Càr Dăk Lăk ngui geh uă bơta pràn krơi is pơnrơ ngan bè bơngă “tiah tờm kơphe” lơgar Việt Nam, wèt tus tiah tờm lơh kơphe dunia dê. Càr Dăk Lăk là tiah tìp bal đah ală gah lơh sa đah Tô đah Jum mờ đah măt tơngai Lik đah măt tơngai Mŭt; geh bơta pràn bơtàu tơnguh logistics, lơh sa dà lềng, lơh sa mờ măi mok lơh gơs phan nền nòn, năng lượng lơh geh wơl mờ lơh sa suơn sre brê bơnơm. Do kung là tơngu me tờm nàng càr ai geh jơnau kờñ gơguh GRDP rơlao 11% tàm 1 nam tàm tơngai bơh nam 2026 tus 2030.

Rơndăp ù tiah geh lơh wơl dơ̆ do ai là broă bơtàu tơnguh “3 tiah – 3 đah jăt gah – 2 tiah tờm – 3 đah gơguh lơh sa”, wèt tus rơndăp wơl bơta pràn lơh sa jăt gùng dà broă lơh pơgồp bal nền nòn, lơh geh uă ngan bơta pràn bơh tơl tiah dê. Mờ càr tơrgùm tàm 3 broă lơh pràn kwơ màng, tàm hơ̆ geh bơta chài măi mok mờ tam gơl sồ; bơta pràn lơh broă mờ kơrnoăt boh lam; phan bơna geh lơh pa.

Jơnau cri bơyai tàm pơrjum, mò Đào Bảo Minh, Bí thư Đảng ủy, Chủ tịc Mpồl duh broă Làng bol sơnah ƀòn Tuy Hoà pà git, broă lơh rơndăp ù tiah geh ală tiah pơgồp bal sền wơl nền nòn ngan nàng lơh geh “dùl tiah rơndăp ù tiah bal kơnhăp ndơ̆p”, ngui uă ngan bơta pràn bơh tơl tiah dê. “Tơl tiah jăt mờ bơta krơi is tàm mùl màl tŭ rơndăp ù tiah bol añ neh kơlôi sơnơng mờ kơ̆p kờñ, rơcang ai broă bơtàu tơnguh tàm tơngai tus mờ bol añ neh ai ală jơnau bơceh do mŭt tàm rơndăp ù tiah. Tŭ rơndăp ù tiah geh kĭ den ai geh bơta pràn nàng bol añ ai bơh tàm rơndăp ù tiah hơ̆, bol añ geh bơcri priă mờ bơtàu tơnguh. Bơcri priă bơh Dà lơgar, bơh càr mờ geh bal broă lơh ngan bơh sơnah ƀòn dê tai”.

Tàm rơndăp ù tiah neh geh ai loh làng jơnau kờñ bơtàu tơnguh lòt nhơl gơs dùl tàm ală gah lơh sa tờm càr Dăk Lăk dê. Den tàng, tàm broă lơh rơndăp ù tiah, Sờh Niam chài, Tàp pràn să jan mờ Lòt nhơl pơgồp bal nền nòn ngan mờ ală mpồl pơlam lơh, tàm hơ̆ uă ngan là sền kwơ tàm gùng dà rơndăp ù tiah ală tiah lòt nhơl càr dê. Ồng Trần Hồng Tiến, Kwang Lam bồ Sờh Niam chài, Tàp pràn să jan mờ Lòt nhơl càr Dăk Lăk pà git, uă bơta ơnàng lòt nhơl tờm geh ai tơngŏ loh làng, bơh tàm tiah lòt nhơl dà lơgar pòt dà lềng Xuân Đài, tiah bơnơm Xuân Hoà tus mờ brê dà lơgar Yok Đôn, tơnao dà Lăk, ală tiah lòt nhơl niam brê bơnơm, lòt nhơl mpồl bơtiàn, lòt nhơl lơh broă sa suơn sre mờ ƀòn lơh broă. “Tơnơ̆ mờ tŭ geh Thủ tướng kĭ rơndăp ù tiah càr dê, bol añ rơ̆p pơn jăt tai pơlam tơmŭt tàm ală rơndăp broă lơh bơtàu tơnguh lòt nhơl mờ lơh ală broă rơndăp ù tiah di mờ gùng dà broă lơh geh ai”.

Jăt ồng Đỗ Thái Phong, Phó Chủ tịch Mpồl duh broă Làng bol càr Dăk Lăk pà git, bơta pơnrơ ngan bơh dơ̆ lơh wơl rơndăp ù tiah do là lơh geh dùl bă bơtàu tơnguh dờng rơlao bal mờ broă tơrbŏ bal tiah loh làng đah măt tơngai Lik mờ đah măt tơngai Mŭt dê. Tàm hơ̆, đah măt tơngai Lik rơ̆p ai lài bơtàu tơnguh lơh sa mờ măi mok, lơh sa dà lềng mờ lòt nhơl dà lềng; gam đah măt tơngai Mŭt tơrgùm tàm broă lơh sa suơn sre măi mok pa, lơh gơs phan ngui sa nền nòn, năng lượng lơh geh wơl. Do rơ̆p là bàr bơta pràn dong kờl bal nàng lơh gơs mpồl geh kwơ lơh sa pa càr Dăk Lăk in. “Lơh wơl rơndăp ù tiah dơ̆ do là tơngu me tờm adăt boh lam mờ là broă lơh lài kwơ màng ngan. Ală gùng dà bơtàu tơnguh lơh sa mpồl bơtiàn, sền gàr dà lơgar, lơngăp lơngai càr dê tàm tơngai tus ndrờm pal geh ai bơh tàm rơndăp ù tiah càr dê”.

Jăt jơnau kơlôi sơnơng tàm rơndăp ù tiah geh ai, bơh tŭ do tus nam 2030, càr Dăk Lăk pal hòi jà tă geh di pơgăp 676 rơbô tơmàn đong priă bơcri gùt mpồl bơtiàn nàng lơh ală rơndăp broă geh bơta pràn bè gùng lòt, phan bơna logistics, anih ơhò dà lền, ƀlàng rơndeh par, tiah lơh sa mờ măi mok, tiah lơh sa mờ ală tiah tờm broă lơh drơng ala geh lơh dờng. Do kung là tơngai nàng càr Dăk Lăk tơrgùm bơsong ală “tiah gơkòl” bè phan bơna, pơgồp bal tiah mờ bơta pràn bơtàu tơnguh nàng ai geh bơta pràn gơguh lơh sa jŏ jòng.

Lơh wơl rơndăp ù tiah càr Dăk Lăk dê ờ mìng pờ geh bơta pràn bơtàu tơnguh pa, mờ gam ai tơngŏ nùs nhơm kơ̆p gơn kờñ brồ guh pràn kơl dang càr dê tàm tơngai bơtàu tơnguh pa. Mờ nùs nhơm kơlôi sơnơng jŏ jòng, bồ tơngoh tam gơl pa mờ lơh ngan lơh broă, càr Dăk Lăk gam lơh geh bơta pràn kơl dang nàng bal mờ gùt lơgar mŭt tàm rài brồ să jơi bơtiàn dê.