Thuột, càr Dăk Lăk pa geh tơmŭt Đảng nhai 01 nam 2025 do. Bi Y Quân đơs, gŏ ală đảng viên tàm ƀòn là ală cau lơh krơh, geh bơngă pin dờn geh làng bol dòn kơnờm kờñ gơboh den tàng bi lơh nền pơnđơl gơgơs đảng viên. Bal mờ broă lơh niam gơnoar broă bơh dồ nă cau lơh broă tàm Mpồl đơs crih tam ya jơi bơtiàn Dăk Lăk, Y Quân gam jơh nùs tus bal ală srơh đoàn ƀòn lơgar. Bi bal mờ ơruh pơnu tàm ƀòn sùm bơyai lơh ală broă lơh niam chài- đơs crih tam ya, hòi jà làng bol prăp gàr mờ ngui niam bơhiàn niam chài krơi is jơi bơtiàn he dê. Y Quân, yal: “Să tờm añ chờ hờp ngan geh tơmŭt tàm Đảng Kộng sản Việt Nam. Añ rơ̆p sùm sùm lơh ngan ai jơh pràn bơsram, bơsram tàp nàng dipal là cau đảng viên”.

Ồng Lê Văn Nhuần, Ƀí thư Ci ƀộ ƀòn Alê A, sơnah ƀòn Ea Tam, ƀòn dờng Buôn Ma Thuột, càr Dăk Lăk pà gĭt: broă lơh bơtàu tơngguh đảng là kơnòl broă cíñ trị geh ƀòn lơgar ai lài khà dùl. Tài bơh ƀòn lơgar geh rlau 90% khà kờp làng bol là kòn cau Rơđê, uă làng bol pal lòt lơh sa ngài den tàng cau tơmŭt đảng tìp ờ dồ êt kal ke gơkòl. Bulah bè hơ̆, nam 2024, Ci ƀộ kung gam tơmŭt geh 2 nă đảng viên pa. Ồng Lê Văn Nhuần pà gĭt, jơh gùt ci ƀộ neh geh 76 nă đảng viên; lơh jăt geh gơnoar broă, kơnòl broă he dê, ngan là mblàng yal, hòi jà làng bol tàm bơtàu tơngguh lơh sa- niam chài- mpồl bơtiàn, sền gàr niam dà lơgar lơngăp lơngai mờ bơ̆t bơtàu ală anih lơh broă cíñ trị tàm kâp hơđơm.

“Geh bal đảng viên gam pơrjum ci ƀộ tàm do, halà đảng viên pơrjum tiah ơm kis ndrờm tus bal lơh niam ală srơh tàm pơrlòng ƀòn lơgar dê. Is ồn là ală oh mi đảng viên tiah ơm kis tă pơgồp uă ngan geh bal bè phan bơna, nùs nhơm mờ geh jơnau đơs nàng bơ̆t bơtàu ƀòn lơgar. Den tàng ƀòn lơgar bol hi dê nam lơi kung geh lơm kâp hơđang đơs niam, ngan là ală srơh làng bol”.

Gơ wèt mờ ală ƀòn lơgar geh gal làng bol jơi bơtiàn dồ êt nă cau ơm kis, broă sền gŏ tề lam, bơtàu tơngguh đảng viên ờ mìng ƀươn ƀoài là là săc rwah cau nă să is pơnrơ ngan mờ gam là ală broă lơh tề lam, tơngguh uă gĭt wă cíñ trị mờ lơh tơngkah wơl bơta pràn mpồl bơtiàn dê. Pơnrơ ngan bè sàh Yang Tao, kơnhoàl Lăk, càr Dăk Lăk tiah geh tus 95% jơi bơtiàn dồ êt nă cau ơm kis mơya mờ bơta jơh nùs lơh ngan “bơ̆t bơtàu, bơtàu tơngguh ci ƀộ pràn kơnhăp” tơl mpồl đảng neh geh broă rơndăp lơh, geh Jơnau lơh nền tàm pơrjum bè broă jàu bơtàu tơngguh đảng viên pah nam. Bal mờ hơ̆, ală đảng viên tàm tơl ci ƀộ, jơh nùs lơh krơh lòt lài, lơh bơta lòng gơgơs tŭ jiơ niam tàm bơtàu tơngguh lơh sa- mpồl bơtiàn tàm ƀòn lơgar. Ồng Y Wu Sruk, Phó Củ tịc Anih duh broă Làng bol sàh Yang Tao, kơnhoàl Lăk pà gĭt: “Añ wă wờng geh adăt bơhiàn mờng kwèng tiah do, is ồn là tàm ngui dà đơs tơm bơh bơr he ƀươn yal mờ làng bol. Hơ̆ sồng gĭt geh bơhiàn mờng kwèng ơm kis bơh làng bol dê, he gĭt wă geh kal ke làng bol dê. Bơh tàm bơta wă wờng hơ̆, den he lơh jăt, ai ală gùng dà jơnau sồr Đảng dê, kơrnoăt boh lam Dà lơgar dê tus mờ làng bol nàng làng bol in gĭt geh mờ đòm jăt tàm rài kis".

