Tàm tiah lơh broă bơt bơtàu tiah ơm kis pa ơnàng 5 lồ tàm sàh Hồng Sơn, càr Lâm Đồng gĭt nđờ jơ̆t nă cau lơh phan bal mờ uă rơndeh rơndồ măi mok gam lơh broă tàm ală gơl gùng lòt rê tàm dơlam is. Ồng Đặng Hữu Linh, Lam bồ broă lơh bơt bơtàu pà gĭt, mpồl lơh broă mut lơh mhar ngan, tus tŭ do lơh sir mờr 50% mpồl broă.

“Tàm tiah lơh broă tŭ lơi kung gàr geh rlau 25 nă cau lơh broă, kờp bal mờ cau măi rơndeh. Tŭ do oh mi gam tơrgùm lơh mhar tŭ tơngai nàng gàr niam broă rơndăp lơh geh ai là lơh sir broă lơh bơt bơtàu tàm nhai 9 nam 2026”.

Tàm tiah lơh broă Tiah ơm kis pa tàm sàh Lương Sơn, càr Lâm Đồng, ală cau lơh phan bal mờ uă rơndeh rơndồ măi mok kung gam gơ jal ngan pơnring bơnàng gùng. Tiah ơm kis pa tàm sàh Lương Sơn geh lơh tàm bă ù ơnàng 4 lồ, tơnơ̆ tŭ lơh sir rơ̆p lơh geh jơnau kờñ bơh rlau 100 hìu bơnhă dê. Tiah do gam geh anih tờm kă bro phan. Ồng Phạm Huy Hoàng, đơng lam bồ broă lơh bơt bơtàu, pà gĭt, mờ tŭ tơngai mut lơh tŭ do, mpồl lơh broă kờp dŭ lơh sir broă lơh tàm nggùl nhai 8 do.

“Pah ngai tàm tiah lơh broă ai 8 mpồl cau mut lơh, dùl mpồl bơh 10 tus 12 nă cau lơh broă. Broă lơh gàr niam lơngăp lơngai lơh broă, sàng goh tiah ơm kis lơh jat di mờ jơnau sồr bơh càr dê ai. Pơn yơu bè, che ồs đèng rơ̆p ơn ai gơ in lơngăp lơngai, ờ gŏ di lời khat dồ gơ dùh tàm ù. Ală tiah lơi tơrlah, ñchùn ù den dăng che yal tơngĭt, kƀàng yal tơngĭt lơngăp lơngai tàm tiah lơh broă nàng gàr niam broă lòt rê ai làng bol mờ oh mi mut lơh broă in”.

Nàng drơng broă ai rơndăp broă lơh gùng rơndeh ồs lòt mhar in, càr Lâm Đồng neh ai mat ù mờ bă ù ơnàng rlau 1 rơbô lồ. Càr jal mhar lam lơh bơt bơtàu 8 tiah ơm kis pa ai mờr 1 rơbô hìu bơnhă gơtìp gơrềng tài bơh rơndăp broă lơh dê. Ồng Đặng Tuấn Anh, Mpồl atbồ rơndăp broă lơh bơcri priă bơt bơtàu sồ 2 càr Lâm Đồng, pà gĭt, tŭ do jơh ală ù neh geh tàm jàu nàng ală mpồl lơh broă in mut lơh 8 rơndăp broă lơh. Mờ ală kòl yan tàm tŭ mut lơh kung neh geh tă bơsong nàng lơh mhar tŭ tơngai mut lơh:

“Ală tiah ai phan bơ̆t bơtàu tàm ù tiah càr Bình Thuận yau, is ồn là tiah đah Jum geh uă tiah ai phan bơ̆t bơtàu neh jơh tơngai ai gơnoar den tàng ờ gơtùi ai geh ờ. Cau tờm bơcri priă lơh neh pơgồp bal mờ Sờh Broă lơh sa suơn sre mờ Tiah ơm kis mờ ală mpồl lơh broă geh gơrềng nàng jòi broă lơh tă bơsong kal ke. Tŭ do, ală tơngume gơkòl do neh geh bơsong, ală cau dờp lơh broă gam lơh mhar tŭ tơngai mut lơh nàng bơtơl wơl tŭ tơngai lài do gơtìp lơyài”.