Broă crơng gơs 5 Jơnum lơh broă ai tơnggŏ bơta lơh ngan tam gơl pa broă lơh đơng lam bơh càr Dăk Lăk dê jat gùng dà ơm rềp ƀòn lơgar, ai cau lam bồ tus tàm tiah lơh rơndap broă nàng sồr lơh, tă bơsong tơn bơta kal ke. 

Ồng Lương Nguyễn Minh Triết, Bí thư Tỉnh ủy càr Dăk Lăk pà git, ai ù lơh rơndap broă là bơnah broă tờm, lơh nền tus tơngai hơ pơrgon lam lơh ală rơndap broă lơh dờng mờ broă lam lơh jơnau kờñ gơguh lơh sa 2 nơm khà càr dê. Mùl màl ai gŏ, rơndap broă lơh lơi lơyài ai ù lơh rơndap broă den rơndap broă lơh hơ̆ lơyài lam lơh, priă jền bơcri lơh gơtìp gơ kòl, tŭ niam bơtàu tơnguh gơtìp lời tĕ. Jat Bí thư Tỉnh ủy càr Dăk Lăk, càr tŭ do geh 265 rơndap broă lơh gam gơtìp kal ke bè ai ù lơh. Broă crơng gơs 5 jơnum lơh broă dơ̆ do nàng kờñ tơrgùm tă bơsong bơta gơ kòl ndrờm bal tàm 102 sàh, sơnah ƀòn tàm gùt càr.