Tơngkah kir sơnrai 50 nam Ngai Tơngklàs tiah đah Jum, tơrgùm dùl Dà lơgar, drim ngai 30/04, ƀòn dờng Hồ Chí Minh pơgồp bal mờ Ƀộ Ling klàng lam lơh bơyai lơh dơ̆ ling lòt pơdar lik lòt tàm gùng dờng ngan. Dơ̆ tơngkah kir sơnrai 50 nam Ngai tơngklàs tiah đah Jum, tơrgùm dùl Dà lơgar geh 48 mpồl, mờ pơgăp 13 rơbô nă cau tus bal ling lòt pơdar lik lòt tàm gùng. Ling klàng lơgar Lo, Lào mờ Campuchia tus bal dơ̆ ling lòt pơdar lik lòt tàm gùng dơ̆ do dê.

Dơ̆ tơngkah kir sơnrai geh lơh tàm tiah tờm Kwận 1, mpràm tờm geh lơh tàm đah đăp Hìu pơrjum Thống Nhất. Mpồl ling lòt pơdar lòt bơh gùng tam tìp Lê Duẩn – Nguyễn Bỉnh Khiêm rê tus Hìu pơrjum Thống Nhất tơnơ̆ hơ̆ bơh uă gơl gùng bơh kwận 1 (ƀòn dờng Hồ Chí Minh dê) nàng làng bol in sền.

Tàm bơnah pơrjum rơ̆p geh tơngume cuh 21 nai phàu kơnong dờng tàm săp ntas jơnau đơs crih dà lơgar Việt Nam. Ling củng Rơcăng gàr kơlwàng trồ- Ling rơndeh par hòi tơrgùm gĭt nđờ jơ̆t nơm rơndeh par duk Mi-8, Mi-17, rơndeh par tam lơh Yak-130 mờ tam lơh Su- 30MK2 par ai cau in sền.

 Bơnah ling lòt pơdar lik lòt tàm gùng, ală mpồl ling sơnđờm bơh đah gùng tàm tìp Lê Duẩn- Nguyễn Bỉnh Khiêm, lòt gan Anih bơyai lơh tờm tềng đăp Anih pơrjum Thống Nhất. Tơnơ̆ hơ̆, ală mpồl ling tam pà gơs 4 đah, lòt gan uă gơl gùng drà. Broă lòt jat 4 đah rơ̆p dong uă ngan làng bol in geh sền tơn dơ̆ ling lòt par lik lòt tàm gùng. Mờ ƀòn dờng Hồ Chí minh kung neh crăp 20 nơm biài rùp dờng tàm ală tiah ƀuơn ngan tàm uă gơl gùng drà nàng làng bol in jat sền.