Đơs pơndŭt dơ̆ lơh broă, ồng Tô Lâm, Tổng Bí thư, Chủ tịch lơgar đơs sùm, cau jak chài là bơta pràn kwơ màng is ồn bơh dà lơgar dê. Broă bơtàu tơnguh, gơ hòi gơ jà mờ ngui cau jak chài pal ơn tàm bơta tơrgùm bal kwơ màng bơtàu tơnguh dà lơgar, ai bơta kwơ dà lơgar, jơi bơtiàn mờ jơnau sồr lơh jat ală kơnòl broă kwơ màng lơh pơlam gùng dà uă ngan rlau jơh.

Tổng Bí thư, Chủ tịch lơgar sồr sền gĭt, sền sơ wì cau jak chài uă ngan jat tàm nùs nhơm, bơta pràn jak geh ngan, bồ tơngoh bơceh lơh, phan bơna geh ngan, cồng nha lơh geh mờ bơta kwơ tă pơgồp bal dà kơl hề; ờ tàm pơndrờm bal cau jak chài mờ cau geh bơsram uă, gơnoar broă halà tơngai lơh broă jŏ sơnam. Mơkung pal pơgồp bal gơ hòi gơ jà cau jak chài mờ ngui, jàu kơnòl broă ngan ngồn; tam gơl pa broă lơh dong kờl, lơh geh tiah tă pơgồp dà kơl hề mờ pờ ơnàng tiah bơtàu tơnguh. Chính phủ, ală bộ, gah, ală tiah pal sền gĭt loh ală jơnau lơh dờng kờñ geh cau jak chài bơsong, pơgồp bal mờ jơnau kờñ, phan bơna, tŭ tơngai mờ broă jàu sền sơwì.