Anih tờm drơng broă sră pơ-àr gơnoar atbồ dà lơgar sơnah ƀòn Tân Lập, càr Dăk Lăk neh geh uă bơta phan lơh broă pa, mờ geh pơnrơ ngan là bàr măi tíñ neh geh crăp lài bơta ngăc kòn bơnus lơh gơs (AI), dong kờl làng bol jòi, jào sră nggal mờ sền broă lơh sră pơ-àr gơnoar atbồ lơgar tàm internet. Bi Lê Văn Toàn tus lơh sră pơ-àr yal deh kòn pà git, bi geh cau lơh broă tàm do bơto sồr ngui măi mok pa AI geh cồng nha ngan:  “Ală bơyô đoàn viên ơruh pơnu dong kờl añ yal jơnau, tơnơ̆ mờ hơ̆ măi lip is sră. Broă lơh sră yal deh kòn tŭ do geh tơmŭt bal mờ tơngu me jơnau yal hìu ơm bal mờ sră sền gàr, den tàng ƀuơn ngan. Pơgồp bal AI tàm broă lơh sră pơ-àr dong kờl tơrmù tơngai uă ngan, broă lơh ƀuơn rơlao uă ngan”.

Tàm Anih tờm Drơng broă  Sră pơ-àr gơnoar atbồ dà lơgar sơnah ƀòn Tân Lập, geh 9 nă cau lơh broă bal mờ 1 nă kwang bàng ƀưu điện drơng broă dờp mờ tơrwơl sră pơ-àr bơh broă lơh ƀưu điện dê, bal mờ 4 nă đoàn viên ơruh pơnu dong kờl làng bol lơh sră nggal. Lŏ Lê Thị Nguyên Hạnh, kwang bàng ƀưu điện pà git pah ngai lŏ dong kờl bơh 30 tus 40 nă làng bol ngui broă lơh AI nàng yal broă: “Añ rơ̆p jòi tàm phần mềm AI, tơnơ̆ mờ hơ̆ làng bol kờñ lơh sră pơ-àr lơi den làng bol tơrmŭt tàm sră nggal tàm măi tíñ den sră nggal geh tơngŏ. Bè bi do kờñ lơh sră dan tam gơl tơngu me kă bro den phần mềm AI rơ̆p ai geh ală broă lơh nàng sồr geh ală sră nggal pal lơh, tơnơ̆ mờ hơ̆ añ rơ̆p bơto sồr làng bol nàng làng bol rơcang sră nggal pal geh, tơnơ̆ mờ hơ̆ añ rơ̆p bơto sồr làng bol jùt sră hơ̆ sồng jào tàm internet nàng tơrmù broă lơh sră nggal ai kwang bàng in bơsong tàm dơlam”.

Ngui AI tàm lơh broă sră pơ-àr gơnoar atbồ dà lơgar,  sơnah ƀòn Tân Lập ngui bàr bơta phan ngui  bơh Viettel mờ VNPT. Dùl bơta phan ngui dong kờl kwang bàng lơh broă jòi sền jơnau tơngit sră pơ-àr mhar; phan gam tai tơrgùm tàm broă dong kờl làng bol lơh sră nggal tàm internet. Kờp bơh ngai 01 nhai 7 tus tŭ do, rơlao 900 pang sră neh geh dờp, tàm hơ̆ rơlao 400 pang sră geh bơsong tàm internet, khà gam tai bơh broă lơh drơng ala bal mờ broă lơh drơng ala ƀưu điện dê.

Ồng Nguyễn Mạnh Hà, Phó Củ tịc Anih duh broă Làng bol sơnah ƀòn, Kwang lam bồ Anih tờm Drơng broă Sră pơ-àr gơnoar atbồ dà lơgar sơnah ƀòn Tân Lập đơs nền, broă ai AI ngui tàm broă dờp mờ bơsong sră nggal ờ mìhg dong kờl kwang bàng lơh broă di pal jơh mờ gam tơnguh bơta niam broă lơh drơng ala ai làng bol in: “Bol añ neh yal mblàng uă ai làng bol in git. Làng bol tus lơh broă tàm Anih do, bol añ ai ală oh mi bơto sồr làng bol lơh ală sră nggal mhar rơlao. Tŭ do gam lơh mờ tê, tơnơ̆ do rơ̆p kơlôi tus mờ măi, he lơh sră nggal mìng đơs mơ mờ măi rơ̆p ai wơl”.

Broă ngui AI tàm sơnah ƀòn Tân Lập là dùl bơnah tàm broă lơh tam gơl sồ gùt càr dê. Ngai 10 nhai 7 pa do, càr Dăk Lăk neh mùl màl sơn đờm mŭt ngui 4 bơta măi mok sồ tờm drơng broă lơh gơnoar atbồ bàr kấp in: hơ̆ là măi mok pa kòn bơnus lơh gơs nàng dong kờl làng bol jòi, jào sră nggal; măi mok drơng ala broă lơh tàm internet; dashboard (phan ngui lơh) tơrgùm bal broă lơh drơng ala đơng lam ală kấp; mờ phan bơsong jơnau đơs bơh mpồl bơtiàn.

tơnơ̆ mờ tŭ sền mùl màl broă ngui bơta ngăc ngar kòn bơnus lơh gơs tàm broă bơsong sră pơ-àr gơnoar atbồ dà lơgar tàm ală sàh sơnah ƀòn, ồng Đỗ Hữu Huy, Phó Ƀí thư Tỉñ ủy càr, Phó Lam bồ Mpồl duh broă sùm Mpồl Sồr lơh bè bơtàu tơnguh jak chài, măi mok, tam gơl pa bơceh lơh mờ tam gơl sồ càr Dăk Lăk đơs nền, do là broă sơn đờm lơh kwơ màng ngan nàng tơnguh uă cồng nha, pràn bơh broă lơh sră pơ-àr gơnoar atbồ dà lơgar tàm tơngai pa: “Tŭ tơrmŭt bal sơnah ƀòn, sàh den ù tiah dờng ơnàng rơlao, khà kwang bàng lơh broă gal mơya mờ bơta gal bal mờ broă lơh geh tam pà kấp ai sàh sơnah ƀòn in là uă ngan, den broă ngui AI là kwơ màng ngan. broă lơh den sơnah ƀòn là cau at tê sơn-io broă, là cau lơh broă tơn ală sră pơ-àr gơnoar atbồ dà lơgar den pal git loh mờ bơto sồr làng bol jòi di jơnau mờ làng bol kờñ bal mờ he bơsong mhar ngan”.

Broă càr Dăk Lăk rơcang lài ngui AI tàm broă bơsong sră pơ-àr gơnoar atbồ dà lơgar, sơn đờm bơh kấp sơnah ƀòn, sàh pà gŏ jơh nùs lơh ngan lơh jăt gơnoar atbồ sồ, tam gơl sồ gơ jăt bal mờ drơng broă làng bol in. Do kung là broă bơtàu tơngguh kwơ màng tàm ală tŭ bơ̆t bơtàu rài lơh broă sră pơ àr gơnoar ătbồ pa, song dơ pă loh làng, geh cồng nha.