Ală priă bơh ală Tập đoàn Samsung, Intel, Foxxcon, Amkor…dê kung gam gơlòt mŭt tàm lơgar Việt Nam. Is nam 2024, FDI tă pơgồp 16,5% kờp jơh priă bơcri jơh gùt mpồl bơtiàn, mờr 72% kờp jơh priă geh bơh tăc phan mờ lơgar ndai, rlau 20 tơmàn dolar Mỹ mŭt tàm kes priă dà lơgar. Bal mờ hơ̆, tơrgùm kờp ờ hềt tơl pà gŏ, tiah FDI neh pơgồp bơnah lơh gơlik pơgăp rlau 5 tơlak broă lơh, tơnguh uă cồng nha mpồl cau lơh broă mờ cèng wơl priă lơh geh pin dờn ai cau lơh broă in. Thứ trưởng Ƀộ Priă jền ồng Đỗ Thành Trung, đơs sùm: “Bè đah Cíñ phủ, bol hi jơh nùs lơh ngan lơh tam gơl pa jrô ơnàng làm uă tàm uă broă, bơh broă dong kờl dia, sră pơ àr tă dia phan kă bro mờ lơgar ndai tus ală broă lơh bơcri priă. Jơnau kờñ là tơngguh uă cồng nha lơh geh, tơn rŭc lơyah tŭ jiơ lơh bơsong, tơrmù priă tă lơh mờ pơgồp bơnah ai tơl bơta ƀươn ngan rlau jơh ai mpồl lơh sa kă bro in bơcri priă lơh sa, kă bro tàm Việt Nam”.

Jăt ală cau gĭt wă jrô, tàm tơngai dunia gam geh uă tam gơl, lơh ntrờn tam gơl ală anih lơh gơlik phan gùt plai ù. Ală priă FDI tàm dunia kung rơhời tam gơl jăt gùng dà tơrmù kơnờm tàm dùl dà lơgar mờ ala mờ gơguh tai bơcri priă tàm ală broă lơh măy mŏk pa, bồ tơngoh gĭt wă kòn bơnus lơh is kung bè pơgồp bal mờ ală jơnau sồr tơrmù tơlik nhơm ƀơ̆ tus tiah ơm kis. Bal mờ hơ̆, jơnau lơngăp lơngai ală anih lơh gơlik phan mờ kơ̆ kơl jăp cíñ trị ngai sơlơ geh sền là bơnàng jă tàm ală lơh nền bơcri priă.

Gơ wèt mờ Việt Nam, bơta ƀươn tàm pơrlòng ờ mìng tus bè bơta dờng dềt drà kă bro mờr 100 tơlak nă làng bol mờ khà ngui sa hìu bơnhă sơrbăc mhar, mờ gam kơnờm mpồl 17 jơnau kĭ hơ kă bro phan khăt gơboh, tàm hơ̆ geh uă FTA rài pa bè CPTPP, EVFTA mờ RCEP…Là dùl tàm ală rài lơh sa geh bơta pờ uă ngan rlau jơh dunia, mờ khà priă lơh geh bơh kă bro phan tàm GDP gơguh tus mờr 200%, bal mờ ală phan bơna sùm geh lơh ơnàng, tiah kă bro geh lơh niam, cíñ trị kơ̆ kơl jăp mờ broă dong kờl ai lài lơh gơkờñ ngan, Việt Nam pơn jăt tai là anih tus niam ngan ai ală priă FDI in.

Ồng Chaturon Thipphiansak, Phó Kwang Lam bồ dờng Kông ty Trač ñiệm hữu hạn SCG Việt Nam, là dùl mpồl lơh sa kă bro lơh lài tàm bơtàu tơngguh tơlir mờ kơ̆ kơl jăp geh jơnau sồr bè do: “Ală mpồl lơh sa kă bro pal geh broă rơndăp lơh ƀòn lơgar lơh mờ tơnguh uă jơnau tơl pràn gơdờp nàng drơng mờ ală gơ tam gơl bè lơh sa gùt plai ù, priă tă ñiên liệu mờ anih lơh gơlik phan tơlir, halà ală jơnau sồr ESG kràñ cê ngan. Tàm SCG, bol hi sền bơta tam gơl do là tŭ niam nàng lơh lài bơh ală phan bơna kơ̆ kơl jăp, lơh broă kă bro geh nùs nhơm mờ gĭt gơ̆p tam klăc lơh broă bal pràn kơldang, pơgồp bơnah chồl tơngguh ală broă lơh gơguh tơlir bơh lơgar Việt Nam dê”.

Việt Nam gam mŭt tàm tŭ tơngai bơtàu tơngguh pa bal mờ bơta kơ̆p kờn sùm tơngguh mhar nàng lơh geh 2 tŭ jơnau kờñ bơtàu tơngguh kwơmàng tàm nam 2030 mờ 2045. Broă tờm là sơrlèt jơnau pơhìn gơtìp gơlời wơl, pleh gơtìp gơ ơm tàm dă priă lơh geh di mơ. Tàm hơ̆, khà gơguh lơh sa pal geh rlau 8% tàm nam 2025 mờ pơnđơl 2 nơm khà tàm tơngai pơn jăt tai. Bulah bè hơ̆, jơnau kờñ do geh gơ tơlik tàm tŭ tơngai dunia gam tam gơl sơrbăc mhar, kal ke gơtùi gĭt lài, ngan là ală tam gơl broă lơh dong kờl dia tăc blơi phan mờ lơgar ndai bơh lơgar Mỹ dê, dà lơgar geh gơrềng dờng tus ală gùng lòt kă bro phan mờ bơcri priă gùt plai ù. Mò Trần Thị Hồng Minh, Lam bồ Anih Kơlôi sơnơng Broă lơh dong kờl mờ Broă rơndăp lơh pà gĭt: “Jơnau kờñ bơh ală broă lơh do dê nàng kờñ wèt tus broă tàm tơngai mờr tus, bol he rơ̆p lơh gơs dùl broă rơndăp lơh FDI tàm rài pa nàng lơh geh cồng nha mờ bơta lơh gơrề bơh ală mpồl lơh sa kă bro FDI dê tàm rài lơh sa lơgar Việt Nam dê, dùl broă mờ tàm uă nam do bol he neh kơ̆p gơn sùm. Mờ do kung là ală jơnau yal kwơmàng ngan nàng ală anih lơh broă Đảng, Dà lơgar lơh jăt rơndăp gùng dà broă lơh dong kờl gơrềng tus bơtàu tơngguh lơh sa Việt Nam dê tàm tơngai tus mờ is ồn là jơnau kờñ nàng bol he lơh geh khà gơguh 2 nơm khà tàm tơngai bơh nam 2026- 2030”.

Gơn kơnờm là, bal mờ ală broă lơh bơsong loh làng bơh ală ƀộ gah, bơta lòt bal bơh mpồl bơtiàn bơtiàn mpồl lơh sa kă bro dê, Việt Nam rơ̆p kơlôi lơh geh dùl tiah bơcri priă tàm pơrlòng, pa ngan, geh cồng nha- ờ mìng ai mpồl lơh sa kă bro tàm lơgar in lơm mờ jơh bal gah mpồl lơh sa kă bro FDI neh, gam mờ rơ̆p rwah Việt Nam là anih tus.