Tàm tiah ơm kis pa thôn Điểm 9, sàh Ia Hiao, pơgăp 70 nơm hìu sơn rờp gam gơ jal ngan bơt lơh. Cau ling yau Nay Kêr ơm tàm ƀòn Chư Plah Jai, dùl tàm ală hìu bơnhă lam lài ntrờn lik bơh ƀòn, brơn brài pà gĭt: “Lài do, rài kis bơh làng bol tiah do sùm ngơr bam dà, dà tih dà lìu gơtìp uă ngan kal ke mờ sơbơng roh, ngan là tàm kàl mìu. Tŭ do geh Dà lơgar sền gròi, dong kờl bơt bơtàu tiah ơm pa, ntrờn tus tiah ơm jơnhoa niam rlau, lơngăp lơngai rlau, làng bol brơn brài mờ iang nùs ngan. Do là bơta nàng làng bol in kơ̆ kơl jăp rài kis, bơtàu tơnguh lơh sa mờ hời rơ hời bơtàu tơnguh rài kis. Bol añ ưn ngài gơnoar atbồ tiah do neh sùm sền gròi, dong kờl làng bol”.

 Gơwèt mờ kòn cau Jrai, ntrờn lik bơh tiah ơm kis ờ mìng là tam gơl ù tiah lơm mờ gam gơ jat bal mờ nùs nhơm sền gàr bơhiàn yau, dà mbòr ờs mờng. Kơnờm bơta jơh nùs mblàng yal, lòt bal bơh kấp ủy, gơnoar atbồ kấp hơ đơm, làng bol ring bal uă ngan, iang nùs tŭ ală bơta kwơ niam chài cing mồng, broă tàñ ồi yau kung gam pơn jat tai geh prap gàr tàm tiah ơm pa. Mò Ksor H’Hoa – Phó Bí thư Chi bộ, Lam bồ ƀòn Chư Plah Jai, sàh Ia Hiao pà gĭt: “Tŭ làng bol ntrờn tus tiah ơm pa, ală bơta kwơ niam chài ờs mờng bơh làng bol kòn cau Jrai dê kung gam geh pơn jat tai sền gàr mờ ngui niam. Bơh ală bơhiàn ờs mờng, broă sền gròi bơtô ƀồc, tus niam chài cing mồng, làng bol ndrờm lơh ngan gàr niam sùm mờ cèng jat bal ală bơhiàn niam chài hơ̆ tus tiah ơm pa. Bơdìh hơ̆, broă tàñ ồi kòn cau, tàñ phan kung pơn jat tai geh gàr niam tàm ală hìu bơnhă. Bol añ kung sùm bơyai lơh ală ngai chờ, broă lơh niam chài, đơs crih tam ya nàng làng bol in tìp mat lơh kwèng, sơlơ tơnguh tai nùs nhơm tam klăc bal mờ bal mờ gơ̆p sền gàr bơhiàn niam chài ờs mờng bơh jơi bơtiàn dê”.

Tàm ƀòn Jứ, sàh Ia Tul, 207 hìu bơnhă làng bol sùm kong aniai bơh ngơr bam dà dà kŏ dà cò gam mhar ngan ntrờn rê tàm tiah ơm kis pa mờr 22 lồ. Tàm hơ̆, 152 hìu bơnhă rơwah tă sờr ală hìu đam mpàn mờng kwèng cèng lòt lơh wơl nàng tềm pềr ƀà priă tă lơh mờ prap gàr wơl hìu rơng mờng kwèng. Kwang bàng sàh bal mờ mpồl kwang àng, ling griăp ƀòn tus bal tơn dong kờl tă sờr, trŭ gơm phan sa, dà hùc mờ rcang lài rơndeh jun pơndiang hìu ai làng bol in. Ồng Ksor Yu, làng bol krơh niam ƀòn Jứ, chờ hờp đơs: “Tŭ do, hìu bơnhă añ rcang ntrờn tus tiah ơm pa. Lài do, tŭ gam ơm tàm ƀòn yau, pah dơ̆ mut tàm kàl mìu dà tih dà lìu là sùm gơtìp ngơr bam dà, rài kis làng bol dê gơtìp uă ngan kal ke, geh tŭ phan poan jơng sùm gơtìp dà tih pơrdô. Tŭ do geh gơnoar atbồ tiah do rơndăp tăp sèng, dong kờl tiah ơm pa lơngăp lơngai, dờng niam rlau, hìu bơnhă añ chờ hờp mờ iang nùs. Tàm do geh tơl làm ală bơta kwơ màng bè hìu bơsram, hìu sơnơm..., den tàng broă ơm kis mờ rài kis bơh làng bol dê ƀuơn rlau. Bol añ kơ̆p kờñ rơ̆p gờñ bè ờs wơl rài kis, bơtàu tơnguh lơh sa tàm tiah ơm pa. Añ ưn ngài gơnoar atbồ tiah do neh sền gròi, dong kờl làng bol”.

