Tam klăc: jơnau ngan bơh tơl tŭ tơngai dê, broă rơndăp lơh sùm sùm bơh Đảng dê

“Tam klăc, tam klăc, tam klăc dờng- Cồng nha, cồng nha, cồng nha dờng”- Jơnau đơs ờ tŭ lơi roh bơh Củ tịc Hồ Chí Minh dê bơh gùl rài XX tus tŭ do kung gam sùm bè ờs bơta kwơ jơnau gơlik geh pah ngai dê. Tŭ jơh gùt lơgar neh mờ gam lơh jăt jơnau sồr rơndăp tăp sèng, tơrmù dipal mpồl lơh broă mpồl kwang bàng bơh ală anih lơh broă cíñ trị dê; tơmŭt bal ală mpồl lơh broă sră pơ àr gơnoar ătbồ, “rơndăp tăp sèng wơl dà dờng brê bơnơm”, rơndăp wơl ù tiah bơtàu tơngguh kơ̆ kơl jăp ai dà lơgar in, nùs nhơm tam klăc sơlơ pal geh lơh jăt pràn kơldang rlau mờ tŭ lơi jơh.

Tàm jơnau kah yau bơ̆t bơtàu dà lơgar mờ sền gàr dà lơgar bơh jơi bơtiàn Việt Nam dê, nùs nhơm tam klăc sơlơ geh tơnggŏ loh mờ gơgơs dùl bơhiàn kwơmàng ngan. Kơnờm tam klăc, bol he ai bơta sơbơng roh gơgơs bơta lơngăp lơngai, lơh tơn roh jơh ală jơnau jòi kai “tam cah is, lơh aniai” bơh cau sò tơm dê.

Bơh tŭ pa tơlik măt tơn, Đảng Kộng sản Việt Nam neh kơ̆ dơn gùng lòt tam klăc dờng jơh gùt jơi bơtiàn, sền hơ̆ là jơnau kờñ mờ là anih bơta pràn lơh nền jai pha broă lơh kăc màng dê. Bơh nam 1943, Đảng he neh ai geh Sră cih tơngume tờm niam chài Việt Nam bal mờ pe bơta pal jăt hòi jà, tàm hơ̆ geh “làng bol lơh bal”- tơl broă pal tài bơta kwơ làng bol dê, hòi tơrgùm geh gal ngan làng bol lơh bal.

Đảng he neh ai lơh jăt uă jơnau lơh nền tàm pơrjum mìng dùl tơngume bè ngui niam bơta pràn tam klăc dờng. Jơnau lơh nền tàm pơrjum sồ 23 nam 2003 dơ̆ sơnrờp cih kơnòl broă “ngui bơta pràn tam klăc dờng jơh gùt jơi bơtiàn tài làng bol pas sơm, lơgar pràn, mpồl bơtiàn ring bal, làng bol lơh tờm, jak chài”. Tơnơ̆ 20 nam, tus nam 2023, Đảng pơn jăt tai ai lơh jăt Jơnau lơh nền tàm pơrjum 43 bè tơngguh tai bơhiàn ờs mờng bơh yau mờ bơta pràn tam klăc dờng tàm tŭ tơngai pa.

Jơnau sồr ờ gơtùi pleh klàs bơh tam gơl pa dê

Dà lơgar he gam lơh kràñ cê jơh nùs jơnau sồr tam gơl pa, lơh tam gơl wơl pràn kơldang mpồl kwang bàng mpồl lơh broă bơh ală anih lơh broă cíñ trị dê; rơndăp tăp sèng wơl mpồl lơh broă sră pơ àr gơnoar ătbồ ală kâp mờ lam lơh broă broă lơh tơrlòng lài gơnoar ătbồ ƀòn lơgar bàr kâp. Jơnau kờñ là tơrmù dipal mpồl lơh broă, tơngguh uă pràn lơh broă, cồng nha ătbồ, ătbồ broă dà lơgar, mơkung lơh jăt pà kâp, pà gơnoar pràn kơldang rlau ai ƀòn lơgar in. Broă lơh tơrlòng lài do ờ mìng sơrbì tĕ kâp di gùl ờ geh kwơ, mờ bơta kwơmàng rlau tai là rơndăp wơl ù tiah ai bơtàu tơngguh kơ̆ kơl jăp in, nàng gơnoar ătbồ rềp làng bol, wă wờng làng bol, tài làng bol, drơng làng bol in geh niam rlau; Dà lơgar kung neh tam pà mờ gĭt nền loh làng gơnăp gơnoar mờ jàu gơnoar rơcăng lài uă rlau ai gơnoar ătbồ ƀòn lơgar in nàng tơl tiah duh hồl, bơceh lơh, bơtàu tơngguh dipal mờ bơta geh ngan tàm rài kis.

Bulah bè hơ̆, broă tơrmù dipal mpồl kwang bàng mpồl lơh broă bơh ală anih lơh broă cíñ trị dê; rơndăp tăp sèng wơl mpồl lơh broă sră pơ àr gơnoar ătbồ dê kung gơdờp, gơrềng tus dùl bơnah kwang bàng, đảng viên, kông cưk…Bơta hơ̆ gơ sồr bơta song dơ pă loh làng, rìng dùl nùs bal mờ jơh nùs lơh ngan cíñ trị uă ngan mờ is ồn là bơta hŭi tĕ bơta kwơ să tờm dê. Den tàng bè hơ̆, tam klăc tàm jơh ală anih lơh broă cíñ trị dê là gùng lòt lơh geh cồng nha bơh tam gơl pa do dê.

