Bơh bồ nam tus tŭ do, ală cơldŭ tàm Mpồl Rơndăp broă Tỉñ ủy càr Dăk Lăk sùm tàm nùs nhơm lơh broă jal mhar. Bơh lơh bơsong sră pơ àr, bơyai lơh ală dơ̆ pơrjum tus bơsong broă pa gơlik ndrờm pal gơ in mhar ngan mờ pal ờ gŏ di tìs hŭi. Jăt bi Kim Thị Hoài Thương, cau mờng lơh broă cơldŭ lơh broă dê đơs, bơta jal mhar do là nàng lơh geh dong broă broă lơh tơmŭt bal, rơndăp tăp sèng mpồl lơh broă mờ là broă jàu sền swì bơta broă lơh pah nhai: “Tŭ he sền swì pah nhai den tơngai gơ dồ êt wơl den tàng he digơlan sền swì loh nền cê bơh tơl broă lơh dê, is ồn dilah tàm ală tŭ hơ̆ geh tìs hŭi lơi hơ̆ rơ̆p gŏ tơn mờ bơsong mơ tơn mờ ờ gŏ di là pal ơm kơ̆p tus lồi nam den hơ̆ sồng ai gĭt geh bơta ờ hềt wil tơl hơ̆ sồng ai geh broă rơndăp lơh bơsong. Oh sơning he geh jơnau pal jăt bè do den rơ̆p dong ai jơh tơl nă cau in sền swì wơl di tŭ, lơh tam gơl niam wơl di tŭ mờ đơs di tŭ bơh hơ̆ gơ kung rơ̆p mùl màl rlau”.

Ờ mìng ơm wơl tàm broă sền swì nă să is, jơnau pal jăt pa gam geh ngui gơ wèt mờ jơh ală cơldŭ mpồl. Mò Nguyễn Thị Hồng Thúy, Lam bồ Cơldŭ lơh broă Mpồl Rơndăp broă Tỉñ ủy càr yal là, do là dùl tơngume pa, gơ sồr ală lam bồ cơldŭ broă mờng lơh pal jăt sền nền nòn broă lơh bơh cau lơh broă dê, pal sền swì di bơta jak mờ bơnah broă lơh sir.

“Tơnơ̆ tŭ jơnau pal jăt geh ai lơh jăt kung mblàng yal tus jơh ală lam bồ cơldŭ broă mờng lơh in tài bơh do là kâp đơng lam bồ tơn jăt sền nền nòn broă lơh bơh oh mi cơldŭ lơh broă he dê. Jăt tàm bơta sền swì hơ̆ gơ geh jơnau yal nền cê bơnah broă lơh sir tàm nhai bơh Lam bồ Cơldŭ dê bơh jơh ală cơldŭ dê tơnơ̆ hơ̆ sền swì bơnah broă loh làng bơl tơl nă bi dê kung bè cồng nha broă lơh sir”.

Jăt ồng Nguyễn Thượnh Hải, Lam bồ Mpồl Rơndăp broă Tỉñ ủy càr Dăk Lăk, broă sền swì kwang bàng jăt broă rơndăp lơh pa, kờp tus bal khà bơnah broă mờ bơta kal ke bơh tơl broă lơh dê, ờ mìng dong gŏ mờ tề lam ală cau geh pràn jak mờ gam pơgồp bơnah bơsong halà bơto tai ai ală cau ờ hềt lơh geh jơnau sồr in.

Tơnơ̆ 3 nhai lam lơh, jơnau pal jăt pa bơh sơnrờp neh cèng wơl ală bơta tam gơl niam ngan. Ală kwang bàng, kông cưk tàm anih lơh broă neh geh bơta gĭt wă kơnòl uă rlau, rơcăng lài jăt sền tŭ tơngai lơh broă lơh mờ tơrmù uă ngan tìs hŭi tàm ală tŭ tă pơgồp jơnau đơs. Bulah bè hơ̆, jăt sền swì bơh đơng lam Mpồl Rơndăp broă Tỉñ ủy càr dê, kung gam sơl jơnau ki ngàm, ờ hềt song dơ pă ai gĭt bơta ờ hềt pràn jak, ờ hềt wil tơl bơh cau lơh broă bal dê. Den tàng bè hơ̆, tàm tơngai tus, Mpồl rơ̆p pơn jăt tai lơh jăt nùs nhơm sền swì dipal, song dơ pă loh làng, pal đơs wơl di bơta mùl màl pràn jak bơh tơl nă kwang bàng dê.

“Đơs ngan là oh mi bơh chờm ờ hềt kwèng, gŏ lơh kràñ ir, tŭ do oh mi gŏ gơlơh kwèng rao, mờ oh mi dùl nùs bal ngan, loh làng cau lơi lơh geh broă den là gĭt loh geh broă, bi lơi ờ hềt geh broă là ờ hềt geh. Bơh jŏ bol he sền swì khăt bè sền swì lơm ring bal lơh, jơh ală ndrờm niam lơm den cau lơh niam khi ờ bài kờñ sơl tài bơh cau ne ờ tă pơgồp bè añ kung lơh niam bè añ den ờ gơtùi, den tàng oh mi dùl nùs bal ngan kờñ ngan bal mờ bè hơ̆ den tàm anih lơh broă mpồl lơh broă rwah geh ală oh mi jak ngan rlau jơh”.

Broă tam gơl pa tàm broă lơh sền swì kwang bàng tàm Mpồl Rơndăp broă Tỉñ ủy càr Dăk Lăk neh mờ gam cèng wơl cồng nha niam ngan, lơh gơlik bơta gơn kơnờm nàng kwang bàng lơh ngan pơnđơl mờ tơngguh uă cồng nha broă lơh. Dilah geh lam lơh niam mờ kràñ cê jơh nùs, broă lơh tơrlòng lài do rơ̆p geh rề ơnàng lơh uă tus ală anih lơh broă, mpồl lơh broă ndai tàm càr, pơgồp bơnah tơnguh uă cồng nha mpồl kwang bàng, kông cưk, drơng niam rlau ai broă lơh bơ̆t bơtàu Đảng mờ ală anih lơh broă cíñ trị in.