă gơlik bơh mùl màl, tă bơsong anih gơkòl, lơh geh bơta ƀươn rlau ai làng bol, mpồl lơh sa kă bro in.

Pal sền ngăc, tàm dơ̆ pơrjum neh geh 2 rbô 680 jơnau đơs cribơyai tàm jơnum mờ 535 jơnau đơs tàm hìu pơrjum. Ală khà do pà gŏ anih cribơyai ờ ơm ngài mờ rài kis, mờ tiah bơtòm tơrgùm, mblàng sền mờ yal wơl ală broă gam gơ tơlik bơh mùl màl.

Bơh bơta sền hơ̆, bơta gơrềng đah Quốc hội mờ cau tĕ khà ờ mìng là tìp măt, iăt kơno lài mờ tơnơ̆ pah dơ̆ pơrjum. Hơ̆ gam là ală broă lơh sùm: cau tĕ khà yal wơl ală kal ke, ờ suk; cau ala măt Quốc hội yal jơnau đơs hơ̆ tàm anih cribơyai; Quốc hội lơh kơrnoăt boh gơgơs adăt, jơnau lơh nền tàm pơrjum; tơnơ̆ hơ̆ ală anih lơh broă Dà lơgar lam lơh jăt mờ làng bol pơn jăt tai jăt sền, yal wơl. Ồng Trần Thanh Mẫn, Chủ tịch Quốc hội đơs sùm:

“Cồng nha bơh dơ̆ pơrjum dê pơn jăt tai cơng tàng tơngŏ ngan ngồn bơh ‘jơnau kờñ Đảng dê di mờ nùs làng bol dê’, lòt bal ngan ngồn, jơh nùs chính trị uă bơh Quốc hội, Chính trị, ală anih lơh broă, ƀòn lơgar geh gơrềng tàm broă rơcăng lài bơsong mơ tơn ală broă gơlik bơh mùl màl, ờ gŏ di lơyài, gơkòl, mờ nùs nhơm: neh đơs là lơh, lơh mơ, lơh di, lơh geh cồng nha”.

Jơnau đơs do kung gơlik tơlik jơnau sồr gơ wèt mờ să tờm ală cau ala măt Quốc hội: ờ mìng iăt kơno cau tĕ khà lơm, mờ pal jăt sền tus lồi dŭt ală broă cau tĕ khà lùp. Tài bơh dùl gùng dà broă lơh niam mìng mùl màl geh kwơ tŭ làng bol gĭt gŏ geh cồng nha tàm rài kis. Tài bè hơ̆, Chủ tịch Quốc hội sồr ală mpồl cau ala măt Quốc hội, cau ala măt Quốc hội rơcăng lài jăt sền, di tŭ yal ală gơkòl, ờ hềt dipal gơlik geh bơh mùl màl. Mờ ală anih lơh broă lơh jăt pal rơcăng lài, bañ kơ̆p tơmăng, tuh kơnòl, ờ lời làng bol mờ mpồl lơh sa kă bro pal ơm kơ̆p.

Ồng Trần Thanh Mẫn, Chủ tịch Quốc hội đơs sùm, dà lơgar he gam mŭt tàm tŭ tơngai “tơngguh mhar, tam gơl pràn”, ală jơnau lơh nền broă kwơmàng geh ring bal tàm Dơ̆ pơrjum do là tơngume kơrnoăt boh lam kwơmàng nàng Chính phủ, ală ƀộ, gah, ƀòn lơgar lam lơh kơnòl broă tơn tàm ală nhai lồi nam 2026, pơnđơl lơh sir jơnau kờñ gơguh tai 2 nơm khà mờ ală jơnau kờñ bơtàu tơngguh tơngai bơh nam 2026- 2030.

Gơtùi đơs, bơh anih cribơyai tus rài kis là dùl gùng lòt bàr gah. Cau tĕ khà ơn pơnyau jơnau đơs bơh he dê tus Quốc hội; Quốc hội jun ală jơnau kơ̆p kờñ di ngan hơ̆ gơgơs jơnau lơh nền broă kwơmàng; mờ ngan rài kis là tiah sền swì bơta niam bơh ală jơnau lơh nền broă kwơmàng hơ̆. Tŭ dar wil hơ̆ geh lam ngui niam sùm, bơta gĭt gơ̆p đah Quốc hội mờ cau tĕ khà rơ̆p ờ mìng ơm wơl tàm bơta ala măt, mờ gơgơs bơta lòt bal, jăt sền mờ bơceh lơh bal bơtàu tơngguh.