Tàm thôn Mê Ka, sàh Đam Rông 4, hìu bơnhă bi Liêng Hót Ha Ngát neh rơcang wil tơl sră măi, sră cih, àu mpha, gai cih bàr nă kòn in, dùl nă kòn bơsram ơdŭ 11, dùl nă kòn bơsram ơdŭ 4. Ơm kis tàm sàh uă kal ke, rài kis gam uă siơ̆u siar, mơya gơ wèt mờ bi Ngát, kơlôi rơcang ai broă bơsram sră oh kòn in là bơnah priă tă ờ gơtùi ờ geh. Bi đơs là, tàm dùl mpồl bơtiàn ngai sơlơ tam gơl pa, jơnau git wă là bơta nàng rơnàng kơnòm să in git tŭ niam mờ ờ gơtìp lời wơl hờ ngkời:

“Bơsram là kuơmàng ngan nàng tơnơ̆ do geh tŭ niam ai kòn sau he in dờng pràn rlau. Ờ gơtùi lời ală sau hờ ngkời. Tài tơnơ̆ do, măi mok sồ bơtàu tơnguh, hơ̆ sồng tam gơl pa dà lơgar tai kờñ ngan geh uă jơnau git wă, kờñ ngan geh bồ tơngoh bơsram sră krơi is. Bulah kal ke mơya pal pơn đơl ai ală kòn in lòt bơsram”.

Bơta chờ hờp là bơta kơlôi sơnơng hơ̆ ngai sơlơ gơ rề uă tàm ală thôn, ƀòn tiah jơi bơtiàn dồ êt nă cau tàm càr Lâm Đồng. Pah dơ̆ lòt bơsram wơl, ală hìu bơnhă rơcang lài priă blơi sră măi, sră cih, àu mpha, phan ngui bơsram; ală hìu bơnhă gam kal ke kung lơh ngan sơl kơlôi rơcang, geh tŭ là leng càn nàng oh kòn in geh tơl phan lòt bơsram. Ờ mìng kơlôi rơcang tus ală jơnau kờñ tềng đap mat, uă hìu bơnhă gam gròi sền tus broă pơlam gùng oh kòn in tàm broă bơsram sră, bơsram broă lơh mờ sền gàr bơta niam chài. Khi git là, bơsram nàng geh bơta git wă, geh broă lơh, mơya kung là broă nàng rơnàng kơnòm să in sơlơ pin dờn cơnđuà jơng lik bơh thôn ƀòn. Bi Liêng Hót The, cau K’Ho ơm tàm Jơnum làng bol Bắc Tà Nung, sơnah ƀòn Cam Ly - Dà Làc đơs:

“Gơ wèt mờ hìu bơnhă den kung neh geh jơnau pơlam kòn in loh làng ngan bơhiàn yau là bơta tờm. Bơh hơ̆ tŭ ală kòn dờng den ală kòn lòt bơsram, lơh broă bal, tìp mat lơh kwèng tàm hìu bơsram rơp yal tơnggit ală bơyô tàm hìu bơsram in. Tơnơ̆ do ală kòn lơh broă tàm ală anih lơh broă lơi kung bè hơ̆ lơm, rơp gŏ pơn yờ să bè bơhiàn bơh yau he dê”.

Dilah bơta rơcang lài mè bèp dê lơh gơlik bơta tờm bơh hìu bơnhă, den tàm hìu bơsram, broă lơh rơcang ai nam bơsram pa in kung geh lam lơh bơh gờñ ngan. Tàm sàh uă kal ke Đam Rông 4, nam bơsram do geh rlau 4 rbô 300 nă kơnòm bơsram bơh kâp mầm non tus kâp 2, uă ngan là oh kòn làng bol jơi bơtiàn dồ êt nă cau. Ală hìu bơsram geh bơcri priă lơh dờng niam, sàng goh; ơdŭ bơsram, ƀlàng hìu bơsram mờ ală bơta pal geh nàng drơng bơto bơtê, bơsram in geh rơcang wil tơl. Pơgru Phạm Thị Ngọc Bích - Lam bồ Hìu bơsram Mầm non Dà Tông, sàh Đam Rông 4 pà git:

“Tàm hìu bơsram, ơdŭ bơsram den pơgru jơh nùs ngan bơt bơtàu anih bơsram niam bơnĕ. Tus ơdŭ bơsram, kơnòm bơsram geh bơto ală broă lơh dipal den tàng gơ hòi gơ jà ngan ală oh. Hìu bơsram Mầm non Dà Tông kung sùm bơyai lơh ală broă lơh tìp mat lơh kwèng geh bơta sền gŏ mè bèp, pơgru mờ kơnòm bơsram dê, bơh hơ̆ den mè bèp ngai sơlơ iang nùs pơyua kòn tus hìu bơsram”.

Lâm Đồng tŭ do geh 100 sàh gơ wèt tiah làng bol jơi bơtiàn dồ êt nă cau mờ tiah kơh bơnơm; tàm hơ̆ geh 27 sàh uă kal ke, 5 sàh tiah nhàr lơgar mờ tiah is ồn Phú Quý. Gùt càr geh rlau 182 rbô nă kơnòm bơsram jơi bơtiàn dồ êt nă cau. Tàm ală tiah gam uă kal ke, gùng bơsram sră neh lơh gơlik tŭ niam git jơnau git wă, gơ gơs là dùl tàm ală bơta tờm dong làng bol tam gơl rài kis.

Ồng Ntơr Ha Krong ơm tàm thôn Dà Nhinh, sàh Đam Rông 4 geh 3 nă kòn neh lik klờng đại học. Bơh jơnau hìu bơnhă ồng dê, ồng sơlơ pin dờn là, geh jơnau git wă den làng bol hơ̆ sồng geh tai pràn jak nàng lơh tờm rài kis, bơh lơh sa tus git ngui ală gơguh jak pa:

“Rài yau den bơsram ờ huan uă, mơya tŭ do dilah ờ git sră den ờ gơtùi lơh broă lơi. Bulah he ờ lơh broă lơi dờng, mìng git sơngka sền gàr chi tam halà gơtùi bơsram dồ êt bè sơnơm tơmba kung kờñ pal git sră sơl. Tŭ do, dilah cau geh priă jền den lòt bơsram đại học lơm. Bơh git sră den hơ̆ sồng gơtùi bơtàu tơnguh tơl gah tàm rài kis”.

Sap sơng gơr sơn đờm mut nam bơsram pa neh mpong ntas tàm làm gùt ală thôn, ƀòn tàm càr Lâm Đồng, cèng bal bơta nggồr chờ lài mờ nam bơsram pa. Bơta chờ hờp hơ̆ gơ mpờl gŏ bơh bơta bơcri priă gơnoar atbồ dê ai broă lơh bơto bơsram in, bơta jơh nùs ală pơgru dê, tus bơta kơlôi rơcang, lơh ngan tơl hìu bơnhă làng bol jơi bơtiàn dồ êt nă cau dê. Do là bơta nàng ală kơnòm bơsram tiah jơi bơtiàn dồ êt nă cau càr Lâm Đồng dê in pin dờn mut tàm ơdŭ bơsram, dờng pràn cih tai tơnơ̆ do àng gơ crà tàm ƀòn tờm he dê tơn.