Tàm suơn tam Bơkào Chi An tàm sơnah ƀòn 12, ƀòn dờng Dà Làc, càr Lâm Đồng tŭ do neh gơs anih tus sền, bơsram bơh uă mpồl lơh broă, cau dùl nă să tam bơkào tàm tiah do dê. Jơh ală broă lơh bơkiar bơkào mờ bơkào ris tàm do ndrờm geh lơh mờ măi mok pa, atbồ mờ phần mềm. Bơh tŭ hơ̆, gàr geh cồng nha broă lơh mờ tơnguh uă bơta kwơ phan geh lơh, ai drà kă bro tàm lơgar mờ tăc mờ lơgar bơdìh in. Ồng Hồ Vũ Quốc Hùng, cau tờm suơn tam Bơkào Chi An pà git: “Măi mok pa là bơta tờm ờ mìng tơnguh bơta niam bơh bơkào Dà Làc mờ gam pờ geh ală bơta pràn pa, ală bơta bơkào pa… Bơh tŭ hơ̆ he yal mờ tăc tàm drà kă bro”.

Mờ bă ù tam bơkào rơlao 10 lồ, khà bơkào geh tàm nam 2024 geh 4 tơmàn 400 tơlăk ntê, ƀòn dờng Dà Làc, càr Lâm Đồng lam lài gùt lơgar bè geh lơh bơkào. Tŭ do, ƀòn dờng Dà Làc geh 400 bơta bơkào mờ git nđờ rơbô sơntìl bơkào mờ pơn jăt tai geh bơtơl bơkào mờ sơntìl pa mờ broă blơi bơh lơgar bơdìh geh sră ngui gơnoar tờm.

Jăt ồng Phan Thanh Sang, Củ tịc Mpồl tam klăc bơkào Dà Làc yal, bal mờ bơta niam trồ tiah, ù tiah gơdờp tàm broă tam uă bơta bơkào gùt nam, broă blơi bơh lơgar bơdìh ală phan lơh broă pa, bè sơntìl, sơnơm, phan lơh broă mờ ngui măi mok pa, ngăc ngar tàm broă lơh neh lơh broă tam bơkào ƀòn dờng Dà Làc, càr Lâm Đồng bơtàu tơnguh ndrờm bal mờ ală lơgar tàm tiah do. Mơya, khà tăc bơkào mờ lơgar bơdìh ƀòn dờng Dà Làc dê mìng rơ̆p geh di pơgăp 11% khà geh mờ gah bơkào bơh ƀòn dờng Dà Làc càr Lâm Đồng dê gam gơtìp tàm pơrlòng uă ngan tŭ khà bơkào bơh uă lơgar tàm bơta geh uă, tàm tŭ broă blơi bơkào tàm gùt plai ù gơmù uă. Ồng Phan Thanh Sang kơlôi, bơdìh mờ broă ngui bơta chài măi mok pa tàm broă tam-tơnhào, bơta sơntìl là bơta tờm nàng tơnguh uă bơta pràn tàm pơrlòng lài jơh ai bơkào Dà Làc in: “Pơgồp bal, lơh broă bal mờ ală mpồl lơh sa kă bro lơh ală bơta sơntìl pơnrơ niam ngan tàm dunia nàng lơh broă bal tàm broă lơh geh sơntìl tàm drà kă bro lơgar Việt Nam dê. Bơdìh hơ̆ tai, geh ờ uă bơta bơkào, phan geh lơh bơh bơkào koh ntê geh bơta pràn is tàm ƀòn dờng Dà Làc, càr Lâm Đồng dê den kung pơn jăt tai lơh”.

Jăt Tiến sĩ ồng Phạm S, Phó Củ tịc Anih duh broă Làng bol càr Lâm Đồng đơs, tềng đăp mờ ală bơta lòng gam gơtìp pà gŏ, càr rơ̆ ai geh gùng dà broă bơtàu tơnguh gah phan bơkào Dà Làc – Lâm Đồng kơl jăp, geh cồng nha, geh bal drà kă bro tàm lơgar mờ lơgar bơdìh. Jơnau geh ai là tus nam 2030, tơnguh khà bơkào gùt càr geh 5 tơlăk 400 rơbô ntê mờ geh 500 tơlăk gri bơkào ală bơta; priă geh gah lơh bơkào rơlao 15 rơbô tơmàn đong, priă tơnhào kờp dŭ bal geh rơlao 3 tơmàn 700 tơmàn đong tàm 1 lồ ù tam, mờ priă geh bơh broă tăc bơkào mờ lơgar bơdìh geh rơlao 217 tơlăk dolar Mỹ. Tus nam 2050, jơh khà bơkào geh lơh tàm ƀòn dờng Dà Làc geh tăc bơh ală anih logistics pa, mờ rơlao 50% khà bơkào geh tăc mờ lơgar bơdìh.

Lơh jăt broă rơndăp lơh do, Mpồl tam klăc Bơkào Dà Làc là mpồl lơh broă sơnrờp ngan geh càr sồr lơh jăt Jơnau lơh nền tàm pơrjum sồ 57, ngai 22 nhai 12 nam 2024 bơh Ƀộ Cíñ trị dê bè broă lơh pràn bơtàu tơnguh bơta chài, măi mok pa, tam gơl bơceh lơh mờ tam gơl sồ dà lơgar. Tàm hơ̆ broă lơh jăt bơta chài măi mok pa là broă lơh tờm, lơh pràn ngan nàng bơtàu tơnguh gah bơkào mờ tơnguh khà tăc mờ lơgar bơdìh. Ồng Phạm S đơs: “Bơyai lơh niam wơl lơh sa, bơcri priă tàm broă lơh bơta chài măi mok pa, mờ kơlôi sơnơng rơwah wơl sơntìp. Tàm hơ̆ uă ngan là he pal lơh ală sơntìp, ală jơi sơntìl gơwèt mờ uă bơta niam siñ họk càr Lâm Đồng dê nàng rơwah ală sơntìl krơi is tàm ƀòn dờng Dà Làc, càr Lâm Đồng dê geh bơta kwơ uă. Nàng he geh tơl pràn nàng yal rùp rài tus bal tàm mpồl geh kwơ gùt plai ù”.

Gah bơkào ƀòn dờng Dà Làc, càr Lâm Đồng gam gơtìp mờ ală bơta lòng uă ngan tàm broă tơrgùm bal mờ tàm pơrlòng mờ ală lơgar ngai sơlơ geh uă. Mơya, mờ ală gùng dà broă lơh jŏ jòng mờ loh làng, ngui pràn bơta chài măi mok pa bal mờ ală broă lơh niam wơl tàm broă lơh sơntìl bơkào, ƀòn dờng Dà Làc ờ mìng geh sùm bơta pràn tàm pơrlòng , mờ gam bơtàu tơnguh kơ̆ kơl jăp, tơnguh uă bơngă bơh ƀòn dờng dê tàm drà kă bro dunia.