Nhai 07 nam 2025, do là nhai sơnrờp tơrnơ̆ mờ tŭ càr Dăk Lăk lơh gơs broă tơrmŭt bal kấp càr mờ sàh, mpồl lơh broă gơnoar atbồ ƀòn lơgar pơn jăt tai geh lơh broă niam, gàr niam ală lơgar kờñ bơtàu tơnguh lơh sa mpồl bơtiàn, mờ tơrgùm uă ai broă rơcang Pơrjum dờng Đảng ƀộ càr dơ̆ XVIII, tơngai lơh broă bơh nam 2025 tus 2030.

Do là tơngu me pal kah ngan geh đơs tus tàm Pơrjum dơ̆ III, Mpồl Lơh kơnòl broă sùm Tỉñ ủy khoă XVII dê, geh bơyai lơh mho ngai òr (30/07). Bè bơtàu tơnguh lơh sa mpồl bơtiàn, tàm nhai 7, uă khà broă lơh geh gơguh lơh sa niam. Lơh sa suơn sre kơl jăp, ròng phan ờ gơtìp kòp gơtờp; kờp jơh khà phan tăc geh rơlao 9 rơbô 600 tơmàn đong, gơguh di mơ pơn drờm mờ nhai lài. Kă bro phan, broă lơh drơng ala gơguh pràn mờ mờr 710 rơbô nă năc lòt nhơl, gơguh 41%. Kờp jơh priă tă tàm kes priă dà lơgar kờp dŭ rơlao 9 rơbô tơmàn đong, ndrờm mờ 67% khà rơndăp broă geh ai tàm nam. Ƀí thư Tỉñ ủy càr Dăk Lăk ồng Nguyễn Đình Trung sồr tơl nă kwang bàng tàm Mpồl Lơh kơnòl broă sùm Tỉñ ủy pơn jăt tai sền wơl ală khà broă, bơsong gơkòl tàm lơh sa kă bro, bơcri priă dà lơgar, lơh niam sră nggal mờ lơh jăt broă dong kờl làng bol tiah jơi bơtiàn ờ gal cau in.