Drim ngai 30/07, neh geh bơyai lơh Pơrjum dờng cau ala mat Đảng ƀộ sơnah ƀòn Xuân Hương- Dà Làc dơ̆ I, tơngai lơh broă bơh nam 2025-2030, mờ pơlam gùng dà bơt bơtàu sơnah ƀòn Xuân Hương- Dà Làc gơ gơs dùl tiah drà lòt nhơl, drơng broă, ơm rlô să, ngăc ngar mờ pa ngan; geh ală bơta krơi is bè nhơm trồ tiah, ù tiah brê bơnơm hàng niam, niam chài kah yau mờ phan lời wơl bơt bơtàu cèng gơnoar Dà lơgar, tàm tiah do mờ ală lơgar dê.

Đơs tàm pơrjum dờng, ồng Y Thanh Hà Niê Kđăm,  Ƀí thư Tỉñ ủy càr Lâm Đồng sồr sơnah ƀòn Xuân Hường- Dà Làc pal sền sơwì jrô rlau tai bơta kwơ, bơta ƀuơn, bơta pràn bơh he dê, sền gĭt loh bơta dờng màng, tiah, gơnoar broă là tiah lơh anih tờm cíñ trị- niam chài bơh càr Lâm Đồng dê. Nàng lơh tus geh ală jơnau kờñ, kơnòl broă geh ai, ồng Y Thanh Hà Niê Kđăm sồr bơdìh mờ sơlơ tơnguh tai bơt bơtàu Đảng mờ ală anih lơh broă cíñ trị sàng goh, kơ̆ kơl jăp, pràn kơl dang, Đảng ƀộ sơnah ƀòn Xuân Hương- Dà Làc pal tơnguh uă bơta pràn jak đơng lam, bơta pràn lơh broă bơh mpồl Đảng ƀòn lơgar pơgồp bal mờ bơt bơtàu mpồl kwang bàng, đảng viên lơh geh niam ngan jơnau sồr kơnòl broă tàm bơta pa.