Jăt mờ hơ̆, bơh ngai 15 nhai 4 tus ngai 15 nhai 5, ală mpồl lòt sền rơ̆p bơyai lơh lòt sền broă gàr kloh niam phan sa tàm 9 tiah tàm càr.

Broă lòt sền do nàng tơnguh uă kơnòl atbồ dà lơgar bè kloh niam phan sa, di tŭ gŏ, kơrian mờ lơh glài ală cau lơh tìs tàm broă lơh, kă bro phan sa; mờ sền wơl broă lơh jăt Nhai lơh broă tàm ală tiah, gah lơh broă, mpồl lơh broă. Bơh dơ̆ lòt sền, ală anih lơh broă geh gơnoar kung rơ̆p sền wơl, lơh niam wơl ală bơta ờ niam tàm broă atbồ, ai geh gùng dà broă lơh nàng tơnguh uă cồng nha broă lơh kloh niam phan sa tàm càr.