Pơrjum dờng geh bơta tus bal bơh 146 nă cau ala mat ai rlau 7 rơbô nă đảng viên. Pơrjum dờng neh ring bal Jơnau lơh nền bơh Mpồl Lơh kơnòl broă sùm Tỉñ ủy càr dê bè sồr Mpồl Duh broă Đảng ƀộ sơnah ƀòn Buôn Ma Thuột tơngai lơh broă bơh nam  2025-2030 geh 28 nă kwang bàng. Ồng Từ Thái Giang, Kwang bàng Mpồl Lơh kơnòl broă sùm Tỉñ ủy càr geh sồr at gơnoar broă Ƀí thư Đảng ủy sơnah ƀòn.

Tus bal sồr lơh tàm Pơrjum dờng, ồng Nguyễn Đình Trung, Ƀí thư Tỉñ ủy càr Dăk Lăk pin dờn, bal mờ bơta pơlam gùng loh làng mờ jơh nùs lơh ngan uă, Đảng ƀộ mờ Làng bol sơnah ƀòn Buôn Ma Thuột rơ̆p pơn jat tai cơnđòa kơ̆ tàm gùng lòt bơtàu tơnguh, di pal mờ gơnoar broă là sơnah ƀòn tờm, pơgồp bơnah kwơ màng tàm bơta dờng pràn bơh càr Dăk Lăk dê tơngai lơh broă bơh nam 2025-2030 mờ ală nam pơn jat tai.