Jat rơndăp broă lơh, càr Gia Lai geh 16 tiah pal bơyai lơh ntrờn gơ jal ngan mờ 1 rơbô 858 hìu bơnhă làng bol, geh 13 rơndăp broă lơh tiah ơm kis pa tơrgùm bal mờ 3 broă lơh tàm bơrlŭ bal. Kờp jơh priă bơcri lơh rlau 2 rơbô 100 tơmàn đong. Tam hơ̆, rlau 713 tơmàn đong bơcri priă lơh phan bơna bơt bơtàu ring bal; rlau 258 tơmàn đong dong kờl làng bol tơn; mờ rlau 1 rơbô 136 tơmàn đong drơng broă tơm priă, ai mat ù. Tơngai pa do, ală sàh Ia Hiao, Ia Tul, Uar, Ia Rsai mờ Ia Dreh neh dơ̆ lĕ bal ai cau lik lòt lơh broă dờng. Tỉñ ủy càr, Anih duh broă Làng bol càr Gia Lai ai ală tŭ tơngai mut lơh ngan ngồn ngan mờ kràñ cê jơh nùs: Lài mờ ngai 30/8 tàm jàu phan bơna bơt bơtàu kờñ pal geh: lài mờ ngai 31/10 lam làng bol lik bơh tiah tơrlah ù sơbơng roh; lài mờ ngai 30/11 sền sơwì dờp ngui, mờ lài mờ ngai 15/12 nam do pal lơh sir. Tàm sàh Ia Hiao – tiah lam lơh rơndăp tăp sèng ai 180 hìu bơnhă làng bol in, ồng Phạm Văn Phương – Bí thư Đảng ủy sàh đơs nền nùs nhơm lơh ngan bơh sàh dê: “Broă rơwah ală hìu bơnhă lam lài lơh jat lài nàng kờñ lơh geh bơta lơh gơrề uă, gơrềng tus nùs nhơm bơh ală hìu bơnhă gam wơl dê. Tus tơngai tŭ do, sàh gam lam lơh ală broă lơh nàng lơh broă tơm priă, dong kờl gơwèt mờ 24 hìu bơnhă sơn rờp. Bè gùng lòt lơh jat, bơh tŭ do tus ngai 1/10/2026, sàh pơnđơl pràn lơh ngan lơh sir ală broă jàu nàng ai, rơndăp tăp sèng 100 hìu bơnhă làng bol; mơkung lơh ală broă lơh kờp sền, lơh ală broă lơh tơm priă, ring bal priă tă lơh, rơwah hìu lài mờ lam lơh bơt hìu tàm tiah ơm kis pa tơrgùm bal. Tus ngai 31/12/2026, sàh pơnđơl pràn lơh ngan lơh sir broă tă tơm priă jền tàm tiah ơm kis yau ai làng bol in mờ ai priă ală priă tă lơh dong kờl jat broă lơh dong kờl tàm tiah ơm pa dê, nàng kờñ gàr niam lơh jat mờ broă rơndăp lơh geh ai”.

Dùl nơm hìu pa kơ̆ kơnhăp ờ mìng jơm glòm làng bol lòt gan kàl mìu càl rơbŭt dờng lơm, mờ gam là tiah kơldìng kơ̆ kơnhăp nàng làng bol in iang nùs ơm kis lơh broă sa. Nùs nhơm Đảng bơnĕ bơnài bal mờ nùs nhơm làng bol, nùs nhơm sơr băc mhar bơh “Broă lơh dờng Quang Trung” gam lơh ală tiah ù thòng ngơr bam dà sơbơng roh gơ gơs ală tiah ơm kis pa hờm ram, điơm gơs.