Tŭ tơmŭt bal ƀòn lơgar, ală kơlôi rơcăng bè măt hòi pa, anih hìu lơh broă, halà broă tam pà kwang bàng lơh broă ƀươn lơh gơlik nùs nhơm tàm pơndrờm cau geh cau ờ geh. Bơtơl tai tàm hơ̆, krơi is bè niam chài, bơhiàn mờng kwèng mờ bồ tơngoh bơtàu tơngguh đah ală mpồl lơh broă sră pơ àr kung gơ tơlik bơta lòng dờng. Broă tơmŭt bal đah càr tiah bơnơm mờ càr tiah ring, halà đah càr “pas” mờ càr “rƀah” gơ sồr mpồl cau đơng lam pal mùl màl song niam loh làng mờ geh bồ tơngoh sền sơnơng, nàng kờñ gàr niam tàm pơnring bơta pràn mờ bơnĕ bơnài bal bơta kwơ bơtàu tơngguh.

Dilah ờ tơl tam klăc, ring bal dùl nùs rơ̆p lơh ờ di gùng halà lơh kơryan cồng nha lơh broă mpồl lơh broă dê. Tài bè hơ̆, sền gàr tam klăc hơ̆ ngan là kơnòl broă kwơmàng khà dùl, là bơta lơh nền lài ngan nàng tơl broă lơh tam gơl pa ndai geh lơh ƀươn ƀoài. Nàng sền gàr mờ lơh kơ̆ kơl jăp tam klăc tàm ù tiah bơtàu tơngguh pa, kờñ pal lam lơh dùl ròt bàr pe broă lơh kwơmàng tơnơ̆ do:

Dùl là, tơngguh tai bơta đơng lam mờ sồr lơh ring bal. Tơl gùng dà, broă lơh tŭ lơh mờ lơh jăt ndrờm pal ơn bơta kwơ làng bol dê lơh tờm, tàm pơgồp bal kơ̆ kơl jăp bơta gơrềng đah Đảng mờ Làng bol, lơh bè lơi nàng làng bol wờng, dòn kơnờm, ring bal mờ jơh nùs kờñ bal.

Bàr là, yờ tơnguh uă kơnòl lơh krơh bơh kwang bàng, đảng viên dê, ngan là kwang bàng đơng lam. Tơl nă kwang bàng, đảng viên pal ngan ngồn là krơh àng bè sền gàr tam klăc dơlam is mpồl, sùm ơn bơta kwơ bal hơđăng rlau jơh bơta kwơ să tờm dê.

Pe là, pơn jăt tai lơh sir gùng dà broă lơh, kơrnoăt boh lam nàng kờñ gàr niam bơnĕ bơnài bơta kwơ mờ ndrờm bal mpồl bơtiàn. Pal pơn jăt tai lơh, ai lơh jăt mờ lơh jăt ală broă dong kờl dipal, geh kwơ ngan ngồn gơ wèt mờ ală ƀòn lơgar mờ kwang bàng kong gơdờp dê; bơh ală broă lơh dong kờl tus broă lơh gàr niam lơngăp lơngai rài kis mpồl bơtiàn, bơcri priă phan bơna ai ală ƀòn lơgar pa tơmŭt bal in.

Puan là, lơh pràn broă lơh bồ tơngoh, mblàng yal jrô ơnàng làm uă tàm jơh tơl nă kwang bàng, đảng viên, mờ ală rơnàng làng bol bè bơta jơnau gơtha, bơta kwơ bơh broă rơndăp tăp sèng, tơrmù dipal mpồl lơh broă, dong tơl nă cau gĭt wă loh do là jơnau sồr dipal ngan, kờñ ngan mờ geh kwơ ai bơtàu tơngguh jŏ jòng bơh dà lơgar dê in, bơh hơ̆ dùl nùs bal, lơh jăt is.

Pram là, lơh jăt pràn kơldang “nùs nhơm Đảng” mờ nùs nhơm kơ̆ dơn cíñ trị tàm tơl mpồl Đảng mờ tơl nă đảng viên dê. Mìng tŭ ring bal bè bồ tơngoh mờ lơh broă bơh hơđang tus hơđơm, bơh dơlam tus bơdìh, mpồl tam klăc jơh gùt Đảng mờ jơh gùt làng bol hơ̆ sồng kơ̆ kơl jăp, lơh geh bơta pràn nàng lơh gơs niam kơnòl broă rơndăp tăp sèng wơl mpồl lơh broă, lam dà lơgar mŭt tàm dùl tŭ tơngai bơtàu tơngguh pa.

Bơh bơta đơng lam àng sơrdah Đảng dê, mờ nùs nhơm kơ̆ dờn mờ bồ tơngoh jak bal bal mờ bơhiàn tam klăc dờng jơh gùt jơi bơtiàn kơ̆ kơl jăp, broă lơh tơrmù dipal mpồl kwang bàng mpồl lơh broă bơh ală anih lơh broă cíñ trị dê; rơndăp tăp sèng wơl mpồl lơh broă sră pơ àr gơnoar ătbồ mờ lam lơh broă gơnoar ătbồ ƀòn lơgar bàr kâp ngan ngồn rơ̆p lơh geh cồng nha niam bơnĕ, lơh geh bơnàng jă lam dà lơgar mŭt tàm tŭ tơngai bơtàu tơngguh pa bè Jơnau lơh nền tàm pơrjum bơh Pơrjum dờng dơ̆ XIII Đảng dê neh ai. Bơta pràn bơh tam klăc dê dùl dơ̆ tai rơ̆p dong bol he sơrlèt rlau jơh ală bơta kal ke gơ kơryan, ai bơta lòng gơgơs tŭ niam, lam dà lơgar kơ̆ kơl jăp cơnđoà mŭt tàm rài pa, rài pas sơm, mŭt gơrờm bal mờ bơtàu tơngguh jŏ jòng tài rài kis hờm ram, gơboh gơbài bơh Làng bol dê.