Pơnrơ ngan là rơndăp broă lơh Hìu măi lơh kơphe năng lượng bơh Tập đoàn Trung Nguyên Legend dê mờ kờp jơh priă bơcri di pơgăp 2 rơbô 200 tơmàn đong. Rơndăp broă lơh geh gùng dà broă lơh gơs mpồl lơh kơphe dờng, ngui măi mok pa, pơgồp bal tàm broă lơh tơnguh bơta kwơ gar kơphe Buôn Ma Thuột mờ lơh pràn bơtàu tơnguh lơh sa mờ măi mok lơh gơs phan.

Kung tàm ngai bal, tàm Tiah lơh sa mờ măi mok Hoà Hiệp, 3 hìu măi lơh broă mờ kờp jơh bơta pràn bơcri priă 770 tơmàn đong kung geh sơn đờm mŭt lơh, tàm hơ̆ geh hìu măi lơh phan sa ơn tàm kơl dung, lơh phơng sih mờ phan rơmooc, phan rơndeh pơn diang phan. Broă sơn đờm lơh dơ̆ lĕ ală rơndăp broă lơh ờ mìng ai geh bơta pràn gơguh lơh sa pa mờ gam ai tơngŏ bơta niam bơh tiah bơcri priă càr dê, pơgồp bal tàm broă lơh tam gơl lơh sa mờ bơtàu tơnguh lơh sa mờ măi mok kơl jăp.