Gĭt wă loh bơta kwơmàng bơh broă lơh bơtàu tơngguh đảng viên dê, đơng lam gơnoar ătbồ càr Dăk Lăk neh mờ gam lam lơh uă broă lơh nàng kờñ ai tơl bơta ƀươn ai ală đảng viên in, is ồn là ală đảng viên jơi bơtiàn dồ êt nă cau tus bal tàm mpồl đảng dê. Bal mờ hơ̆ geh ală broă lơh dong kờl bè bơto, tề lam cribơyai jơnau tàm sră pơ àr, lơh geh anih ƀươn ƀoài ai pơrjum đảng tàm tiah sar, tiah ngài in, neh pơgồp bơnah tơngguh uă cồng nha ătbồ mờ đơng lam lơh jăt bơh gơnoar ătbồ dê. Ồng Lê Nam Cao, Phó Lam bồ Mpồl Rơndăp broă kwang bàng càr Dăk Lăk pà gĭt: “Kâp ủy ală kâp sền ngăc rơcăng mpồl cau săc rwah là oh kòn jơi bơtiàn dồ êt nă cau dê nàng hơ̆ sồng pơyua tơmŭt tàm ală hìu bơsram kâp pe jơi bơtiàn ơm sa tơn tàm hìu bơsram kâp kơnhoàl mờ kâp càr. Dơ̆ bàr tai là lơh jăt broă dong kờl sồr rwah gơ wèt mờ oh kòn làng bol jơi bơtiàn dê rơ̆p rwah ai lơh broă mờ rơndăp ơn tàm ală anih lơh broă. Bơh ală broă rơndăp ơn do rơ̆p là mpồl cau kwơmàng ngan nàng rơcăng mpồl đơng lam ătbồ ală kâp in”.

Mờ bơta krơi is lơh sa- mpồl bơtiàn, is rơmis làng bol ơm kis càr Dăk Lăk dê, broă sơlơ bơtàu tơngguh tai đảng viên tàm  tiah làng bol jơi bơtiàn dồ êt nă cau ờ mìng geh gơtha cíñ trị lơm mờ gam pơgồp bơnah dong kờl bơta tam gơl tơl làm tàm ƀòn lơgar. Ngan ală đảng viên jơi bơtiàn dồ êt nă cau gam là “mpồl cau” jơh nùs ngan ai jơnau sồr, jơnau lơh nền tàm pơrjum Đảng dê tus mờ làng bol, bơ̆t bơtàu bơta pin dờn bơh làng bol dê gơ wèt mờ Đảng; là dang che tàm bơrkuăt đềt mềr ngan mpồl tam klăc dờng ală jơi bơtiàn; bơ̆t bơtàu bơhiàn mờng kwèng ơm kis jak chài; dong kờl làng bol bơtàu tơngguh lơh sa, pơgồp bơnah uă ngan lơh jăt ală jơnau kờñ bè bơtàu tơngguh lơh sa- mpồl bơtiàn tơngguh uă pràn jak đơng lam, pràn tam lơh, bơ̆t bơtàu mpồl đảng, ală anih lơh broă cíñ trị ngai sơlơ sàng goh, pràn kơnhăp.