Pah dơ̆ tus nhai 8, jơnau kah kir bè dùl Kàl hàm kah yau gơ rê wơl mờ ală cau neh geh tŭ lòt gan tam lơh. Gơ wèt mờ cau jàm chính trị lài do ồng Đinh Kim Anh, ơm tàm sơnah ƀòn Ea Kao, càr Dăk Lăk, bơta kuơ bơh lơngăp lơngai is, khat gơboh geh tàm pơgơl mờ ală nam nhai kơnòm să mờ jơh bal mhàm cau ling bal dê. Nam 1972, tơnơ̆ tŭ gơ yar mền tàm dùl dơ̆ lòt wă anih lơh broă kac màng, ồng gơtìp sồt să kơn jơ̆ mờ gơtìp bol sò tơm kup. Rlau 2 nam geh ntrờn uă hìu jàm, ồng neh kong ală dơ̆ pù pờng jàñ bơsak ngan mơya ồng kràñ cê ờ pờ bơr dùl êt sơl, tài bơh tơnơ̆ ồng gam geh ală anih lơh broă kac màng digơlan gơtìp mpờl gŏ. Bơta neh dong ồng Đinh Kim Anh sơrlèt gan ală nam nhai hơ̆, dong ồng gàr kơ̆ bơta pin dờn hơ̆ là bơta kuơ lơngăp lơngai is, khat gơboh - ală bơta mờ Chủ tịch Hồ Chí Minh neh đơs nền tàm sră cih Jơnau yal bơr lơngăp lơngai is, tơng gơs dà lơgar Việt Nam Dân chủ Cộng hoà: “Ờ geh bơta lơi dờng màng rlau mờ lơngăp lơngai is, khat gơboh, Wa Hồ neh đơs bè hơ̆. Jơnau đơs hơ̆ là kuơmàng ờ git lơh. Bè hơ̆ den tàng tàm rài kis, añ git bòl glar kal ke, ờ tơl boh, ờ tơl phe, mìng sa bùm, mơya kung gam pin dờn kac màng rơp lơh geh cồng nha. Hơ̆ là bơta niam dờng màng ngan”.

Bơta pin dờn hơ̆ ờ mìng dong ală cau ling ntàu kơ̆ tàm hìu jàm, mờ gam chồl tơnguh uă rơnàng ơruh pơnu sac rơ wah lòt gùng tŭ dà lơgar gam tam lơh.

Tŭ 17 sơnam, klau pơnu Bùi Ngọc Thảo ơm tàm Diễn Châu, Nghệ An dan is lòt ling, gơ gơs là cau Ling Đặc công dà mờ mut tàm tiah tam lơh tàm gùl lơgar. Geh ală cau ling bal ờ gơtùi rê wơl, geh ală dơ̆ tam lơh gơbàn hoàc huơr kơn jơ̆ kơn jut ngan, mơya tàm bồ tơngoh, nùs nhơm cau ling kơnòm să dê tŭ hơ̆ kung gam là bơta kơp kờñ tơngklàs ƀòn tờm, tơrgùm dùl dà lơgar.

81 nam tơnơ̆ Kac màng Nhai 8, dà lơgar neh mut tus dùl gơl gùng krơi is ngan. Bơh dùl dà lơgar rƀah lơ ời, bơr ngơl gơla, Việt Nam neh bơt bơtàu bơta git gơp cribơyai broă mờ lơgar ndai mờ mờr 200 dà lơgar, kơnhoàl ù tiah, mut jrô ơnàng tàm ală bơta lơh bal lơh sa mờ ală mpồl lơh gơlik phan gùt plai ù, rơhời ai tơnggŏ gơnoar broă bơh dùl rài lơh sa ngac ngar tàm tiah do dê.

Dilah rơnàng lài do pal tam lơh nàng ai wơl gơnoar lơngăp lơngai is, lơh nền is bơta kis jŏ jơi bơtiàn dê, den tŭ do, bơta kơp kờñ hơ̆ geh tàm pơn jat tai tàm dùl kơnòl broă pa: bơt bơtàu dùl Việt Nam ring lơngai, lơh tờm is, pas pràn, geh tơl pràn nàng nàng mut gơ rờm bal mờ tàm pơrlòng tàm dùl dunia geh uă tam gơl.

