Sùm sền gròi ală jơnau yal gơrềng tus gùng dà broă tơrgùm mờ lơh niam mpồl lơh broă, đảng viên Nguyễn Văn Lập, kis tàm sàh Hoà Thắng, ƀòn dờng Buôn Ma Thuột sền gŏ do mùl màl là dơ̆ lơh kwơ màng. Să tờm ồng bal mờ gal làng bol pin dờn là, broă tam gơl do rơ̆p pờ geh rài tơnơ̆ do bơtàu tơnguh ai dà lơgar in. “Broă rơndăp ù tiah bal mờ bơta pràn bơtàu tơnguh lơh sa rơ̆p pờ ơnàng rơlao, ai geh bơta niam nàng lơh pràn ală bồ tơngoh kơlôi sơnơng pa, làng bol geh tơrbŏ bal ơnàng rơlao, tìp bal uă rơlao, mờ di gơlan rài kis niam chài kung geh uă bơta rơlao”.

Gơwèt mờ mò Ngô Thị Minh Trinh, Phó Ƀí thư Duh broă sùm Huyện uỷ kơnhoàl Krông Păc, càr Dăk Lăk yal, broă tơn jơh lơh broă bơh mpồl lơh broă sră nggal kấp kơnhoàl, mò mờ mpồl kwang bàng, kông cứk kấp bal rơ̆p gơrềng uă ngan. Mơya, broă lơh tơrmù di pal là dùl broă pal geh lơh, geh kwơ ai broă lơh bal dê den tàng tơl nă kwang bàng, đảng viên tàm kơnhoàl ndrờm git loh kơnòl broă bơh să tờm dê. “Tơngai sơnrờp di gơlan kơlôi rơcang, ờ suk là bơta pal geh ngan. Mơya bơh broă mblàng yal, tàm pơgơl, lơh jăt, den kwang bàng, đảng viên mờ kông cứk neh git loh bơta kwơ màng bơh gùng dà broă lơh, bơh tŭ hơ̆ dùl nùs bal lơh jăt tài bơta bơtàu tơnguh bal dà lơgar dê”.

Jăt gùng dà broă tơrgùm kấp sàh neh geh ring bal tàm Pơrjum dơ̆ XI Mpồl đơng lam Đảng Dà lơgar Khoă XIII dê, khà tiah kấp sàh rơ̆p tơrmù di pơgăp 70%, hơ̆ là rơ̆p geh broă 3 sàh tơrgùm bal gơs 1 sàh. Ală kwang bàng đảng viên tàm càr Dăk Lăk ndrờm git, tơngai lơh broă rơ̆p pal kong gơtìp mờ bơta kal ke lài ngan tơnơ̆ mờ tŭ tơrgùm bal, bơh bơta mờng lơh broă, bơta ngài ù tiah tus mờ tiah lơh broă pa. Mơya, nùs nhơm lam lài bal mờ kơnòl broă bơh kwang bàng, đảng viên tàm do dê neh lơh geh nùs nhơm pin dờn mờ bơta pràn lơh jăt gùng dà broă lơh kơ̆ kơl jăp. Mò Cao Thị Thúy Nga, Ƀí thư Đảng ủy sàh Tân Lập, kơnhoàl Krông Búk, càr Dăk Lăk pà git: “Bol añ tơnguh kwang bàng tus tàm ală ƀòn, nàng lơh niam rơlao ală kơnòl broă drơng làng bol in -  di mờ nùs nhơm “Kwang bàng là cau drơng broă làng bol in”. Bŭ lah dùl dơ̆ lĕ pal dờp uă kơnòl broă, mơya mờ nùs nhơm geh kơnòl uă, bol añ sùm ai: gam dùl ngai lơh kwang bàng den gam jơh nùs tài broă lơh mờ tài làng bol”.

Tŭ do, gùt càr Dăk Lăk geh 180 mpồl lơh broă kấp sàh (tàm hơ̆ geh sàh, sơnah ƀòn, ƀòn drà dềt), tơnơ̆ mờ tŭ rơndăp tăp sèng kờp dŭ mìng gam 45 mpồl lơh broă, gơmù di pơgăp 75%. Jăt ồng Nguyễn Hoài Dương, Kwang lam bồ Mpồl mblàng yal bơto bơtê mờ Hòi jà làng bol Tỉñ ủy càr Dăk Lăk yal, broă rơndăp tăp sèng do ờ mìng pơgồp bal tàm nùs nhơm tơrmù mpồl lơh broă, lơh geh wơl kwang bàng lơh broă mờ gam là dơ̆ niam nàng tam pà kấp, tam pà gơnoar pràn kơl dang rơlao ai kấp sàh in. Bơh tŭ hơ̆, gơnoar atbồ rềp mờ làng bol rơlao, drơng làng bol in ƀuơn mờ geh cồng nha rơlao. “Tơngai do, ală tiah bal mờ ală gah lơh broă neh rơhời rơndăp tăp sèng wơl mpồl lơh broă mờ tus tŭ do ală broă ndrờm gam lơh di gùng dà geh ai. Tus do, he rơ̆p pơn jăt tai lơh pràn broă tơrgùm bal càr, sơrbì kấp kơnhoàl, tơrgùm kấp sàh. Do là gùng dà broă lơh di pal ngan, di mờ mùl màl, dong kờl bơsong ală kal ke tŭ do mờ ngui geh cồng nha bơta geh bơh tơl tiah dê, pơgồp bal tàm broă bơtàu tơnguh lơh sa mpồl bơtiàn pơgồp bal mờ sền gàr niam dà lơgar, lơngăp lơngai kơ̆ kơl jăp”.

Broă tơrgùm bal ală mpồl lơh broă sră nggal tàm càr Dăk Lăk ờ mìng là jơnau kờñ pal geh lơh tàm bơta tam gơl pa, mờ gam ai tơngŏ broă lơh ngan cíñ trị pràn kơl dang tàm broă bơ̆t bơtàu mpồl lơh broă sră nggal ngăc ngar niam, geh cồng nha, drơng làng bol in niam rơlao. Bŭ lah tềng đăp gam uă bơta lòng, mơya mờ broă ring bal uă, nùs nhơm geh kơnòl uă bơh mpồl kwang bàng, đảng viên bal mờ broă kờñ bal bơh làng bol dê tai, càr Dăk Lăk gam rơhời lơh jăt di mờ gùng dà broă lơh dờng bơh Đảng, Dà lơgar neh ai, pràn mờ geh jơnau pin dờn uă. Ală broă lơh ngan tŭ do rơ̆p là bơta tờm kơ̆ kơl jăp nàng càr Dăk Lăk mŭt tàm tơngai bơtàu tơnguh pa – ñhăp ñhar, lơh pa mờ kơ̆ kơl jăp rơlao tàm rài tơnơ̆ do dê.