Ồng đơs wih đơs wơl do ờ mìng là gùng dà broă lơh lơh broă lơm mờ gam là gùng dà broă lơh jơi bơtiàn, gùng dà broă lơh gơmù rƀah, gùng dà broă lơh bơtàu tơngguh kòn bơnus mờ lơh kơ̆ kơl jăp bơta pin dờn làng bol dê. Tổng Bí thư, Chủ tịch lơgar sồr: Bơto bơtê broă lơh mờ bơto bơta chài lơh broă pal gơ jăt bal mờ broă lơh broă sa ngan ngồn bơh tơl tiah, tơl jơi bơtiàn, tơl mpồl bơtiàn dê, bañ rồn bơklơn broă lơh tơrlòng lài bal, bañ bơto jăt srơh.

Pal tơrgùm tàm broă lơh sa sươn sre phan bơkah pơnrơ is, lơh sa brê, chi lơh sơnơm, ròng siam, lơh mờ tê ờs mờng bơh yau, lòt nhơl mpồl bơtiàn, sền gàr mờ bơtàu tơngguh brê; rề ơnàng tàm tơrbŏ drà drơng broă sa priă broă lơh ai cau lơh broă tàm tiah làng bol jơi bơtiàn dồ êt nă cau in. Dà lơgar dong kờl phan bơna bơ̆t bơtàu càn priă, yal tơngĭt jơnau, bơto pơlam kơrnoăt boh lam; mpồl lơh sa kă bro, mpồl lơh broă bal, anih lơh gơlik phan, lơh bal blơi phan pơlam bơta chài, lơh măt kă bro, jơnau sồr bơta niam; ƀòn lơgar lam tàm tơrbŏ lơh broă niam lơngăp lơngai, tơrmù ƀà ntrờn ơm kis is, pleh lời làng bol jơi bơtiàn dồ êt nă cau gơtìp sơmờm, gơtìp pơrlồm.