Sền wơl gơl gùng hơ̆, ồng Bùi Ngọc Thảo, tŭ do ơm kis tàm sơnah ƀòn Buôn Ma Thuột, càr Dăk Lăk đơs là, ală bơta kuơ Kac màng nhai 8 dê kung gam là bơta tờm nàng dà lơgar mut tàm tŭ tơngai bơtàu tơnguh pa: “Bè jơnau đơs bơh ồng Tô Lâm - Tổng Bí thư, Chủ tịch lơgar dê, bol he mut tàm tŭ tơngai brồ să jơi bơtiàn, hơ̆ là dùl bơta chồl tơnguh pràn ngan bơh bơta tờm bơhiàn yau kac màng Việt Nam. Bơh bơhiàn yau geh dùl, ờ geh bàr nàng bol he in brồ guh rlau”.

Gơ wèt mờ rơnàng kơnòm să tŭ do, jơnau bơsram kàl Hàm nam 1945 dê bè hơ̆ den tàng ờ mìng gơ ơm tàm ală pang sră cih kah yau. Tàm càr Dăk Lăk, Tỉnh đoàn càr git nền bơto bơtê bơhiàn yau pal dong ơruh pơnu git bơta kuơ ring lơngai dê, ki ngàm ală cồng nha mờ bèp bi lài do neh tàm pơ gơl mờ phi să mờ kuơmàng rlau là lơh bơta pơn yờ să gơ gơs cồng nha.

Broă lơh kung geh tam gơl pa jat gùng dà rềp mềr mờ ơruh pơnu rlau, bơh mạng xã hội, video lơyah, podcast tus ală broă lơh rê hờ nggu rơyas, tìp mat cau lơh cơng kah yau mờ sền git ngan ngồn. Jơnau kờñ ờ mìng nàng cau kơnòm să in git bè kah yau, mờ nàng bơh kah yau lơh gơs bơta wă wờng kơnòl mờ tŭ do kung bè tơnơ̆ do. Bi Nguyễn Thao Giang - Phó Bí thư Tỉnh đoàn càr Dăk Lăk đơs: “Bơta kuơmàng ngan rlau jơh là pơgồp bal kah yau mờ rài kis pa tŭ do bơh ơruh pơnu dê. Pal dong ală bơyô kơnòm să in git là, bơta kuơ ring lơngai tŭ do dê gơtùi bơto bơtê jơnau git wă kơnòl mờ mpồl bơtiàn, nùs nhơm tam klac bal, niam chài tơm boh bor tàm internet. Bơh bơta phi să bơh ală rơnàng lòt lài dê gơtùi lơh gơlik nùs nhơm lơh broă dong kờl is, tă pơgồp, geh kơnòl mờ mpồl bơtiàn.”

Tơl rơnàng cau geh dùl broă krơi is nàng tàm pơn jat tau nùs nhơm kàl Hàm lơngăp lơngai is dê. Dilah rơnàng bèp bi lài do neh ngui nùs nhơm gơboh dà lơgar, bồ tơngoh mờ bơta phi să nàng ai wơl lơngăp lơngai is, den rơnàng tŭ do pal lơh ală bơta kuơ hơ̆ gơ gơs bơta pràn bơt bơtàu dà lơgar: mờ bồ tơngoh jak bơsram sră nàng lơh tờm tơnơ̆ do, mờ bơta bơceh lơh nàng lơh gơs ală bơta kuơ pa, mờ kơnòl nàng sền gàr cồng nha ală rơnàng lòt lài dê.

Hơ̆ kung là broă mờ nùs nhơm Kac màng Nhai 8 pơn jat tai kis tàm tŭ do, ờ mìng tàm ală pang kah yau geh yal wơl pah tŭ nhai 8 tus, mờ tàm broă lơh, bơta kơp kờñ mờ ală tă pơgồp mùl màl bơh tơl nă cau Việt Nam tŭ do dê.