Mờ tơngu me “Dăk Lăk – Bơta geh, kơ̆p gơn bơtàu tơnguh”, Pơrjum Yal rơndăp ù tiah mờ hòi jà bơcri priă nam 2026 hòi jà geh di pơgăp 1 rơbô nă cau ala măt là kwang đơng lam ală bộ, gah lơh broă Dà lơgar, mpồl lơh broă tus bơh ală lơgar, mpồl tơrgùm bal mpồl lơh sa kă bro, tập đoàn lơh sa mờ cau bơcri priă tàm lơgar mờ lơgar bơdìh.

Bơta tơngŏ kwơ màng ngan bơh pơrjum dê là yal Jơnau lơh nền tàm pơrjum kĭ jơnau lơh wơl rơndăp ù tiah càr Dăk Lăk tơngai bơh nam 2021 tus 2030, wèt tus nam 2050. Sră nggal cih rơndăp ù tiah pa geh kơ̆p gơn rơ̆p pờ geh bơta bơtàu tơnguh dờng ơnàng rơlao, ai tơngŏ ală tiah pràn, tiah jăt gah lơh sa mờ ală tiah tờm gơguh lơh sa pa, ai geh tơngu me nàng càr hòi jà ală bơta pràn bơcri priă tàm tơngai tus.

Bơdìh mờ broă lơh tờm, Pơrjum gam geh bơyai lơh ală broă lơh bè: Sơn đờm, ai ngui ờ uă broă lơh, rơndăp broă lơh geh pơnrơ; Pơrjum cri bơyai mờ mpồl lơh sa kă bro, mpồl lơh broă bal mờ hìu kă bro; Pơrjum bơyai Lơh sa cau dùl nă să lơh is Việt Nam – Dar cri bơyai tàm càr Dăk Lăk; Pơrjum bơyai bè bơtàu tơnguh lơh sa mờ măi mok lơh gơs phan nền nòn mờ logistics pơgồp bal tiah; Pơrjum bơyai bè “Bơtàu tơnguh lơh sa suơn sre mờ măi mok pa: Dơ̆ niam mờ kwơ màng ai mpồl lơh sa kă bro in”; Pơrjum bơyai bè “Tam gơl sồ mờ bơtàu tơnguh bơta niam mpồl lơh sa kă bro kơl jăp”; Drà ràng tơlik phan geh lơh bơh broă lơh sa mờ măi mŏk ƀòn lơgar pơnrơ ngan, phan OCOP càr dê mờ ală càr rềp bal….

Tàm pơrjum, càr Dăk Lăk jào jơnau lơh nền tàm pơrjum dờp gùng dà bơcri priă, sră dờp dan cih măt bơcri priă mờ jơnau hơ bal ală sră nggal cih kah lơh broă bal ai git nđờ jơ̆t rơndăp broă lơh gơwèt uă gah broă in. Ồng Trần Công Sơn, Phó Kwang lam bồ Sờh Priă jền càr Dăk Lăk pà git, bal mờ broă hòi jà bơcri priă mùl màl, càr gam lơh jăt kơrnoăt “gùng tơlir” nàng tơrmù uă ngan tơngai bơsong sră nggal ai mpồl lơh sa kă bro in. “Sờh Priă jền neh dan mờ Anih duh broă Làng bol càr lơh jăt gùng tơlir jăt broă lơh tơrmù 50% sră pơ-àr gơnoar atbồ, mờ ai geh jơnau lơh nền tàm pơrjum nàng geh gùng dà bơcri priă lài do là 17 ngai, tŭ do gam pơgăp 8 ngai nggùl. Tŭ do kơrnoăt “gùng tơlir” geh geh càr yal, tus do, tàm tơngu me tơrgùm bal ală sờh, gah lơh broă tàm càr gơrềng bal tus mờ rơndăp broă bơcri priă nàng gàr niam ală rơndăp broă lơh gờñ mŭt lơh broă mờ tơnguh cồng nha bơcri priă”.

Ờ mìng tơrgùm bơsong ală bơta gơkòl bè sră nggal, càr Dăk Lăk kung gam rơcang lơh ndrờm bal ală bơta geh bè phan bơna, cau lơh broă bal mờ tam gơl sồ nàng wă rò ală rơndăp broă lơh pa. Jăt mpồl bơyai lơh yal, mờ git nđờ jơ̆t rơndăp broă lơh geh jào jơnau lơh nền tàm pơrjum nàng bơcri priă mờ hơ lơh broă bal, do geh sền là dùl tàm ală broă lơh hòi jà bơcri priă dờng ngan bơh lài tus tŭ do càr Dăk Lăk dê.

Tàm bơta bơtàu tơnguh pa gam pờ geh uă dơ̆ niam pơgồp bal tiah đah Tây Nguyên mờ tiah jăt gah dà lềng đah Jum tàm Gùl lơgar, pơrjum dơ̆ do geh kơ̆p gơn ờ mìng hòi jà geh tai bơta pràn ai broă bơtàu tơnguh lơh sa mpồl bơtiàn in mờ gam là dơ̆ tam gơl tàm bồ tơngoh hòi jà bơcri priă, bơh broă lơh jăt khà kờp tus mờ broă rơwah ală rơndăp broă lơh geh bơta niam, geh bơta pràn gơguh lơh sa jŏ jòng ai càr in. Ồng Trương Công Thái, Phó Chủ tịch Anih duh broă Làng bol càr Dăk Lăk đơs nền: “Pơrjum yal rơndăp ù tiah càr mờ hòi jà bơcri priă nam 2026 càr Dăk Lăk dê, gơwèt mờ khà măt rơndăp broă lơh mờ kờp jơh priă bơcri mờ ală mpồl lơh sa kă bro neh dan cih măt den gơtùi đơs do là dùl tàm ală dơ̆ hòi jà bơcri priă dờng ngan bơh lài tus tŭ do tơnơ̆ mờ tơmŭt bal bàr càr Dăk Lăk mờ Phú Yên dê. Mờ bơta pràn geh bè hơ̆, đah càr tơrgùm lơh ală sră nggal, tam gơl sồ; dơ̆ bàr là bơto cau lơh broă bal mờ mpồl lơh broă geh bơta jăk chài nàng drơng ai rơndăp broă lơh in tàm tơngai tus; dơ̆ pe tai là gơwèt mờ broă bơsong sră nggal tơn bơh lài tŭ ală cau bơcri priă mŭt lơh broă den bol añ rơ̆p geh tơrbŏ bal tơn mờ bơsong ală kal ke”.