Ngai òr (18/06), Mpồl Sồr lơh, lơh jăt jơnau kờñ gơguh lơh sa bàr sồ càr Dăk Lăk tơngai bơh nam 2026 tus 2030 bơyai lơh dar pơrjum dơ̆ 3 nàng sền wơl cồng nha bơtàu tơnguh lơh sa mpồl bơtiàn 6 nhai bồ nam mờ ai geh ală gùng dà broă lơh nàng gơguh lơh sa tàm tơngai tus. Nàng lơh gơs jơnau kờñ gơguh lơh sa bơh 10% rơlao hờ đang tàm nam 2026, gơguh lơh sa bal 6 nhai lồi nam càr Dăk Lăk dê pal geh gơguh bơh 11,8 tus 12%.

Jăt ồng Lương Nguyễn Minh Triết, Bí thư Tỉnh ủy càr Dăk Lăk đơs, ală kwang bàng tàm Mpồl Sồr lơh, Anih duh broă Làng bol càr neh geh uă broă lơh ngan tàm broă sền gròi ală khà gơguh lơh sa, bơsong kal ke ai ală rơndăp broă lơh bal mờ mpồl lơh sa kă bro in. Mờ sồr ală sờh, gah lơh broă, ală sàh sơnah ƀòn pơn jăt tai tơrgùm bơsong ală rơndăp broă gam gơlời, lơh pràn broă tăc gơnoar ngui ù, lơh ngan tă priă dà lơgar mờ lơh gơs sră nggal nàng ală rơndăp broă pa gờñ lơh, ai geh tai bơta pràn gơguh lơh sa tàm ală nhai lồi nam in.