Àng drim ngai 1 Satềp tây nam 2025, dơ̆ par bơh gah rơndeh par Vietnam Airlines geh sồ sơnđan VN1603 gơl gùng par bơh Hà Nội tus Buôn Ma Thuột mù tàm ƀlàng rơndeh par Buôn Ma Thuột, càr Dăk Lăk pơn diang bal 120 nă cau năc mờ cau lơh broă tàm mpồl măi rơndeh par. Do là ală cau năc dơ̆ 1 tơlăk 500 rơbô nă mờ kung là mpồl cau năc sơnrờp ngan “tus” tàm càr Dăk Lăk tàm nam 2025 jăt gùng rơndeh par.

Tềng hìu năc ơm ƀlàng rơndeh par Buôn Ma Thuột, dơ̆ wă rò cau năc lòt nhơl dơ̆ “1tơlăk 500 rơbô” mờ mpồl cau năc lòt nhơl sơnrờp ngan tus càr Dăk Lăk di tàm satềp tây nam 2025 geh bơyai lơh niam bơnĕ ngan mờ broă dròng cing mồng bal mờ đơs crih tamya niam bơnĕ ngan. Ala măt gah lơh broă lòt nhơl càr Dăk Lăk mờ atbồ ƀlàng rơndeh par Buôn Ma Thuột pà bơkào mờ phan chờ gờm ală cau năc lòt nhơl sơnrờp ngan tus mờ càr tàm ngai bồ nam pa in.

Bơtoah ngan là cau năc dơ̆ 1 tơlăk 500 rơbô nă tus càr Dăk Lăk, lŏ Lưu Minh Lan, bơh quận Long Biên, ƀòn dờng Hà Nội tơlik nùs nhơm ngoh rơngăc ngan mờ chờ hờp tŭ gŏ broă wă rò geh lơh niam bơnĕ bơh càr Dăk Lăk dê tàm ngai bồ nam pa. Lŏ Lưu Minh Lan pà git: “Bồ nam pa den nam do ală cau tàm hìu nhă añ lòt bal jơh, ală oh kòn kung lòt nhơl bal den tàng hìu añ geh 1 poh ơm tơn tàm do, kă bro ndang mờ lòt nhơl sền ndang nàng git ală tiah niam tàm do. Añ kung neh lòt tus ờ uă tiah bloh, tàm dơ̆ do añ lòt tus ñrùh Gia Long hơ̆ sồng tus tơnao dà Lăk”.

Dơ̆ wă rò cau năc lòt nhơl dơ̆ “1 tơlăk 500 rơbô nă” mờ mpồl cau năc lòt nhơl sơnrờp ngan tus càr Dăk Lăk dê di tàm satềp tây nam 2025 là broă lơh ai geh bơta niam tàm ngai bồ nam pa nàng tơnguh uă rùp rài niam, măt kă bro lòt nhơl càr Dăk Lăk dê, hòi jà geh broă rơcang sền bơh ală cau dê, tàm hơ̆ uă ngan là ală cau năc geh bơta niam uă tàm lơgar bal mờ lơgar bơdìh. Mờ do kung là dơ̆ nàng yal ală tiah lòt nhơl krơi is mờ geh bơta niam uă tàm broă bơtàu tơnguh lòt nhơl càr Dăk Lăk dê, pơgồp bal niam tàm broă bơ̆t bơtàu mờ bơtàu tơnguh măt kă bro lòt nhơl càr Dăk Lăk. Mò Nguyễn Thụy Phương Hiếu, Phó kwang atbồ Sở Niam chài, Tàp pràn să jan mờ Lòt nhơl càr Dăk Lăk pà git: “Sở kung kơ̆p kờñ ală cau năc tàm dơ̆ par mù tus tàm càr Dăk Lăk rơ̆p gŏ cau kis tàm càr Dăk Lăk đềt mềr, kờñ gơboh mờ cau năc. Rơlao mờ cau lơi jơh, ală cau năc do rơ̆p yal bè rùp rài, kòn bơnus càr Dăk Lăk tus mờ ală cau pròc mhàm, bơyô mờ tơnơ̆ hơ̆ bơh ală cau do rơ̆p là cau pơlam mờ yal bè càr Dăk Lăk bal mờ ală jơnau lời kir, lơh pơgồp bal tàm broă lơh gơguh cau năc tus mờ càr Dăk Lăk”.

Nam 2024, kờp jơh priă geh bơh lòt nhơl tàm càr Dăk Lăk gơguh rơlao 21% pơn drờm mờ lài. Do là bơta tơngŏ niam gơwèt mờ càr Dăk Lăk dê tàm broă lơh ngan bơtàu tơnguh ală phan lòt nhơl pa, sền kwơ tàm broă lơh ală bơta krơi is tàm bơta niam chài tiah brê bơnơm dờng dê. Nam 2024, kờp jơh priă geh bơh lòt nhơl gùt càr Dăk Lăk geh 1 rơbô 255 tơmàn đong, gơguh rơlao 21% pơn drờm mờ nam 2023, càr Dăk Lăk neh wă geh 1 tơlăk 500 rơbô nă cau năc. Khà cau năc tus bơh ală lơgar tàm càr Dăk Lăk kung gơguh rơlao 34% pơn drờm mờ nam lài.

Bơta pơnrơ ngan tàm gah lòt nhơl càr dê tàm nam pa do là pơgồp bal mờ broă chờ gờm di tơnkah 120 nam Ngai crơng gơs Càr Dăk Lăk. Càr neh bơyai lơh tai uă tiah lòt nhơl mpồl bơtiàn tàm ală ƀòn, ngui bơta pràn bơh tơl jơi bơtiàn dê nàng lơh geh bơta niam krơi is. Tàm hơ̆, broă tơrlòng tơrbŏ bal phan lời wơl tềl kah yau “cing mồng Tây Nguyên tàm broă lòt nhơl phan lời wơl Buôn Ma Thuột, càr Dăk Lăk dê rơ̆ geh lơh uă tàm tơngai tus. Ồng Lại Đức Đại, Phó kwang atbồ Sở Niam chài, Tàp pràn să jan mờ Lòt nhơl càr Dăk Lăk pà git, broă tơrlòng lơh do rơ̆p dong kờl làng bol git loh rơlao tai bè bơta kwơ phan lời wơl dê mờ să tờm gam geh, geh bơta pơnyờ să mờ pơn jăt tai bơto pơlam bơta niam chài cing mồng Tây Nguyên; Ai geh bơta niam nàng phan lời wơl niam chài cing mồng gơs bơta pràn ai broă lòt nhơl in, tơrbŏ bal mpồl bơtiàn mờ lơh geh gùng lòt nhơl phan lời wơl dê. “Rơ̆ geh broă pơgồp bal nền nòn rơlao, ờ mìng lơh bơh 1 tus 2 broă tơrlòng lơh mờ gơtùi lơh uă broă tơrlòng lơh dùl dơ̆ tĕ bal, ală ơdŭ bơto gơtùi tàm tơrbŏ bal lơh mờ broă tus bal bơh ală cau jăk, ală cau chài. Broă dan geh bơh ală tiah rơcang lài kung bè ală broă geh ai lài broă rơndăp lơh bơh sơnrờp bơh Sở dê di gơlan rơ̆p geh broă tơrbŏ bal uă ơdŭ geh bơta niam uă mờ geh cồng nha uă rơlao”.