Tàm tiah nhàr lơgar càr Dăk Lăk, nam bơsram do geh dùl tềl lời wơl pal sền gròi ngan: ală hìu bơsram ơm sa bĭc tơn 2 kấp geh bơcri priă lơh gam hời rơ hời ai mut ngui, lơh geh ală bơta bơsram sră, tiah ơm sào sa niam rlau tai ai kơnòm bơsram tiah nhàr lơgar in. 3 hìu bơsram ơm sa bĭc tơn 2 kấp tàm ală sàh Ia R’vê, Ia Lốp mờ Buôn Đôn geh lam lơh mờ jơnau kờñ wă rlau 3 rơbô nă kơnòm bơsram tàm nam bơsram 2026-2027. Do là ală broă lơh geh bơcri priă lơh ring bal, ờ mìng geh cơldŭ bơsram lơm mờ gam geh tiah ơm sa bĭc tơn, hìu sền sră, hìu tàp pràn să jan mờ ală bơta phan drơng broă ơm kis bơh kơnòm bơsram dê.

Mìng is Hìu bơsram ơm sa bĭc tơn 2 kấp Ia R’vê kờp jơh geh khà bơcri priă lơh 185 tơmàn đong. Nàng di tŭ ai mut ngui, gĭt nđờ jơ̆t nă kwang bàng, cau ling mpồl ling klàng bal mờ mpồl cau lơh phan neh tus bal mut lơh, lơh broă sùm tàm tiah lơh broă. Rê còp hìu bơsram di dơ̆ nam bơsram pa, Thượng tướng ồng Phùng Sĩ Tấn, Phó Lam bồ dờng Mpồl dong broă Ling klàng Làng bol Việt Nam pà gĭt, hìu bơsram là pơrya niam ngan bơh nùs nhơm ling klàng làng bol dê. “Quân ủy Dà lơgar, Bộ Ling klàng, mpồl ling klàng pin dờn là tŭ geh hìu bơsram rơ̆p lơh geh jơnau kờñ mpồl cau lơh broă jak bơto bơtê kwang bàng làng bol jơi bơtiàn dồ ết nă cau dê. Bơh hơ̆ rơ̆p lơh geh mpồl kwang bàng, lơh geh bơta pràn nàng bol añ in lơh jat niam kơnòl broă bơtàu tơnguh lơh sa- mpồl bơtiàn, lơh kơ̆ kơl jap sền gàr dà lơgar, is ồn là tiah gam uă kal ke bè Ea Rốk.”

Ală khà sồ hơ̆, dilah mìng sền tàm pơ àr, digơlan mìng là bơcri priă lơh halà khà kơnòm bơsram lơm. Mơya bơh ngkời hơ̆ là jơnau bơh ală kơnòm bơsram tiah nhàr lơgar dê. Mờ uă kơnòm bơsram, geh bơsram tàm dùl hìu bơsram dờng niam, geh tiah sào sa tàm hìu bơsram tơn ndrờm mờ broă gùng lòt tus tàm ơdŭ bơsram ờ hoan ngài rlau, broă bơsram sră bè ờs rlau mờ tŭ tơngai niam gĭt mờ bơto bơtê kung dờng ơnàng rlau tai.

Mờ dilah tàm tiah nhàr lơgar, ală hìu bơsram pa gam pờ tai tŭ tơngai niam ai kơnòm dềt in, den tàm Trường Sa, tơl ơdŭ bơsram cèng wơl dùl gơtha is ồn ndai. Tàm gùl dà lềng, klau pơgru mờ kơnòm bơsram kung gam wă nam bơsram pa tàm săp ntas sơngơr sơnđờm mut bơsram. Ală ơdŭ bơsram tiah bồt ngài ờ mìng là tiah bơto bơtê jơnau bơsram lơm mờ gam là tiah àng đơs nền bơta pràn kis bơh mpồl bơtiàn làng bol Việt Nam tiah nhàr lơgar bơh Dà lơgar dê.

Bơh Tây Nguyên tus Trường Sa, bơta ngài ù tiah digơlan tus gĭt nđờ rơhiang, gĭt nđờ rơbô kơi sồ. Ală bơta bơsram sră kung krơi sơl. Mơya tàm ngai sơnđờm mut nam bơsram pa, jơh ală bal dùl bơta: tơl kơnòm dềt, bulah ơm tàm tiah nhàr lơgar halà bồt bơlào dà lềng, ndrờm kờñ geh jàu tŭ tơngai niam bơsram sră mờ bơtàu tơnguh.

 Mờ tài bơh hơ̆, săp ntas sơngơr sơnđờm mut nam bơsram pa ờ mìng yal dùl nam bơsram pa lơm. Hơ̆ gam là săp ntas sơnggơr bơh ală hìu bơsram pa tiah nhàr lơgar dê; bơh ală ơdŭ bơsram tàm gùl dà lềng; bơh bơta bơcri priă lơh ai cau in mơkung là bơta bơt bơtàu rài tơnơ̆ do tàm ală ù tiah is ồn kwơ màng bơh dà lơgar dê.

Bơh ƀòn lơgar Tây Nguyên tus bồt ngài Trường Sa, ală pang sră pa geh pờ. Bal mờ hơ̆ là ală jơnau kơ̆p kờñ pa bơh dùl rơnàng gam ntào dờng tàm tiah nhàr lơgar bơh Dà lơgar dê.